باخما حسرتیله مه لقا ابوالفضل
گل ائدوم وصیت باوفا ابوالفضل
چکمه ال حسینیمدن
نور هر دو عینیمدن
باوفا ابوالفضل (2)
امر مجتبایه ایلیون اطاعت
حجت خدادور معدن جلالت
قویمیون ملول اولسون
قلبی قانیله دولسون
باوفا ابوالفضل (2)
ظلمیله آلاللار حقینی الیندن
بیر نفر آلانماز دردینی دلیندن
مجتبایه دلدار اول
غم گونونده غمخوار اول
باوفا ابوالفضل (2)
زینبی سووردیم هر ایکی گوزومدن
واردی چوخ علاقم بول بو بیر سوزومدن
یادگار زهرادور
درس دینه دارادور
باوفا ابوالفضل (2)
جان سنون ابوالفضل جان بلالی زینب
قویما ناله ائتسون ابتلالی زینب
یاندورار غم هجران
قویما چوخ ائده افغان
باوفا ابوالفضل (2)
صبر ائله غمیمده گلمه چوخ نوایه
ساخلا خدمتون سن دشت کربلایه
وار قاباقدا عاشورا
بیر مصیبت عظما
باوفا ابوالفضل (2)
چکمه ال حسیندن دشت کربلاده
عشقیوی نشان ویر وادی بلاده
اوغلوما علمدار اول
لشگرینده سردار اول
باوفا ابوالفضل (2)
ایله کربلاده صدق اوزیله خدمت
العطش دینده عترت رسالت
ائت سوسوزلارا چاره
دگسه سینه وه یاره
باوفا ابوالفضل (2)
نی کیمی گلنده نالیه سوسوزلار
الده بوش سو جامی گوزده اشک قزلار
گلسه لر گر افغانه
گوز یاشون دونر قانه
باوفا ابوالفضل (2)
ال تاپار سو اوسته لشگر ضلالت
اوخ آتانلار ایلر بیر بیوک جسارت
اوخلانار او گون مشکین
گوزده قان اولار اشکین
باوفا ابوالفضل (2)
دشت کربلاده ائت وفاوی اعلان
تک قالان زماندا سرور شهیدان
آل اجازۀ میدان
اول حسینیمه قربان
باوفا ابوالفضل (2)
«تابع دین» اولموش غملر آشناسی
قورتولا محندن بیزده دور دواسی
غمدن ایلرم آزاد
نوکریم اولار دلشاد
باوفا ابوالفضل (2)
- دوشنبه
- 3
- تیر
- 1398
- ساعت
- 10:46
- نوشته شده توسط
- ابوالفضل عابدی پور
- شاعر:
-
محمد حسن تابع دین
بهمن امیری