نسل انسانه معلم، مهربان انسان ئولوبدی
بانی و بنیانگذار مکتب قران ئولوبدی
مبدا صدق و صداقت نقطه کانون وحدت
نقطه کانون وحدت ناشر و منشور خلقت
ناشر و منشور خلقت افتخار آدمیت
افتخار آدمیت واقعی انسان ئولوبدی
شمس وجدان بشرده شرق و خاورلیق یارالدان
کفر و تبعیضی داغیتموش نور داورلیق یارالدان
هم برابرلیق یارالدان هم برادرلیق یارالدان
مظهر مهر و محبت، راحم و رحمان ئولوبدی
آفرینش داغلاریندان جوش ایدن عشق آبشاری
خلقتین سر سرشتی آدمیت چشمه ساری
نسل انسانین تاپولماز تای بیوک آموزگاری
دفتر تاریخ دینه فصل بی پایان ئولوبدی
شمع فانوس حقیقت روشنایی فتوت
روشنایی فتوت مکتب آموز اخوت
مکتب آموز اخوت لوح پایان نبوت
آدم و نوح و سلیمان، موسی عمران ئولوبدی
بذل ایدن طعم گوارا کوثریله سلسبیله
قدرت پرواز ویرمیش مهر پاکی جبرئیله
گلستان اودان یارالدان دوزخ جان خلیله
هر یورولموش دیزده قدرت هر بدنده جان ئولوبدی
فیض شوری شور ویرمیش خلوت شورای طوره
لمعه نوری یتورمیش نخل طوری فیض نوره
مین کلیمه یولار آچموش مقصد سر ظهوره
کشف اسرار تجلی وصل اولوب هجران ئولوبدی
کاتب لوحه قلمدن اولین ارزنده مکتوب
یوسفین پیراهنینده طوطیای چشم یعقوب
عمق دریاده توان و صبر بی پایان ایوب
نوحه آرامش یتورموش شافع عصیان ئولوبدی
اوج عرش کبریاده پر ویران قدرتلی درّاج
فرشدن عرشه یول آچمیش حالتی هر حالدا معراج
شور عشق لایزاله بیر درین دریای مواج
نفس ذیحق، مظهرالحق محرم یزدان ئولوبدی
یول گدنلر رهنمای آل آدم پیشواسی
آل آدم پیشواسی هر مسلمان مقتداسی
سالک و ملک وفانین پیر راه با وفاسی
عارف و پیر دلیل عالم عرفان ئولوبدی
شاهکار آفرینش، خلقت آرای خلایق
خلقت آرای خلایق، علقه کلّ علایق
بلغ خلقتده سولونماز قرمزی آچکین شقایق
هر شقایقدن طراوت ذوق باغستان ئولوبدی
دست رافت روح راحت شارح شرح محبت
شارح شرح محبت دشمن دیو خشونت
صاحب خلق خدایی خلد سرسبز عطوفت
کشتی دین خدای حقه کشتیبان ئولوبدی
- دوشنبه
- 3
- تیر
- 1398
- ساعت
- 11:11
- نوشته شده توسط
- ابوالفضل عابدی پور
ارسال دیدگاه