نه وار گنه اوجالوب ناله سطح غبرادن
گیچر بو ناله سسی طاق چرخ خضرادن
دوتوبدی شش جهتی داد و ناله و شیون
فغان و ناله گَلور فرشه عرش اعلادن
یر و گوی آغلوری، آباء و امّهات آغلور
گیدوبدی علّت خلقت مگر بو دنیادن
یقین بو گون یتیشوب قلب عالمه ایذا
که عالمی متزلزل ایدوب بو ایذادن
سوروشدوم عقلیدن آیا ندور بو هنگامه
دولوب زمین و زمان دادِ تاب فرسادن
جواب ویردی بو گون کوفه ده قیامتدور
گَلور بو ناله سسی دودمان والادن
علی ولیّ خدا، آیت الله اکبر
کسوب علاقه سینی بو جهان سُفلادن
بهشته قاره چکوبلر اولوب عزاخانه
او بزمیده اوجالوب ناله روح زهرادن
یولار فغانیله گیسولرینی حورُالعین
سالولّا صورته درد نهانی معنادن
ابوتراب ایدوبدور ترابیده سُکنی
ترابی رشک بهشت ایلوب بو سکنادن
صدای لَیتنی کُنتُ تُراب اولمور مَسموع
مقام غبطه ده هر دم سپهر مینادن
ابوالائمّه ئولوبدور، یتیم اولوب حسنِین
گیچوب حسین و حسن ناله سی ثریّادن
یتیم لیق توزی بو گون قونوب حسین یوزینه
آخار عذارینه گوز یاشی چشم شهلادن
آچوبدی باشینی زینب، یولار ساچین کلثوم
چکر ایکی باجی ناله بو درد عظمادن
علی ئولوب سینوب ارکان دین لم یزلی
هدایته یتیشوب صدمه بو قضایادن
آچوب یَخاسین علمدار کربلا عبّاس
فرات تک آخوری اشک چشم، سقّادن
ایدوب آتاسینا غسل و کفن امام حسن
بو سوز وصیّتیدی اوغلونا او مولادن
اوزی مطابق قانون شرع ایتدی حُنوط
همان حُنوط که گَلمیشدی دار عقبادن
بودور قواعد قانون شرع مصطفوی
خلاف شرع گورونمز اصوله دارادن
ایده لّه غسل و کفن شرعیده مسلمانه
ندندی کوفه لیلر چخدی شرع غرّادن
حسینی قویدولا بی غسل و حُنوط و کفن
تاپولمادی گوتورن نعشینی او صحرادن
نه چکدی بُلمورم الله بُلور خانم زینب
او جسمی عور گورنده لباس دیبادن
اماندی گیتمه قلم کربلایه، کوفه ده قال
واروندی چشم صله گر علیّ اعلادن
آتا جنازه سینه مجتبی ایدنده کفن
حسینی سالدی بو غم طاقت و توانادن
یوگوردی سالدی اوزین مرتضی جنازه سینه
علاقه کسدی تحمّل او ماه سیمادن
باجیسی زینبه یول آچدی کربلا شاهی
ویروب بلا چولونون مشقینی بو ایمادن
عقیلةُ العرب، ئومُّ المصائب عالم
فزون اولان شرفی مریمیله سارادن
دوشَندی باغرینا باسدی آتا جنازه سینی
اوجالدی وا ابتا دخت میر بطحادن
قاریشدی بیر بیرینه سر به سر بنی هاشم
اوجالدی ناله و شیون عیال طاهادن
ئولوب امام، سپوب شیعه لر باشا توپراق
دیار کوفه دولوب صوت وا امامادن
علی ایوینده ایله بیر قیامت ایتدی قیام
که حشر آیت صغری اولور او کبری دن
جنازه سین گوتوروبلر غرض بنی هاشم
آیردیلار آتانی تا بنات و ابنادن
گوروب امام حسن باش آچوق گَلور زینب
جنازه نین دالسنجا چخوب شکیبادن
دوتوب حسینه یوز آغلار گوزیله ایتدی خطاب
دایانما زینبی قِیتر حسین بو ماوادن
باجیمیزون گوره گر قامتینی نامحرم
بیزه گونوز اولی تاریک لیل یلدادن
عزیزه باجیسینی قِیتروب امام حسین
گنه گوزوم یاشینون موجی گیچدی دریادن
همین بو زینبیدی کربلاده یازهرا
گیچردی اللری باشدا صفوف هیجادن
بو فکریدِیدی اوزین مصرع حسینه سالا
حسینی حفظ ایلیه شرّ قوم اعدادن
باشیندا معجری بُلمم که واریدی یوخودی
علوم صاحبی آگهدی بو معمّادن
بو قدر وار که حمید ابن مسلم ایلر نقل
اونون او نقلی آلور تاب سنگ خارادن
اونون روایتینون بیر اشاره سین دیماقا
چوخ اعتذار ایدورم من بتول عَذرادن
دیر بو عورتی گوردوم که گون کیمی چخدی
یوزونده حایلی وار طُرّه ی مُطَرّادن
خیامیدن قاچوری قتلگاهه باشدا اَلی
سپهره لرزه سالور بانگ وا حسینادن
گهی قاچور یخولور، گه دورور گنه یوگورور
اوزین ایله ایتوروب قوخموری منایادن
قولاقلاریندا ایدور گوشواره لر حرکت
اونون او حالی موثّردی حال ثکلادن
دیور حسین نیه گوگلر یره توکولموری بس
توان و طاقت آلور صوتی پیر و برنادن
گَلوب بو حالیله گودال قتلگاهه یتوب
بُلنمورم نه گوروب شمر بی مَهابادن
بویوردی جان ویرور اینجیتمه، اَل گوتور ظالم
بو تشنه لب یارالی، پاره پاره اعضادن
جسارت اولدی « #حسینی » دایان چوخ عذر ایسته
امام عصریدن اَلده اولان بو طَغرادن
- دوشنبه
- 3
- تیر
- 1398
- ساعت
- 11:14
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه