بخش 1 وصیت حضرت علی (ع)
علی مجسّمۀ فیض و جود و رحمتدور
علی تمرکز داد و وِداد و رأفتدور
ایله کریمیدی سلطان تاجدار غدیر
ایدردی قاتلینه رحم او شاه خیبر گیر
او گون که ساخلادیلار محضرینده قاتلینی
گوز آچدی گوردی دوروب قاتلی ولی دلگیر
بویوردی من سنه ای بی وفا نه ایتمیشدیم
سبب ندور منه گوردون بو نوع ظلمی جَدیر (1)
دونوب امام مبین مجتباسه سالدی نظر
بویوردی ای گوزیمون نوری اختیار ضمیر
آپار بو ظالمی ساخلا و لیک اینجیتمه
نه وور ایاقنه کونده نه بوینونا زنجیر
نوازش ایله اسیروندی آج سوسوز قویما
بونادا ویر منه هر دم ویرنده کاسۀ شیر
روا دگول بلوسن دستیگیری اینجیتماق
اسیره رحم ایلیون امر ایدوب خدای قدیر
اوغول حَسَن اگر اُلدورمسه بو یاره منی
بغشلرم بونی گر چه ائدوب بیوک تقصیر
اگر اُلَم بو منه بر قلج وُروب سنده
منیم قصاصیمی آل وُر بو شومه بیر شمشیر
مباد ایلیه سوز مُثله من رضا دگولم
حرام ایدوب اونی پیغمبر بشیر و نذیر
اسیره یا علی ایله لَّه بیر بیله رأفت
دگولدی سیّد سجّاد اهل شامه اسیر؟
علیلیدی اوزی امّا ترحّم ایتمدیلر
وُروبلا بوینونا زنجیر شامیان شریر
رضا دگلدون اولا قاتلون سنون مُثله
سنون گوزوندن ایراق ای جهانیانه امیر
حسینون ایتدیله مُثله علاوه قویدولا عور
کفن تاپولمادی الّا او جسم پاکه حصیر
قوروبدی دام بلا کربلاده اهل جفا
مخدّرات حرم دشمنه اولوب نخجیر
بتوله نایبه زینب گوروب حسینی دیدی
کفن ایدردیم اَلیمده اولیدی گر تدبیر
سنون کیمی آنام اوغلی سویولموشام منده
گیدوبدی مقنعه تاراج اولوب لباس حریر
یازیلسا زینبون احوالی سوز مطوَّل اولار
ائدوم ولادت زهرانی مجملاً تحریر
ــــــــــــــــــــ
(1)جدیر به معنی سزاوار است
بخش 3 میلادیه حضرت زهرا (س)
یارانمییدی اگر نور حضرت زهرا
نه آی اولوردی نه گون، نه بو پرتو دنیا
کیمون جهاندا یتر شأنی شأن زهرایه
بونون تَفَوُّقی وار هاجریله سارایه
غلامدور بونا عیسی، کنیزدور مریم
حبیبه دور بو خانم ذات حیّ یکتایه
او گون که خالق عالم یاراتدی افلاکی
چکیلدی پردۀ ظلمت سپهر مینایه
ملک لر ایلدیلر استغاثه معبوده
یتوبله نور بتولیله فیض عظمایه
خدای خلق همان دمده نور زهرانی
ایدوبدی عرشینه قَندیل وار پیرایه
منوّر ایلدی افلاکی فاطمه نوری
دیولدی اسمینه زهرا همین بو معنایه
بشر غلطدی دیماق، نور محض دور بو خانم
گلوب بشر کیمی ظاهرده دار دنیایه
آناسینا آنا بطنینده اولدی هم صحبت
اودور مُحَدِّثه صدق اولدی بو دل آرایه
تولّدنده زنان قریش گَلمَدیلر
خدیجه نین اوجالوب آهی عرش اعلایه
یر اوسته ایتدی خواتین دار خلد نزول
اولوبلا قابله نور بتول عَذرایه
بهشت حلّه سینه ایلیوبله پیچیده
دوشه مباد او جسمِ لطیف ایذایه
ایله لطیفیدی جسمی خیاطه دوشسیدی
سالوردی خطّ او گُلدن لطیف اعضایه
ایا امام زمان داد ظلم ثانیدن
شهیده یولّادی زهرانی دار عقبایه
قاپی دالیندا قویوب یاندوراندا درگهینی
اوجاتدی ناله آنان فاطمه ثریّایه
بویوردی فضّیه گل ظلمیله بالام ئولدی
دایانما تیز خبر ایله علیّ اعلایه
چخوب علی یخولوب گوردی حضرت زهرا
گیدوب تحمّل و صبر و قراری یغمایه
عباسینی گوتوروب سالدی فاطمه اوسته
گوگل بو یرده دوشوب بیر ملال عظمایه
دوریدی کاش علی قبریدن الینده عبا
گلیدی کرب و بلا دشتینه تماشایه
سالیدی اوردا قیزی زینبین عبا باشینا
جمال عصمتی مستور اولیدی اعدایه
آناندی چونکه «حسینی» شفیعۀ محشر
غم ایتمه گیتسن اگر دست خالی عقبایه (1)
بخش 3 مدح و ماجرای ازدواج
گورردی امّت مرحومه نار قهریّه
گر اولمییدی شفاعت بتوله مهریّه
اگر ولیِّ خدا گلمییدی ایجاده
بتوله کُفوّ تاپولمازدی دارِ دنیاده (2)
وجود زهرۀ زهرایه مشتری چوخ اولوب
نزول زهریه آخر اولوبلار آماده
اولاندا نیمۀ شعبان نزول ایدوب زهره
دایاندی باب امامت سرای والاده
ایدوب علی ایوینه زهره یدّی دفعه طواف
فصیح صوتیله تبریک ایدوب او اثناده
دوباره ئوز یرینه زُهره ایلیوبدی عروج
قضیّه منتشر اولدی تمام افراده
هامی بُلوب که ولیِّ خدادی زوج بتول
بیر اوزگه سی داخی قالموبدی بو تمنّاده
ولیِّ مطلقی پیغمبر ایلیوب احضار
دانشدیروبدی خصوص بتول عذراده
رضاسی واردی گوروب مطرح اولدی مهریّه
حیا تری دوزولوبدور جبین مولاده
گلوب تکلّمه عرض ائتدی یا رسول الله
عم اوغلوون بُلوسن یوخ گمانی بیر زاده
تمام ما مَلَکیم بیر قلجدی بیر ناقه
علاوه بیر زِرِهیم وار بو دار دنیاده
معاش مایه سیدور ناقه وقت اُجرتده
قلجدا واجب و لازمدی حین دعواده
رضایتوز وار اگر امر ایدون ساتوم گِییمی
تدارک ایله جهازیّه حقّ زهراده
یری واریدی دییدی علی ولیِّ خدا
رسول اکرمه ای پادشاه آزاده
اگر چه ظاهر صورتده چوخ محقردور
صداق فاطمه ، امّا بُیوکدی معناده
همین گیوم دولوسی قرمزی قزل ویرّم
بشرط لازمه دور صبر اولا بو سوداده
آخاندا حلقه لریندن حسینیمون قانی
دیار کرب وبلاده او قانلو صحراده
دولوب گیوم گوره سن قانیله عقیق کیمی
گلور ظهوره بو گیزلین سوزوم او بَیداده (3)
بتوله مهر ایدرم قرخ کنیز بیرجه غلام
تمام قوللاری باغلو بویوندا قلّاده
گرک ویرم ولی بازار شامده تحویل
غلام آدی قویولاندا امام سجّاده
کنیز آدی قویولار اوردا فاطمیّه لره
اولار رعیّتینه دستگیر شهزاده
غرض پیمبر او مهریّه نی قبول ایلدی
که مستحبّیدی آز مهر شرع غرّاده
علی آپاردی ساتا درعی جبرئیل آلدی
گتوردی قویدی یره پیشگاه طاهاده
الینده وجه زره مرتضی علی قیدوب
گوروب که وار شُعَف آثاری شاه بطحاده
گورن کیمی دئدی درعی علی کیمه ساتدون؟
جواب وئردی علی شرمسار و افتاده
تصادف ایلدی بازاریده بیر اعرابی
او آلدی حاضریدی وجهی دست یُمناده
بویوردی درعی آلان جبرئیلیدی سندن
تفاخر ائتدی بو خدمتله چرخ خَضراده
گتوردی ویردی منه ، من ویرم سنه زرهی
که یر یوزونده سراسر عیون بیناده
فقط جهاندا برازنده دور سنه بو گِییم
که یوخ نظیری بیر اعلاده یا بیر اَدنی ده
گیوم پولوندان آلیندی جهاز فاطمیه
قویولدی عقد بناسی او فخر امجاده
باخون جلالته اوچ عقد اوخوندی زهرایه
ایکیسی گویده بیریدَه بو سطح غبراده
بیر عقد فاطمیه حیِّ ذوالجلال اوخیوب
لسان قدرتیله طاق عرش اعلاده
یغشدی اهل سماوات بیت معموره
قویولدی جشن بناسی سپهر میناده
چخوبدی منبره راحیل چرخ چارمده
بیر عقدده او بیان ایلدی او مأواده
بیر عقدده اوخیوب یر یوزونده پیغمبر
منافقینی گتوردی بو ماجرا داده
ائدوبدی صیغۀ اَنکَحتُ عقل کلّ بیان
صداقه مختلف اقوال وار باخ اَسناده
یازولّا دورت یوز الی بِش یوز اختلافیله
و یا همان زِرِهه عقد اوخوندی معناده
بو رسمیدور که عروسه نثار اولار طویدا
نثار ائتدی بتوله خدای یکتاده
خطاب ائتدی خدا قویموشام ودیعه نثار
حبیبه مین طویونا من درخت طوبی ده
علاقه دوتدی مشیَّت نثار پخش اولدی
سپیلدی دُرّ و گهر جنت معلاده
برات نامه توکولدی درخت طوبادن
باخان گورر بو حدیثی کتاب بیضاده (4)
یازوب خدا که علی شیعه سی محب بتول
محالدور گوره نار جهیم عقباده
بخش 4 بساط عروسی حضرت زهرا سلام الله علیها
بساط جشن مرتّب ایدوبله آل مناف
قورولدی زوجۀ شیر خدایه بزم زفاف
زفاف فاطمه ده وارنچه دقیق نکات
اگر دیویلمسه اولماز جلالتی اثبات
او وقت اولوب که بتولی عروس آپارسونلار
یول اوسته دوردی دایاندی شفیعۀ عرصات
دیدی رضا دگولم من بو مهره یا اَبَتا
ولی عم اوغلوما واردور رضایتمده ثبات
اودمده نازل اولوب جبرئیل گتدی پیام
دیدی رسوله که زهرایه ایله تبلیغات
بهشت ثُلثنی بیرده بو عالمین خُمسین(5)
یازوبلا فاطمیه مَهر گویده کی قضّات
بتول اولمادی راضی عروج ایدوب جبریل
گلوب دوباره ایدوب عقل کُلَّه کشف نکات
بهشت نهرلریندن خدا دیور دورت نهر
بتول مَهرینه آرتوردوق ای امیر هُدات
بو عالمین سولارینداندا یازمشوخ دوردین
بیریسی بلخ بیری نهروان و نیل و فرات
حسین آناسینا مهریّه دور فُرات امّا
حسینی ئولدوره جاق تشنه کربلاده عِدات
باخار فراته دیرالعطش یانار جگری
یارالاریندان آخار قانی هر یانا چو قنات
دیدی بتول بو مهره گینه رضا دگلم
پوزولدی حالتی دلگیر اولدی مظهر ذات
امین وحی گتوردی پیام ربّ جلیل
بو نوع ایلدی خیرالورایه کشفیّات
یری گوئی فلکی دوزخیله جنّاتی
حق ائتدی فاطمیه مَهر ای حقه مرات
گینه بتول دایاندی دیدی رضا دَگُلم
پیمبر آلدی قیزیندان او دمده توضیحات
قیزیم نه ایستوسن علت ندور رضا دگوسن
گلوب تکلمه عرض ائتدی اول حمیده صفات
نظر بابا بُلوسن امّتین شفاعتیدور
منه نه لازمه دور حوض کوثر و جنات
امین وحی نزول ائتدی الده بر طغری
او مَهرنامه نی زهرایه ائتدی تقدیمات
یازوب او نامه ده دادار دست قدرتیله
حبیبه دور منه زهرا شفیعۀ عرصات
قیامتین گونی زهرا اگر شفاعت ایده
بغشلرم اُولی مستوجب بهشت عُصات
او مَهر نامه نی بر حُقّه ده بتول آلدی
محافظ اولدی او طغرایه تا واریدی حیات
دئدی ئولنده عم اوغلی بو حُقّه نی ساخلا
منیله دفن ایله من نوش ایدنده جام ممات
دئدی ندور دئدی بو حُقه مَهر نامَمدور
بودور جزاده وئرن جدّیم امّتینه نجات
مُطَوَّل اولدی سوزون مختصر بیانیلیه
چتین « #حسینی» تاپا خاتمه بو تألیفات
ــــــــــــــــــــ
(1)در کتاب ذخایر العقبی ص 48
انَّ فاطمةَ حَصَّنَت فرجها فَحَرَّمَ اللهُ ذُرّیَّتها علی النّار
(2) لَوْ لَا أَنَّ اللَّهَ تَعَالَى خَلَقَ أَمِيرَ الْمُؤْمِنِينَ لَمْ يَكُنْ لِفَاطِمَةَ كُفْوٌ عَلَى وَجْهِ الْأَرْضِ آدَمُ فَمَنْ دُونَهُ. (بحارالأنوار، ج۴٣، ص١٠٧)
مفضّل‌بن‌عمر از امام صادق علیه‌السلام روایت کرده که فرمود: اگر خداوند تعالى على علیه‌السلام را خلق نکرده بود کسى شایستگى همسرى فاطمه علیهاالسلام را نداشت.
(3)بیدا بمعنی صحراست
(4)اللمعة البیضا(انصاری)
(5) و قيل للنبي (ص) و قد علمتها مهر فاطمه في الارض فما مهرها في السماء؟ قال سل عما يعنيک ودع ما لا يعنيک، قيل: هذا مما يعنينا يا رسول الله قال: کان مهرها في السماء خمس الارض فمن مشي عليها بغضا لها و لولدها مشي عليها حراما الي ان تقوم الساعه)مناقب ج 3 ص 351 )
- دوشنبه
- 3
- تیر
- 1398
- ساعت
- 14:9
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه