ای مسجد و محرابین غوغاسی خداحافظ
سجادۀ ایمانین اعضاسی خداحافظ
واگیر :
حق دئدیم هر زمان ائتدیم اراده
حمد اولا داوره چاتدیم مراده
محراب عبادتدن کیم دویدی علی دویسون
سجادۀ طاعتدن کیم دویدی علی دویسون
تسبیح و دیانتدن کیم دویدی علی دویسون
تکبیر و مناجاتین بلواسی خداحافظ
بش گون بو فنا یرده کیم قالدی علی قالسین
دائم باشینا سایه کیم سالدی علی سالسین
کیم فتنه لی دنیادن کام آلدی علی آلسین
ای فتنه و نیرنگین شوراسی خداحافظ
تا گئتدی بو دنیادن عقبایه پیمبرده
ال اوزدی فنا یردن زهرای مطهرده
اسلام علمی یاتماز گر اولماسا حیدرده
دین و علم حقین سوداسی خدا حافظ
محراب عبادتدن ائتدیم سفرعقبایه
باشیمده یارا گئتدیم عقبایه بو معنایه
دنیا باشینا سالسین اسلام علمی سایه
اهل شرفین اولسون یاراسی خداحافظ
حق اوسته الیمدن کی حق اولدی رضا گئتدیم
پیغمبراعظم تک بی جرم و خطا گئتدیم
من محضر زهرایه باشیمده یارا گئتدیم
ای حیدر و زهرانین اعداسی خداحافظ
آچدیم که بامر حق دانشگه ایمانی
آج قالدیم اوزوم سالدیم تا سفرۀ احسانی
کیم دوز یئدی آخرده سیندیردی نمکدانی
ای فتنه لی دنیانین شیداسی خداحافظ
ای گوگده کی اولدوزلار سیز شاهد اولان باری
دست ستم ئولدوردی تا حیدر کراری
آفاقی بهم ویردی ظلم و ستم آثاری
حیدر دئدی ای صبرون دریاسی خداحافظ
صبر ایله قیزیم زینب گوز یاشووی قان ائتمه
ای نائبۀ زهرا فریاد و فغان ائتمه
تیر غمه صندوق اسراری نشان ائتمه
ای دشت غم افزانین زهراسی خداحافظ
بیر گون اولاجاق زینب مندن صورا دنیاده
طوفان سالاجاق دشمن دشت محن افزاده
قان آغلیاجاق حال غمبارووه زهراده
دیلدن دییه جاق دردون سیماسی خداحافظ
اخیامیدن آیریلجاق لیلا گوزونون نوری
سیمای دل آراسی مبهوت ائلیین حوری
لب تشنه شۀ عشقین دلبند سلحشوری
اکبر دییه جاق عشقین لیلاسی خداحافظ
لیلا گوزونون نوری گون مثلی شاخان یرده
گل سینۀ لیلایه عشق اوسته تاخان یرده
بیر سوز دییه جاق لیلا گوزیاشی آخان یرده
دشت غمون ای شبه طاهاسی خداحافظ
گئت اوغلوم علی جان گئت حق اوسته جدال ایله
بو ورطۀ طوفاندا خصمیله جدال ایله
طوی فکرینی آت باشدان بیر آیری مقال ایله
ای گلشنیمون سرو رعناسی خداحافظ
لیلانین اوغول سن سن شمع شب دیجوری
سلطان سرافرازین ای جاهد منصوری
استاد سلحشورین شاگرد سلحشوری
ای سینۀ لیلانین غوغاسی خداحافظ
شور اوسته یازار (مژده) شعر محن افزاسین
شاید چوخی اشعارین درک ائتمییه معناسین
همواره خطاب ایلر بزم ادب اعضاسین
ای انجمن شعرین اعضاسی خداحافظ
عمروم که باشا چاتدی گئتدیم بو فنا یردن
روحیم که عروج ائتدی بی ریب و ریا یردن
افلاکه اوجالدار سس کیم شور و نوا یردن
یار اولسا دیئر شعرین آواسی خداحافظ
- دوشنبه
- 3
- تیر
- 1398
- ساعت
- 14:19
- نوشته شده توسط
- ابوالفضل عابدی پور
- شاعر:
-
مژده اردبیلی
ارسال دیدگاه