ما خلقده بیر کسه یوخ بو سعادت یا علی
بیت حقده تاپمسان فیض ولادت یا علی
کعبه باغرین آچدی تا آغوشینه آلسین سنی
پاکلیقندان بو ئوزی ایلور حکایت یا علی
عزت الله ندی ویرمش عزتندن حق سنه
شهرتون دهری دوتوب ای پاک نیت یا علی
سائله بذل ایلین حین رکوع انگشترین
ادمین بیر ذره ده اکراه و منت یا علی
اوچ گونیله آج قالوب اما تعامین بذل ایدن
آبیله افطار ایدن ، پیر طریقت یا علی
جنگ لرده جان قویوب فتح الفتوحه ال تاپان
آرزوسنده اولان فیض شهادت یا علی
جسمنی اوخ ، نیزه ، شمشیر یاره سی شانشان ایدن
سخت لیقدان ادمین بیر جه شکایت یا علی
گوندوزی صائم گجه قائم ویرن عمرون باشا
ایلین نان و نمک دنده قناعت یا علی
ضربت شمشیری خندقده مدال افتخار
نیت پاکی اولان تاج شرافت یا علی
انس و جنین ضربتندن باش اولوب بیر ضربتین
کمسیه سندن صورا یوخ بو فضیلت یا علی
باب خیبر ثابت ایلور سن یدالله سن آقا
یوخسا آچسین خیبری وار کیمده قدرت یا علی
بسدی بو قرآن دیور پیغمبره جانسان آقا
بو مقام حقدن سنه اولموش کرامت یا علی
نقد جان الده پیمبر بسترینده یاتمسان
عرشین اهلین بو عملده دوتدی حیرت یا علی
مدحوی گویده ملک لر ایلسه آزدور اگر
یرده پیغمبر سنی ایلوبدی مدحت یا علی
معرفتده ، معدلتده یوخ گلن همتا سنه
سنله معنا اولدی لفظ آدمیت یا علی
روحی پرواز ایلین معراجه هنگام نماز
عرش حقده ایلین سیر و سیاحت یا علی
سن که معیار عمل سن قاسم نار و جنان
بغضی سوزان دوزخ ، حبی عین جنت یا علی
سن صراط المستقیم سن رهبر مردان حق
کیم سنه وابسته دور تاپموش هدایت یا علی
حزب شیطاندا دوروبدور کیم اولا دشمن سنه
شامل اولموش حالینه لفظ شقاوت یا علی
جام عشقوندن ایله سرمستم اصلا بولمورم
سر ندی ، عزت ندی ، نه شان و شوکت یا علی
همتون داغدان اوج ، شخصیتون داغدان آغیر
مرد ایثار و عمل کوه صلابت یا علی
حق سنی ایلوب اولوالامر امور مسلمین
ذات هودن بو سنه اولموش عنایت یا علی
ذوالفقارون تپراقا ابطال اعرابی یخوب
جنگ لردن هئچ سنه اولموب فراغت یا علی
عبد حق اولدون حقین فرمانینه ایتدین عمل
ایلدی هر چند لائم لر شمادت یا علی
پیر عرفانسان سنه عارف لر ایلور اقتدا
سنله تاپمیش آبرو عرفان نهایت یا علی
لفظ تقوی شرح اولور سنله تمام عالمه
جود و بخشش سندن اخذ ایلوب اصالت یا علی
زهد و تقواده نظیرون گورمیوبدی روزگار
دوتموسان عشق عالمی دنیایه سبقت یا علی
اولمادی دنیادن ئوتری قلبوه غم اگلشه
گورسنه یا یوزده آثار کدورت یا علی
آیهء نجوایه عامل رازدار مصطفی
عنده علم الکتاب اولموش عبارت یا علی
شعشعان تیغی دشمندن توانا سلب ایدن
ذوالفقاریندن اسن قوم ضلالت یا علی
لا فتی الا علی لا سیف الا ذوالفقار
ایلو ر اعلان ختم اولوب سنده شجاعت یا علی
قاچمادون دشمن قاباقندا نبرد سختده
احسن احسن سنده وار گور نه شهامت یا علی
تنگ دوتدی ناکثین و مارقین و قاسطین
فرقهء جهالدن گوردون اذیت یا علی
گوزده قوم حلقومده قالمش سوموک انسان کیمی
ایرمی بش ایل صبر ایدوب گوردون جسارت یا علی
آستانون یاندی زهرا صدمه گوردی ضربه دن
نه بهانیله اولوندی بو جنایت یا علی
فاطمه گیتدی شهیده محنتی قالدی سنه
همدمین اولدی ئولونجه دلده محنت یا علی
دوندروب دنیادن یوز دنیایه ویردین اوچ طلاق
کیمده واردور بو لیاقت بو درایت یا علی
نان و خرما الده گزدون کو به کوی کوفه نی
ایلدون ایتامه احسان لیل ظلمت یا علی
عدلوین قربانی اولدون ای عدالت اسوه سی
حیف اولا سنله عدالت ایتدی رحلت یا علی
مرگی پیشواز ابلدون آغوش بازیله آقا
مرگ ئوزی مفتوندی سنده وار نه هیبت یا علی
(فزت رب الکعبه صوتون سالدی دهره ولوله)
(نوش ایدوب جام شهادت مقصدون گلدی اله)
باشنه دگدی نماز اوستونده تیغ زهردار
آخدی محرابه قانی گیتدی الندن اختیار
باشینون قانی آخوب گل صورتین الوان ایدوب
قان شفقده مغرب عشقه چاتوب خورشید وار
آلننی قویدی ترابه سجدهء شکر ایلدی
کام دل آلدی شهادتدن او عادل شهریار
ذکر ایدوب فزت و رب الکعبه ذکرین بی دریغ
صفحهء تاریخه ثبت اولدی که قالسین یادگار
ناگهان گویده اوجالدی جبرئیلون ناله سی
سسلوب دور اولدی ارکان هدایت تار و مار
عروه"الوثقی قرلدی سولدی اولدوزلار هارای
مصطفانون ابن عمین ایلدی ظالم شکار
قانه باتدی مرتضی محو اولدی اعلام التقا
شاه دینون مه جمالون ایلدی قان استتار
کوفه اهلی جبرئیلون آلدی سوزان نوحه سین
مسجده یوز قویدی یاران و احبا دلفکار
مسجدین اوضاعی برهم اولدی منبر آغلادی
باشه تپراق سپدی ناله ایلدی خویش و تبار
مجتبی تا داخل اولدی مسجده صولدی یوزی
گوردی قانه غرق اولوب شیر خدا میر کبار
قان آخوب باشدان شفقده غرق اولوب گون چهره سی
قرمزی گل تک اولوب قرمز او یار گلعذار
ای فلک چرخین سنیدی نه حالا قالدی علی
اولمادی طاقت قیام ایتسین او شاه تاجدار
یوز گوزی قانلی نمازین اگلشوب ایتدی ادا
نقش اولوب لعل لبنده ذکر حی کردگار
بیر کلیمه بوکدولر باشی یارالی رهبری
حمل اولا بو نحویله بلکه او میر زخمدار
باب مسجد ده یره قویدی کمک لر حضرتی
باخدی بیر گوی سمتینه بیر جمله ایتدی انتشار
ای سحرلر عالمی روشن ایدن گون ، هئچ اولوب
قوزیوب باش مشرقندن سن اولاندا آشکار
گورموسن هئچ بستر ناز ایچره یاتسین مرتضی
لذت راز و نیازه دائم اولدوم بیقرار
گوردولر اول دم گتوردی مردم ابن ملجمی
محضر شه ده دایاندی اول لعین نابکار
شه بویوردی پیس امامیدوم سنه من ، ای شقی
ایلدون بو نوعی رفتار اولمادون هئچ شرمسار
امر ایدوب بیر یرده محبوس اولسون اول فرد پلید
قالسین ایمنده وجود نحسی حصر ایچره نزار
امر ایدوب حمل ایتدبلر شیر خدانی منزله
اهل بیتی گوردی اول مولانی اولدی اشکبار
عمروجه بسترده راحت استراحت ایتمین
بستر مرگ ایچره یاتدی تاپسن آرام و قرار
ای فلک گور نه بلایه مرتضانی سالمیسان
طاقتی یوخ گوز آچوب اطرافنه ایتسین نظار
گردشندن قالمادی بو چرخ گردون ، ای عجب
اولمادی بیلمم نده بس کون و امکان تار و مار
لنگر عالم دوشوب دلدن جهان پژمرده دی
ساز عالم بس نجه اولسون بو سازه سازگار
قزلاری ، اوغلانلاری اطرافین آلدی اول شهین
گوزلرینده گوز یاشی ، افسرده و دل پر شرار
بعضی آغلاری دیردی گوزلرون قربانیم
گوزلرون آچ بیر گوروم ای شهریار باوقار
بعضی سویلردی یارالی باشوه جانیم فدا
بولمورم بو یاره نین درمانینه امید وار
بعضی سی آلنین سیلردی بلکه بیرآچسین گوزون
اللریندن بوس ایدوب گوز یاشین ایلردی نثار
منزل اهلی ایوده آغلور ایلوری آه و فغان
شیعه لرده کوچه ده محنتدن ایلور آه و زار
گتدیلر بیر دکتر نصرانی گورسون یاره سین
منتظر اگلشدی اولاد امام برد بار
یاریه دقتله دکتر باخدی ، چکدی آه سرد
بیر باخوب اطرافه بیر شاهه عبوس و افتکار
عرض ایدوب شاها چتندور بیرده یردن دورماقین
زهر کین آثاری وار مغزنده پیر نامدار
بو یارانون یوخ مداواسی ، وصایاوی ایله
حشره جن یولداشدی بو یاره سنیله آزگار
قورتاروب دکتر سوزون گیتدی ، و لیکن اهل بیت
سس سسه ویردی سزلداشدی محندن یاندیلار
گوئیا گون منکسف اولدی پریشان ماخلق
اهل بیتین گوزلرینده عالم اولدی تیره تار
مرتضانون گیت به گیت رنگی سارالدی گل کیمی
گوزلر آخدی گل یوزونده ظاهر اولدی احتضار
گلدی بیر تر دوتدی آلنین آچدی مولا گوزلرین
ایلدی بیر بیر وصایاسین او کونه افتخار
قورتاروب سوز ، جان دوداقدان چخدی یومدی گوزلرین
فیض وصل دلبر محبوبنی اخذ ایتدی یار
یا علی قانلی گوزونله لطفو له قلسان نظر
آزدی گر کلک (هدایت) توکسه در شاهوار
- سه شنبه
- 4
- تیر
- 1398
- ساعت
- 9:31
- نوشته شده توسط
- ابوالفضل عابدی پور
- شاعر:
-
محمد هدایتی
ارسال دیدگاه