علی ولایتینی حق ایدوب اوزینه حصار
ولایت اهلی مقصّرده اولسا گورمز نار(1)
علیدی ساقی کوثر ، علیدی قاسم نار
علیدی مظهر حق دادخواه روز شمار
بهشت کیم ایشیدوبسن علی ولایتی دور
علی عداوتی دوزخدی بِئسَ دارُ قرار
خدا جهنّمی خلق ایلمزدی اهل زمین
گوی اهلی تک ایلسیدی ولایته اقرار
خلایقین عملین وزن ایده لّه محشرده
علی عمل لره میزاندی فاعل مختار(2)
بیری اگر ثقلینین عبادتین گتوره
گیدر جهیمه علی حقّین ایلسه انکار(3)
پیمبریله موحّد قبول ایدر توحید
علی محبّتی مؤمنلره اولوب معیار
علی علامت ایماندی میر اهل یقین
علیدور آینۀ حیّ قادر و غفّار
علی آدیندا ز بس روحیمون علاقه سی وار
بو آد باشینا دولانّام نقدر عمریم وار
فنا جهاندا علی آتمش اوچ ایل عمر ایلدی
بو آتمش اوچ ایلی گوردی اذیّت و آزار
نه زحمتیله عزیز عُمرینی باشا ویردی
دلیمده یوخدی توانا ایدیم تمام اظهار
گیچنده هجرت طاهادن اربعینَ سنه
اجل پیاله سی نوش ایتدی حیدر کرّار
ویرولّه بو خبری نسبت امّ کلثومه
چکوبدی نظمه «حسینی» مُنَظِّمُ الاخبار
دیر خانم که شب نوزدهّم رمضان
منه قوناقیدی شیر خدا شه ابرار
درست ایتدیم ایکی قرص جو بر آزدا نمک
علاوه بیر کاسا سود گَتدیم ایلسون افطار
آتان علینی دیدی گورموسن قیزیم تا حال
ایکی خورش ییه بر یرده ای حمیده شعار
بیرین گوتور بولارین ایسته دیم دوزی گوتورم
دیدی بو کاسۀ شیری گوتور قیزیم زینهار
علی لذیذ طعامی نه نوعی میل ایتسون
حسابینی چکه جاق کردگار یوم شمار
غرض امام ایکی لقمه طعام میل ایلدی
نماز باشلادی رکن صلوة امام کُبار
قیلوب نماز گهی صحن خانیه چخدی
نجومه ایلدی گه چشم حسرتیله نظار
باخوب گویه دیدی صَدَّقتَ یا رسول الله
نشان ویرور ئولوم آثاری ثابت و سیّار
دیدیم بابا نیه وحشتده سن نه وار بو گیجه
چوخ اضطرابده سن قیل غمون منه اشعار
بویوردی بو گیجه نی مصطفی ویروبدی خبر
طلوع صبحده وار چوخ مهمّ بر اسرار
دیوب بونی گینه اولدی عبادته مشغول
او قدر عبادت ایدوب صبحه قالدی بر مقدار
دوروب ایاقه آتام ایلدی وضو تجدید
خیال ایدوبدی گیده مسجده شه اطهار
اودم کمر قاپی قلّابه سنده بند اولدی
آچولدی بند کمر چکدی آه آتشبار
کمال وحشتیله شاهدین کمربندی
گوتوردی باغلادی لا حَول ایلدی تکرار
بویوردی باغلا علی ئولماقا بِیلون محکم
فراق باشه یتوبدور یاخوندی وصل نگار
واریدی بر نچه مرغابی صحن خانه آرا
اولاردا دامن مولایه وصل ایدوب منقار
زبانحالیله گویا دیردیلر گیتمه
اولوب قتالیوه آماده دشمن خونخوار
علینی کوفه ده قوی کربلاده اوغلونا باخ
وداع شاه شهیده عجب شباهتی وار
گیدیر جداله طرف کربلا غریبی حسین
او سرورین اتگیندن دوتور خانم بالالار
دیولّه گیتمه بابا بیکس اهل بیتوه باخ
سن ئولسن عترتیوی دستگیر ایدر اشرار
گیدن قیتموری هرگز بو قانلی میداندان
اماندی گیتمه گیدرسن سویار بیزی کفّار
گیچاق بو مطلبی منظور علی شهادتیدور
ابوالائمّه قضایاسین ایلیاخ تذکار
چخوب ولیّ خدا خاندان عزّتدن
اولوبدی مسجده میر انام راهسپار
او گیجه مسجد کوفه غریبه عالمیدی
او یرده جمعیدی یکسر مهاجر و انصار
بیری دعا بری قرآن تلاوت ایلردی
دیمه همان گیجه یاتمشدی بر نفر دیّار
نماز شب قیلان اللهّه کشف راز ایلین
نه حالدیدی اونا یوخدی طاقت گفتار
چادر قورولموشیدی اعتکاف ایدن واریدی
عبادت ایتماقا مشغولیدی تمام احرار
ــــــــــــــــ
(1) حب علی حسنه لا یضر معها سیئه
(2) السلام علی میزان الاعمال
(3) بغض علی سیئة لا ینفع معها حسنه
یازولّا قورموشیدی بر چادردا قُطّامه
اوزینی معتکفه ایلمشدی اول غدّار
او خیمه ده واریدی اوچ نفر زنازاده
اوچ اجنبی کیشی بر عورتین نه نسبتی وار
بیری او اوچ نفرین ظالم ابن ملجمیدی
ایکیسیده اونیلا هم قسم خبیث تبار
بو فکردیدیله شیر خدانی ئولدوره لر
قُطامه دن اولالار کامیاب وصل اشرار
قلجلارینی سُوارمشدی زهریله هر اوچی
که تک به تک ورالار کسمسه اگر بیری کار
قُطامه هر اوچونون صدرینه ایپک دستمال
او دمده باغلادی هم وئردی وعدۀ دیدار
فرید عصریدی قطّامه حُسن صورتده
اودور که عشقی مُرادیدن آلموشیدی قرار
بولار بویاندا علی قتلینه ایدوب اقدام
اویان طرفدن علی گلدی دلشکسته و زار
کمال شوقیله محراب طاعته گیچدی
یوزینی قبلیه دوندردی قبلةُ الاخیار
امام نافلۀ صبحه ایلینده شروع
آچلدی باب سماء گوتدی پرده نی ستّار
گویون ملک لرینه امر ایدوب یر اوسته باخون
گورون ولیّم ایدور جان نه رغبتیله نثار
علینی جذبۀ عشق خدا ایدوب مجذوب
شکسته قلبی اولوب حُبّ حقّیله سرشار
ویروبدی خاتمه اوچ رکنه رکن اصل صلوة
قویوبدی سجدیه باش قطب نقطۀ پرگار
قلج الینده مرادی کمین ایدوب ناگاه
خدادن ایتمدی شرم و حیا او کانِ نقار
ابوتراب باشین سجده دن گوتوردی ولی
قالیدی سجده ده ایکاش امام عرش وقار
او اَندیرور قلیجی مرتضی باشین گوتورور
تصادف ایلدی فرقسله تیغ کین ناچار
بُلوب عمامه نی باش پارچالاندی قان آخدی
ایدوب باشینان آخان قان محاسنین گلنار
هواده باشین آچوب جبرئیل سسلندی
او پُر اَسف سَسیله دولدی سر بسر اقطار
دیدی هدایتین ارکانی منهدم اولدی
بویاندی قانه نماز اوسته حیدر کرّار
ایشیتدی بو سَسی یکسر اهالی کوفه
توکولدی مسجده پژمرده دل کُبار و صغار
ایاق یالین باش آچوخ سر بسر مخدّره لر
قویوبلا مسجده یوز یوزده طرّه طرّار
علیحده خبریله یازولّا بعضی رُوات
همان گیجه که علی اولدی تیغ کینه دچار
کنار کوفه ده قرخ مین نفر قشون واریدی
جهاده ایتمیشیدی شاه لا فتی احضار
ایشیتدیلر بو سَسی مرتضی اولوب مقتول
ایدوبله نفسلرین نصرت ائتماقا وادار
توکولدی شهره او قرخ مین نفر النده قلج
قارشدی بیر بیرینه پا پیاده ایله سوار
قیامت اولدی قیام ایتدی شور رستاخیز
علی محبّلری اولدی جمله زار و فکار
دوتولدی گوش فلک بانگ وا علیّادن
چکلدی چرخ سپهر اوسته دود غمله غبار
علینون آلدیلا دور و برین بنی هاشم
گوروبله غصّه لیدور قلبی اولدولار غمخوار
یارالی باشین آلوب مجتبی دیزی اوسته
توکوب عذارینه گوز یاشینی چو ابر بهار
صحابه لر گتوروب بر کِلیم او ساعتده
اولوبلا رأفتیله شاه دینه خدمتکار
گِلیمه ائتدیله پیچیده حجّت اللهّی
بلی عزیزی اولان زخمدار اولماز خوار
گوتوردولر ایده لر حمل دودمانه طرف
یاخونلاشاندا خطاب ایتدی یا اولوالابصار
قویون یره ایویمه اوز ایاقیمیله گیدیم
منی بو حالتیله گورسه زینبیم قورخار
باشوندا یا علی بیر یاره وار رضا دگوسن
قیزون گوره سنی اول حالتیله زار و نزار
بلا چولونده سنون یا علی گوزوندن ایراق
گورنده قارداشینی قتلگهده زینب زار
یتشدی گوردی حسین قان ایچینده جان ویروری
قلج ووران اوخ آتان دسته دسته یاره وُرار
بدن یارالی قوری یر گون ایستی تشنه جگر
گینه او حالیله رحم ایتموری وُرور کفّار
بویوردی وُورمیون ای اهل کوفه رحم ایلیون
یارالیدور گوروسوز چشمه چشمه قانی آخار
سوسوزدی ضعف ایلیوب باری بر ایچیم سو ویرون
او قانلی گوزلریله گورموسوز فراته باخار
حسین مصیبتی تقریریله تمام اولماز
دایان بو یرده سوزون «سعدی زمان» قورتار
- سه شنبه
- 4
- تیر
- 1398
- ساعت
- 9:33
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه