چون قلجلاندی باشیندان سجده ده شاه ولایت
دجله ی خون اولدی دولدی قانلا محراب عبادت
ائتمدی شرم و حیا شیر خدادن ابن ملجم
توکدی خون مرتضانی یاسه باتدی کلّ عالم
قدسیان باش آچدی یکسر ائتدی لرزه عرش اعظم
دوتدی غم آفاقی گورسندی قیامتدن علامت
آخدی باشدان چشمه چشمه قانی سلب اولدی قواسی
آق محاسن قانه باتدی دولدی چشم حق نماسی
جبرئیلون گوردولر دولدوردی آفاقی صداسی
مُنهدم اولدی بوگون واللهی ارکان هدایت
بو صدا تا یتدی سمع زینب علیا جنابه
گئتدی الدن اختیاری دوشدی قلبی اضطرابه
یوز وئروب بیر اوزگه حال اول بانوی عصمت مآبه
آشکار اولدی گوزونده حشر و آثار قیامت
درک ائدوب فوراً او غمدیده حضور مجتبانی
گوزلرینده اشک محنت دلده فریاد و فغانی
عرض ائدوب قارداش نه سسدور دولدوروب یکسر جهانی
سس گلور قُتل الامیرالمؤمنین ساعت به ساعت
چیخدیلار ائودن قویوب یوز مسجده هر ایکی قارداش
دل پریشان سینه سوزان قلبیده غم گوزده قانیاش
هربیری تک تک دیردی بیز ئولیدوق بابا ایکاش
وای بیزه قالدوخ آتاسیز کیم بیزه ایلر حمایت
تاباشی اوسته یتیشدی هرایکی نور دوعینی
مجتبی بو حالی گورجک عرشه چیخدی شور و شینی
گئتدی الدن اختیاری آغلادی یاندی حسینی
گوردولر زخم سری شقّ القمر ایلر حکایت
قان آخوب ازبس باشیندان دولدوروبدور چشم نازین
یاره مهلک گوز آچانمور کشف ائده تا دلده رازین
باش قالوبدور سجده گهده یوخ یغان بیر جانمازین
طاقتین دلدن آلوبدور باشداکی کاری جراحت
گریز
گوردولر اکبر نه اکبر دوغرانوبدور شرحه شرحه
تیغ و خنجر نقش جسمین دوندروبدور اوزگه طرحه
بوندان آرتوق دلده یارب یوخ توان توضیح و شرحه
بو بیان تاب فرسا قویمیوبدور منده طاقت
نعشینین آلدی کنارین آل عصمت آچدیلار باش
باجی عمه باشی اوسته درّ اشگین ائتدی شاباش
آل پیغمبر توکوبلر نعشی اوسته بسکه قانیاش
بار درد و غصه دن خم اولدی هر بیر سرو قامت
ای شهنشاه دو گیتی ای هامی عالم پناهی
یوخدی« #عاصینون»بولورسن غیر سن امّیدگاهی
ساخلا دربارونده شاها بو غلام روسیاهی
اولما راضی اوزگه کیمسه ایلین طعن و شماتت
- سه شنبه
- 4
- تیر
- 1398
- ساعت
- 12:15
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه