حیدرین شهرتی حیرتده قویوب افلاکی
ئوزی سلطان سلاطین اولوب، اما خاکی
هدفی عدلیدی افکاری سعادتمندی
سرگذشتینده اولان حقدی عدالت پاکی
مصطفی شهر علومیدی علی دروازه
مرتضی شرحینه بسدور بو سوزون ادراکی
شهریاریدی ،خلافتده گئیوب کهنه عبا
نه اولوب قصری نه ارثیه قالوب املاکی
پاره نعلینی خلافتله عو‌ض ائتمزدی
بئله اندیشه اولار روح علی دن حاکی
امتين حق و حقوقين تانيان بير رهبر
گئجه آج یاتسادا ، ناحقدن ائدر امساکی
حقّی وار حیدر اگر مجمع اضداد اولسا
بو سؤزون مشکل اولار جاهله استدراکی
مرتضی عالمه تدریس عدالت ائلیوب
آنلیان ائتدی عمل ، آنلامیان هتاکی
پست اولان فطرت، علی معرفتین درک ائله مز
اوجا داغلاردا دوشر صیحه لرین پژواکی
آدیوی شیعه اگر قویسون علی گونه یاشا
مُهریلن آلنیوی هر گون ائله مه حکاکی
مرتضی حقینه اولده عمر شک ائلیوب
بیز اولدن اودی لعنت ائدروک شکاکی
ایکی بیتیله قویون حیدری تعریف ائلییم
سیلیم آئینه ی طبعیمده اولان خاشاکی
جنگ خیبرده سوروشسیدون اگر مرحبدن
عرصه ی رزمیده گوردون نئجه بو چالاکی؟
بونا شک ائتمه دییردی اسداللهه قسم
گوره بیلمز بشریت بئله بیر بی باکی
شکوه ائتمزدی علی کوفه لی لردن ، اما
اولدی آیا نیه بیر کوفه علی دن شاکی؟
نئینه میشدی مگر الله الی ، خلق اللهه
امّتی بیلدی روا فاجعه ی غمناکی
دینیدن ، ذکری فقط درک ائلیین مومن لر
عاقبت ائیله دیلر ، نیت وحشتناکی
اولدی بیرگون غلط افکاریله دهر آلوده
ابن ملجم ده ائدوب تیغینی زهر آلوده
روحیلن جسمین علی سجده ده همراز ائله دی
"سمع الله لمن" حمدینی ابراز ائله دی
صحن محرابیده ، اظهار عبودیتده
مطلع نوره ئورگ روزه نه سین باز ائله دی
سجدیه دوشدی قیامت ائلیین قامتلن
یورولان روحینی اورادیله دمساز ائله دی
ذکری قورتاردی سجودینده ولی صبر ائلییوب
انتظارینده قالوب قاتلینه ناز ائله دی
مسجدین منبری احسن دئدی سراللهه
ائشیدنلر ائشیدوب، بیلمیه نه راز ائله دی
دسته دسته ملکوت اهلی تراب اوسته انوب
هره بیر گوشه ده ئوز مسندین احراز ائله دی
حیدرین جسمی هله غرقیدی تکلیفینده
جان ئوزون محضر جانانه ده جانباز ائله دی
عبد شیطانیدی قاتل . آدی عبدالرحمان
ئوزون ئوز جهلینه آخرده ، سبب ساز ائله دی
بیلدی واله دی نمازینده ، امیرالامرا
صف وحدت داغیلوب حمله نی سرباز ائله دی
چکدی بیر زهریلی شمشیری عبا آلتیننان
قصد قربت ائلییوب نیتین آغاز ائله دی
ایکی اللی یاپیشوب قبضه ی شمشیریندن
مسجدی مقتل سلطان سرافراز ائله دی
ووردی بیر ضربه ائله غیضیله حیدر باشینا
وحشته دوشدی ملکلر ، هامی پرواز ائله دی
هامی قالخوردی ایاق اوسته ، علی دوشدی یئره
هاتف غیبی بو مرثیه نی آواز ائله دی
دئدی محراب عبادتده سعادت تاپدون
سن کیمین عاشقی باش یاره سی ممتاز ائله دی
جبرئیلین اوجالوب" قتل العلی" ناله لری
اوتوز ایل ختم نبی دن سورا اعجاز ائله دی
ایسته دی حکمت مکتومیله حکم ازلی
گئده ئوز منزلینه کهنه گلیم اوسته علی
کیم دییردی بو قدر چرخ فلک تار اولاجاق
ابوالایتامیله دشمن کیمی رفتار اولاجاق
کیم بیلردی قالاجاق بیر گونه مسجدده علی
یوزی اوسته یخیلوب ، دورماقی دشوار اولاجاق
ئوز خیالینده ده حتی دیه بیلمزدی فلک
سجده اوسته اسداللهیله پیکار اولاجاق
هئچ کیم عالمده اینانمازدی او قدرتده علی
بئله بیر محنته دنیاده گرفتار اولاجاق
کیم دییردی ائوینه اللرین اوستونده گئدن
فتح خیبر ائلیین حیدر کرار اولاجاق
ایاق اوسته دایانا بیلمه سه دلخسته امام
آپاران منزلینه بیر نئچه انصار اولاجاق
هانسی شاهین باشین ئوز ملتی منشق ائله سه
بئله بیر مملکته ، حشره کیمین عار اولاجاق
بیلن اوضاعی خبر وئردی غرض بیلمیه نه
روز محشردی کانه هامی بیدار اولاجاق
گلن آغلور گئدن آغلور ، اولور آماده عزا
روضه ی عدنیده زهراده عزادار اولاجاق
نوحه خوان اولسا حسین، آغلیانی اولسا حسن
گورون آیا نئجه بیر حالدا علمدار اولاجاق؟
مرتضانین یئری وار دردینه عالم یانسین
قئزلارینان هله بوننان بئله دیدار اولاجاق
او گون ابنات یداللهه قیامت گونودی
او قیامت کی چتین دهریده تکرار اولاجاق
گوره سن زهر اثری، حیدری بیحال ائله سه
زینب آیا نئجه گوز یاشلی پرستار اولاجاق؟
آناسینان صورا گولمگ اونا اولموشدی حرام
آتا دردینده دوباره نیه آزار اولاجاق؟
بابا وای ناله سی شاید هله تئز دور دئییله
کیم فغان ائتسه بهانه در و دیوار اولاجاق
فاطمه مرثیه سی حیدریده آغلاداجاق
هامونون نوحه سی معلومیدی مسمار اولاجاق
عالم عشقی #امانی قلمون سیر ائله سه
درک اولان معرفتین حاصلی ، اشعار اولاجاق
- سه شنبه
- 4
- تیر
- 1398
- ساعت
- 12:31
- نوشته شده توسط
- ابوالفضل عابدی پور
- شاعر:
-
علیرضا امانی مجد
ارسال دیدگاه