دگدی شمشیر جفا سجده ده حیدر باشینا
سالدی محنتله قرا آل پیمبر باشینا
قطبِ عالم یارالاندی چخوب افلاکه فغان
آخدی سو مثلی مبارک یوزونه قرمزی قان
باش آچوب گلدی حسینیله حسن ناله کنان
گوردیلر یاره وروب زهریلی خنجر باشینا
گتدیلر الغرض اول شاهی ائوه زحمتیلن
بسترده اوزادوبلار اونی چوخ عُسرتیلن
ساغ طرفده حسن و صولدا حسین محنتیلن
جمع اولوبلار هاموسی حیدر صفدر باشینا
ال آتوب زینب او اثناده آچوبدور باشینی
ایلدی آهیله رخساره روان گوز یاشینی
صونرا ایلوبدی مخاطب او خانم قارداشینی
نه گلوبدور آتامین سویله برادر باشینا
زینبه وئردی جواب حضرت شاه شهدا
ابن ملجم بیزی ائتدی باجی جان غرق نوا
سجده حالینده او ملعون آتاما ائتدی جفا
اندیروب قدرت سرشاریله خنجر باشینا
شدّت یاره او شاهه ائلیوب بسکی اثر
حضرت میر عرب شاه عجم فخر بشر
قانلی گوزلرله قیلار گه صولا گه ساغه نظر
گوردی کی جمعیدی اصحاب پیمبر باشینا
کاش اولیدیلار اولار کرب و بلاده او زمان
اوندا کی دوشموشیدی مقتله سلطان جهان
باشدا اون یدی یارا پیکرینون قانی روان
یغیلوب الده قلج لشکر کافر باشینا
نیزه لر الده عرب طائفه سی لشگریلن
آلدیلار دوره سینی شمر جفا پروریلن
کیمی داشلان کیمی نیزیله کیمی خنجریلن
سالدیلار قاره او گون زینب مضطر باشینا
سینه سینده آتی اویناتدی جفائله سپاه
آتلارون نعلی ائدوب نعش شهنشاهی تباه
#ذاکرینده اوره گین پارچالادی سوزش آه
گتدیلر گور نه بلالر تن بی سر باشینا
- سه شنبه
- 4
- تیر
- 1398
- ساعت
- 14:16
- نوشته شده توسط
- ابوالفضل عابدی پور
ارسال دیدگاه