آه و افسوس داخی صوت جلی گلمیه جاق
بو گیجه بانگِ مناجات علی گلمیه جاق
گون باتوب غالب اولان وقتده تاریکی شب
گجه نی صبحه کیمی زار و پریشان یارب
قالاجاقدی قاپودا چشم یتیمان عرب
باخاجاقلار ولی غمخوارلری گلمیه جاق
او پناهسیزلارون احوالی جگر داغلیه جاق
هَرَه سی سیل سرشکین یوزونه باغلیه جاق
قاپیه گوز تیکه جاق حسرتیله آغلیه جاق
مونس و یار و پرستارلری گلمیه جاق
دِیه جاقلار که گوزوندن بیزی سالمازدی بِله
رهرو عشق دی بیهوده دایانمازدی بِله
او محبّت لر آتاسیدی یوبانمازدی بِله
یوخسا وار باشدا قضا و قَدَری گلمیه جاق
نه فقط بو گجه بو محنته احباب آغلار
گویون اولدوزلارینون حالینه مهتاب آغلار
مسجد کوفه نین احوالینه محراب آغلار
سالوب آفاقه قیامت شرری گلمیه جاق
بینوالر یوزه اشکین اَلَر آغلار بو گیجه
کیم آدامسیزلارا بس باش چکوب آغلار بو گیجه
آهو تک خردا اوشاقلار مَه لر آغلار بو گیجه
داخی اول یار وفادارلری گلمیه جاق
نصف شب کوچه لرون نور و ضیاسیدی علی
هامّی نون درده دوشن وقته دواسیدی علی
یار یازیخلار ایوینون نور و صفاسیدی علی
باغ و بستانِ مروّت ثمری گلمیه جاق
چوخلاری بو گیجه غرقاب فراقه باتاجاق
اشک حسرتلرینی خونِ دِلیله قاتاجاق
کوفه ده چوخلی یتیم لر بو گیجه آج یاتاجاق
حیف اولا یارِ وفادارلری گلمیه جاق
دیمورم گوهر گنجینۀ ایمان گِتدی
دیمورم پیکر تقواده اولان جان گِتدی
مرتضی بو گیجه زهراسینه مهمان گِتدی
ترک ایدوب کوثر خیر البشری گلمیه جاق
زینب آغلار دِیر ای اسوۀ ایمان بابا وای
مشعل محفل تاریک یتیمان بابا وای
سنه نه گلدی بِلَه دوشدون ایاقدان بابا وای
یوخسا گل جسمه طراوت اثری گلمیه جاق
آنام اولسیدی بو عمده سینه داغلاردی بابا
بو مصیبتده دویونجا سنه آغیاردی بابا
دیندیروب مین دیلیله یاره وی باغلاردی بابا
حیف اولا گنج رسالت اثری گلمیه جاق
یوخ سوزوم نوح و مسیحا بو گیجه آغلیاجاق
هاجر و مریم و سارا سینه سین داغلیاجاق
ولی زهرا یاراسین مین دیلیله باغلیاجاق
داخی اول فَرقه جراحت اثری گلمیه جاق
- چهارشنبه
- 5
- تیر
- 1398
- ساعت
- 10:52
- نوشته شده توسط
- ابوالفضل عابدی پور
- شاعر:
-
حمید زرّین قلم
ارسال دیدگاه