ای صاحب کرامت و ای معدن سخا
ای اسوۀ نجابت و ای مظهر وفا
.
ای عزت و جلالی قویان مات عالمی
ای گلشن ولایت و دینه ویرن صفا
.
ای آسمان عصمته بیر اختر منیر
گنجینۀ حیاده اولان درّ پر بها
.
ای آب و خاک و ملت ایرانه آبرو
شاملدی لطف و فضلیوه بو کشور ولا
.
ای صحن باصفاسی سالان عالمه شفق
عشق اهلینه او یردی یقین جنت العلا
.
ای حضرت رضایه اولان مهربان باجی
قیل بیزلره کرم اولا جانلار سنه فدا
.
سن بیر کریمه سن بونی دنیا بیلور خانم
سن تک وجودی بیزلره لطف ایلیوب خدا
.
معصومه سن ذکیه سن ای مفخر جهان
زهرا آناندی حضرت طاهایه دلربا
.
قم شهرینی مزیّن ایدوب صحن و گنبدین
فخر ایلوری بو صحن و سرایه شه و گدا
.
بیر نوریده دیار خراسانیدن شاخیر
صاحب همان اونوره سنون قارداشون رضا
.
سیز باجی قارداشی بیزه نعمت ویروب خدا
بو آب و خاکیدن اودی کی رد اولور بلا
.
کیم دوشسه مشکله سیزه دلدن دخیل اولار
فورا گلوب سیزون قاپوزا اخذ ایدر دوا
.
هر کس گلوب او درگهه نومید اولمیوب
چون آدلانوب جهاندا آدوز منبع عطا
.
چوخ دردمند آچوبدی قاپوزدا دوایه ال
درمانینی عطا ائلیوب ویرمیسوز شفا
.
واردور بیزیمده دردیمیز ای عالمه طبیب
درمانه چاتماقا ایدیروق روز و شب دعا
.
عاشقلرون اورکده بودور دردی دایماً
ایستور گله زیارتیوه دلده آه و وا
.
اوندان صورا دیار خراسانی قصد ایدوب
قارداشیوون مزارینه حسرتله یول سالا
.
اوردا خلوص قلبیله ایلوب زیارتی
شهدن برات آلوب اولا زوّار کربلا
.
گریز به مصیبت
.
درد فراق سالدی سنی رنج و محنته
هرگز تاپیلمادی او چتین دردیوه دوا
.
گاهی آتا غمینده یانوب سینه داغلادون
حسرت قالوب جهاندا گوزون گاهی قارداشا
.
قارداشیوین فراقینه تاب ایلیینمدون
ترک ایلدون مدینه نی سن دلده یا اخا
.
بیر غملی نامه سینه ده گوزلرده اشگ غم
حسرتله عرض توسه طرف دوشموسن یولا
.
الله بیلور نه نوعیله گلدون او یولاری
آمالیوه سنی چاتاسان قویمادی قضا
.
قارداشیوین زیارتینه نایل اولمادون
چونکی اجل گلوب یتیروب عمریوی باشا
.
اولدی سنون یاتان یرون آخر دیار قم
تاپدی شرف همان یر اولوب روضه الصفا
.
اما واریمدی بیر باجیداندا حکایتیم
گلمز ولی اورکده اونون غملری سانا
.
کیمدور بو مهربان باجی من ایلیوم بیان
زینب عزیز فاطمه دلبند مرتضا
.
دوزدور سنه بو دهریده چوخ درد و غم یتوب
اما سنون غمون هارا زینب غمی هارا
.
قتلگاه
.
چیخدی خیامیدن آلا قارداش سراغینی
اوز قویدی قتلگاهه طرف دلده وا اخا
.
تلی اننده گوزلری دوشدی چوخور یره
گوردی هجوم ایدور او یره قوم اشقیا
.
بیلدی یقین کی قارداشینی کوفیان یخوب
جرات تاپوب ایدوله اونا ظلم ناروا
.
سسلندی ای خدا اوزون اول یار زینبه
بلکه بو قانلی معرکه ده قارداشون تاپا
.
فورا باشیندا معجرینی محکم ایلدی
میدانی قصد ایدوب الی باشدا قاچا قاچا
.
اندوقجا تلی سسلوری قارداش هایانداسان
سس ویر منه بو عرصه ده جانیم سنه فدا
.
بیر نحویله اوزون یتیروب قانلی مقتله
گوردی یخیبلا قارداشینی قانلی توپراقا
.
بولمم نه منظره گوزونه دگدی اول زمان
فریاد ایدوب اوجا سسیله وا محمدا
.
گلمز دیلیم او منظره نی شرح ایدم تمام
یازسام گرگ الیمده کی دفتر قلم یانا
.
زینب سسی اودم کی یتوب شه قولاقینه
چوخ زحمتیله آچدی گوزون فخر اولیا
.
گوردی رشیده باجیسین اول گیروداریده
اشرار کوفه دن ایله مور ذره جه ابا
.
شمریله روبرو دایانوب قتلگاهیده
غیظیله سسلنور دایان ای زاده خطا
.
قوی خنجرین غلافه اماندور حیا ایله
معناده باش آچوبدی آنام خیره النسا
.
ظالم اوتان مگر تانیمورسان حسینی سن
تاپشیرمیوب مگر سیزه پیغمبر خدا
.
زهرا آنام یاخوندی گله قانلی مقتله
یاندیرما قلبینی ایلمه بیر بیله جفا
.
گوزلور یولون حرملری میدانه گوز تیکوب
ال ویرما بو خطایه خدادن ایله حیا
.
بو گفتگوده گلدی دیله شاه مشرقین
فرمایش ایتدی ای غم و آلامه مبتلا
.
زینب قییت خیامه باخیر قیزلاریم یولا
قویما خییمده اهل حرم ناگران اولا
.
کم کم گیدور غروبه چاتا عمریمون گونی
آمالینه یاخیندی یته دشمن دغا
.
من عازمم دیار بقایه بوگون باجی
سنده گوتور بالالاریمی شامه دوش یولا
.
رزاقی یوز قویوبدی بو درگاه اقدسه
ایستور اورکده حاجتی تا کی روا اولا
.
آغلار گوزیله صبح و مسا ایلور التجا
تا بیر برات آلوب اولا زوار کربلا
.
- یکشنبه
- 23
- تیر
- 1398
- ساعت
- 11:2
- نوشته شده توسط
- ابوالفضل عابدی پور
- شاعر:
-
ستار رزاقی
ارسال دیدگاه