خیال صفحه سینه هر زمان حرم چکورم
ملک لری در و دربارینه خدم چکورم
.
اورک گویرچینی چون اورگشوب حرمده اوچا
زیارت حسرتینی چکمینده غم چکورم
.
گوزل مناره لرین شأنی تک اوجا گورورم
اودور چمنده ده هر سروی قدّی خم چکورم
.
شاخاندا گنبدینه گون، باخاندا گوز قاماشیر
او گنبدین باشینا بیر یاشیل علم چکورم
.
ضریحیدن اوجالور نور، طور سینا تک
کلیم عشقیله زواری همقدم چکورم
.
بهشتیدن گتوروبلر مگر بو عطرلری
کی عطریلی حرمی تالی ارم چکورم
.
بهشته وئرمرم الله بیلور رضا حرمین
او شاهین عشقینه من جنته قلم چکورم
.
مدینه دن بیزیم ایرانه چوخ صفا گتوروب
باخوب جلالینه سلطان محتشم چکورم
.
گرک چکم یولی اوستونده شاهلاری یولچی
کریمدور کرمی چوخدی ذوالکرم چکورم
.
اوزیمی اؤو گورورم اؤوچینون الینده اسیر
بو دامیدن قوتارام نقشه دمبدم چکورم
.
ائشیتموشم بو آقا اؤولارا اولور ضامن
اودور امیدیله بیر شخص محترم چکورم
.
اوزومدن ایستیورم مشهده سالام بیر یول
اگر چه فاصله سیزدی من اون قدم چکورم
.
زیارت ایلیورم بو اونومجی معصومی
بو عکسیده قاپیا حلقه نی ئوپم چکورم
.
دوروب ادبله الیم سینه ده سلام ائدورم
اورکده آه چکوب، گوزلریمی نم چکورم
.
خیالی زائر اولور مشهدالرضایه «بشیر»
خیال دفترینه هر زمان حرم چکورم
.
- دوشنبه
- 24
- تیر
- 1398
- ساعت
- 14:39
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه