یتیشدی مصدر لاریب دن خلیله ندا
منیم یولومدا اوز اوغلون مناده ایله فدا
.
گتوردی کوه منایه خلیل قربانی
او دم ایدوب اونا مکشوف سر پنهانی
.
بویوردی حضرت معبودیدن یتوب فرمان
طریق عشقیده من ایلیم سنی قربان
.
بو امر امر خدادور گرک ائدم اقدام
وصیتین وار ائله ایلیوم بو امری تمام
.
بو امتحان خدادور یتوب بو امره ندا
اؤز اوغلوون باشینی اؤز الونله ایله جدا
.
ویروب جواب ذبیح الله:« ای خلیل الله
کسنده باشیمی ائتمه منی یوزیمه نگاه
.
یوزیمی تُپراقا قوی ای عزیز هر دو جهان
که تُپراق اوسته کسنده قبول اولار قربان
.
که بیرده باخما یوزیمه محبت ایلر جوش
گلنده جوشه ایدر فیض آتشین خاموش
.
و بیرده باغلاگیلن ال ایاقیمی محکم
که جان ویرن بلوسن ال ایاق چالار پی هم
.
کسنده باشیمی چونکه روان اولار چوخ قان
مباد ال ایاقین قانیله اولا الوان»
.
ایدوب وصیتینی چون ذبیح اولوب خاموش
ملائکین سماواته دوشدی جوش و خروش
.
توکوب ملائکه لر سیل وار گوز یاشینی
گورنده ایستوری کسسون آتا اوغول باشینی
.
نقدری چکدی پیچاق کسمدی اولوب دلتنگ
ووراندا غیظیله سنگه دو نیم اولوبدور سنگ
.
گوروب کسر داشی قالدی بو امریده مبهوت
خطاب ایدوب پیچاقا بس ندور بو صبر و سکوت
.
امین وحیه یتوبدور ندای ربّانی
یتور خلیلیمه فی الفور سن او قربانی
.
دئ اوغلووین عوضینده اونی فدا ایله
مناده کسماقا قربانی سن بنا ایله
.
اوغول فدا ایلماق یوخ سنون صحیفنده
اوغول فداسی یازیلمیش حسین شأنینده
.
گر ایسته سن یته سن سن بو فیض عظمایه
حسین گلشنینه گئت گیلن تماشایه
.
منای عشقی ائدوب گور نه نوعی گلناری
که هر طرفدن اولور چشمه چشمه قان جاری
.
باخاندا کربُ بلا سمتینه خلیل الله
منای عشقیده گوردی دوشوب ذبیح الله
.
بدن یارالی یر ایستی گون ایستی قان آخوری
دگوبدی بیر بیره عالم حرملری باخوری
.
او قانلی معرکده بیر غریبه حالتدور
ووروبلا خیمه لره اود عجب قیامتدور
.
دوتاندا اود آلیشاندا یانان زمان خرگاه
ایاق یالین داغیلوب کوهساره آل الله
.
#ذلیل بسدی دایان اولدی قلبلر بی تاب
که #عید دور یازاجاقسان بو غمده آیری کتاب
- یکشنبه
- 30
- تیر
- 1398
- ساعت
- 11:16
- نوشته شده توسط
- ابوالفضل عابدی پور
- شاعر:
-
مرحوم ذلیل تبریزی
ارسال دیدگاه