ای جماعت بُلموسوز من شیر یزدان اوغلیام
فارس میدان هیجا شاه مردان اوغلیام
.
.
نور حقّه ظلمت باطل بو گون اولماز حجاب
مصطفی جدیم آنام زهرا آتامدور بوتراب
قالماسین جای بهانه سیزلره روز حساب
حامیِ دینِ محمد بابِ قران اوغلیام
.
.
سینۀ زهرای اطهردن چیخان گوهر منم
محضر استاد اهل عشقه سر دفتر منم
مخزن علم لدنّی عالمه رهبر منم
مرشد و پیر طریقت کنز عرفان اوغلیام
.
.
ایلدی اتمام حجت چون امام اوغلی امام
حمله ایتدی لشکره چیخدی غلافیندن حسام
عرصه نی ترک ایلدی اعدایه سویلردی مدام
ایمدی شمشیریم دیر من شیر یزدان اوغلیام
.
.
گوردی تأثیر ایتمدی اعدایه متقن سوزلری
کوره آندیرماق دگل ممکن گونی گوندوزلری
گلدی غیظه شیر یزدان تک قیزاردی گوزلری
سویلدی بلدورّم ایمدی دینه برهان اوغلیام
.
.
قاچمیون روباه تک، ئولدورموسوز فرزندیمی
دوغرویوبسوز بند بندیندن منیم دلبندیمی
سالموسوز تپراقلار اوسته آی گونه مانندیمی
انتقامین آلّام ایمدی عدل و میزان اوغلیام
.
.
هر بلا فرمانی گلسه آلّام امضا ایلرم
نقد جانی تیر و پیکانیله سودا ایلرم
خون اعدائیله بو صحرانی دریا ایلرم
بُلمیَنلر تا بُله من مرد میدان اوغلیام
.
.
گتدیم اوغلوم اکبری قربان منا صحراسینه
کشتی جسمیم دوشر بو چولده قان دریاسینه
نیزه ده باشیم گیدر موسی کیمی سیناسینه
وارث نوح و خلیل الله و عمران اوغلیام
.
.
هر طرفده اوستومه گر یاغسا بارانِ خدنگ
یاره لردن پیکریمده گُللر آچسا رنگ رنگ
نوش جانیمدور اگر پیمانیمه دولسا شرنگ
وافیِ روز الستم عهد و پیمان اوغلیام
.
.
ظاهراً ایتدوز منی آب زلالین تشنه سی
باطناً اما منم جام وصالین تشنه سی
آز قالوب سیراب اولا بو ماه و سالین تشنه سی
میر آب کوثرین لب تشنه قربان اوغلیام
.
.
من «کلامی» شهرتم واردور کلامیمده ثمن
رشتۀ نظمه دوزولموش گوهر آسا مقترن
یازمیشام بو نوحه نی بُلسونله ارباب سخن
خادمِ آلِ علی مردِ سخندان اوغلیام
.
- دوشنبه
- 31
- تیر
- 1398
- ساعت
- 13:21
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه