گل زینبوین حالی پریشاندی حسینیم
جان اوسته ایشی ناله و افغاندی حسینیم
نالاندی حسینیم
.
.
اسراریمی هئچ کیمسه یوخوم ایلیم اظهار
سینم یانور اؤز آهیمیلن ای شه ابرار
ائتدی بو فلک زینبی مین درده گرفتار
مین درد و محن سینه ده پنهاندی حسینیم
.
.
حسرت، یولوا گؤز تیکوب ای شاه شهیدان
گل بو دم آخرده ائله دردینه درمان
غربتده ئوزی توپراقین اوستونده وئرور جان
اللر سینه ده گؤزلری گریاندی حسینیم
.
.
اسدی گئجه گوندوز باشیما صرصر کینه
تنگ اولدی جهان زینب مغموم و حزینه
نه کرببلا مسکنیم اولدی نه مدینه
غربتده غریبانه باجون یاندی حسینیم
.
.
پیراهنوی ساخلامیشام سینه ده قارداش
عطرون آلارام هی توکرم صورته قانیاش
سنده سالاسان یاده بو غمدیده نی ای کاش
گؤرسم سنی جان وئرمگیم آساندی حسینیم
.
.
جانیم یئتیشوبدی دوداقا ای گل طاها
غربتده منی قویما قالام مضطر و تنها
گل گؤزلریمی باغلا حسین جان سن زهرا
باش چئکمگ آدامسیزلارا احساندی حسینیم
.
.
زینب ئوزونه اشک مصیبت آخار آغلار
عالم اورگین یاندیرار آهی یاخار آغلار
حسرتله گؤزی یوللارا قارداش باخار آغلار
گؤزلردن آخان اشک دئمه قاندی حسینیم
.
.
گل باشیمون اوسته دئ بو غرق محن اولدی
دنیا بویی دنیاده مصیبت چئکن ئولدی
قارداشلاری بیر گونده الیندن گئدن ئولدی
هانسی باجی زینب کیمی نالاندی حسینیم
.
.
چوخ آغلامیشام ایندی ولی آغلیانیم یوخ
غربتده ئولن وقتده اورک داغلیانیم یوخ
قارداش ئولورم شامیده گؤز باغلیانیم یوخ
دیدار رخون دردریمه درماندی حسینیم
.
.
«غمکشدی» غمیمده یانان ای سرور ممتاز
سال سایه اونوندا باشینا ایله سرافراز
درگاهوه نوکر بو قوجا نوکریده یاز
دائم ئوزونه گؤزیاشی افشاندی حسینیم
- دوشنبه
- 31
- تیر
- 1398
- ساعت
- 13:31
- نوشته شده توسط
- ابوالفضل عابدی پور
ارسال دیدگاه