یاندی اورگیم سینه ده اودلاندی الهی
امداده گلن یوخدی، جگر یاندی الهی
.
عَموم کیمی قاتل منه ئوز همسریم اولدی
دشمن ئوز ایویمده منه ئوز دلبریم اولدی
نالان بو مصیبتده گینه مادریم اولدی
نالَم بو گجه گویلره قوزاندی الهی
.
اؤلدوردی منی،دختر مأمون خطاکار
آغلار منیم احوالیمه گویلرده کی قوشلار
شاهددی ئورک سوزلریمه بو در و دیوار
احوالیمه داغ داشدا پریشاندی الهی
.
عَموم حسنی جعده او گون ایلدی مسموم
جانانه وئرن لحظه ده جان،او شه مظلوم
یانینده اونون حاضریدی زینب و کلثوم
بیکس ئؤله سن دهریده آساندی الهی؟
.
گر گلسه بوگون شیعه لریم داد و فغانه
گوز یاشلاری دریا کیمی گر اولسا روانه
واردور یری قان آغلویالار شاه جنانه
زهرا بالاسی سینه سی سوزاندی الهی
.
جنّتده آچوب باشینی چون سید بطحا
کوثرده دوروب گوزلوری یول، حضرت زهرا
چوخ شکر اولا آللاهه اولوب وصل مهیا
گوزلوردوم همین ساعتی، چوخداندی الهی
.
اولاد بنی هاشمه بو گردش دوران
چوخ چوخلی ستم ایلدی ای خالق رحمان
دوشدی گینه ده یادیمه او شام غریبان
مخیمده بالا قیزلاری عطشاندی الهی
.
پامال ایلدی چرخ دنی، چرخ ولانی
بیر سمته سالوب قوللاری، بیر سمته لوانی
بیر سمته حسینون توکولوب سو کیمی قانی
بیر سمتیده زینب جگری قاندی الهی
.
بیر سمتیده شعله چکوب اخیام امامت
بیر سمتیده دشمن ائلوری خیمه نی غارت
گویا او گجه زینب ایچون اولدی قیامت
چوخ سوزلر هله سینه ده پنهاندی الهی
- پنج شنبه
- 3
- مرداد
- 1398
- ساعت
- 10:52
- نوشته شده توسط
- ابوالفضل عابدی پور
- شاعر:
-
مجید قلعه بیگی
ارسال دیدگاه