منیم عالمده سلطانیم علی دیر
منیم میر جهانبانیم علی دیر
.
نه دارا تانیرام من، نه سکندر
منیم فغفور و خاقانیم علی دیر
.
بهشتی زاهیده وئردیم سراسر
منیم گولزار رضوانیم علی دیر
.
اگر هر کیمسه نین بیر شاهی اولسا
منیم ده شاه شاهانیم علی دیر
.
توتوب هر مرغ بیر گوشنده مسکن
منیم ده باغ و بستانیم علی دیر
.
منی بو اسم اعظم ائتدی ناطق
منیم مجموع دیوانیم علی دیر
.
اگر خنجر چکر دوشمن،غم ائتمه
منیم ده تیغ عریانیم علی دیر
.
منیم سرمایه ی عؤمرومدی مولا
منیم جیسمیمده بو جانیم علی دیر
.
منیم یوخ اوندان اؤزگه ذکر و فیکریم
منیم بو جاندا جانانیم علی دیر
.
منیم کشتی نوحوم مرتضادیر
منیم موسای عمرانیم علی دیر
.
منه ظولمت یولون گؤسترمه ای خضر
منیم ینبوع حیوانیم علی دیر
.
منیم روح اللهیم اولدو یداله
منیم شاه سلیمانیم علی دیر
.
ندیر باغ جنان و نخل طوبی
منیم سرو خرامانیم علی دیر
.
منی سئیر گولوستانا آپارما
منیم سئیر گولوستانیم علی دیر
.
منیم پیر مغانیم شاه مردان
منیم ساقی مستانیم علی دیر
.
منیم عومروم منیم روحو روانیم
منیم مرغ سخندانیم علی دیر
.
منیم عرشیم،منیم فرشیم،اودور او
منیم مهر فروزانیم علی دیر
.
منیم لوح و قلم،کرسی،سریریم
منیم اورنگ کیوانیم علی دیر
.
منیم عودوم،منیم رود و سرودوم
منیم هم راح و ریحانیم علی دیر
.
منیم بزم نشاط و عیش و نوشیم
منیم شمع شبستانیم علی دیر
.
منیم جام مئی و نقل و کبابیم
منیم سالار ایوانیم علی دیر
.
منیم مولکوم منیم مال و منالیم
منیم هم حکم و فرمانیم علی دیر
.
منیم تختیم،منیم تاج و رواقیم
منیم بانی و بنیانیم علی دیر
.
منیم ابریم منیم برق جهنده م
منیم رعد خروشانیم علی دیر
.
منیم لعلیم،منیم درّ خوشابین
منیم باران نیسانیم علی دیر
.
او شهبازین اسیری مرغ جانیم
منیم شاهین و ترلانیم علی دیر
.
دئیر دائم دیلینده خان چوبانی
منیم هر درده درمانیم علی دیر
- پنج شنبه
- 3
- مرداد
- 1398
- ساعت
- 13:8
- نوشته شده توسط
- ابوالفضل عابدی پور
- شاعر:
-
سید ابوالقاسم نباتی
ارسال دیدگاه