علی بیر واژه دور شرحین ائده بیلموب پیمبرلر
علینین وصف و مدحینده فقط قرآن کفاف ایلر
.
تمام انبیا گلدی علینی ایلسون توصیف
تمام اولیا گلدی اونی تعریف ائده یکسر
.
نه جاه و شأنه دارادور بو مولا بیلمورم سرّین
سماوات اهلیده حتی آدین تسبیحده سویلر
.
سراسر زندگی سینده قویوبدور عالمی حیران
اشاره ایلیوبدور هل اتی ده خالق داور
.
علی آئینه ی حقدور علی بیر نور مطلق دور
ولیّ خالق اکبر وصیّ ختم پیغمبر
.
علی اسرار خلقتدی علی دریای حکمتدی
قسیم نار و جنّتدی علی دور شافع محشر
.
علی کان عدالتدور علی نور هدایتدور
علی شاه ولایتدور علی دور عالمه رهبر
.
علی کوه دیانتدی علی تندیس غیرتدی
علی سلطان رأفتدور علی مستضعفه یاور
.
علینی گئتدی دنیایه خدا بیت الحرامینده
او زایشگاه وحدتده گلوب دنیایه اول سرور
.
مسیحین وضع حملینده او گون بیت المقدسده
ندا گلدی کنار اولسون او یردن مریم اطهر
.
او مریم که مقّدسدی او عیسی که پیمبر دی
اولوبدور بیت دن خارج اولا تا فارغ اول مادر
.
علیده باخ کمالات و مقام و شأن والایه
سینبدی کعبه دیواری اولوب زایشگه حیدر
.
طواف کعبه واجبدور او علتدن مسلمانه
علی عشقینده دور حاجی طواف سنگ و گِل ایلَر
.
علی بیر سرّ مبهمدی علی بیر سرّ اعظمدی
علی اسراره محرمدی علی دور راز بحر و بَر
.
علی سر فصل ایماندور علی توحیده برهاندور
علی تفسیر قرآن دور علی دور کوثره همسر
.
علی عالم علی اعلم علی فخر بنی آدم
علی بیر قلعه ی محکم علی دور فاتح خیبر
.
علینین مدحی قورتاماز تمام انس و جان یازسا
اولا اشجار اگر خامه اونا دریا سویی جوهر
.
علینی مدح ائدور دریا علینی وصف ائدور صحرا
علیدن فیض آلور دنیا علیدن عطر آلور گوللر
.
قلملر وصفیه عاجز زبانلار مدحینه الکن
بیلینمز قدری مولانین یازیلسا مین بئله دفتر
.
داخی ختم ایله ای«زعفر»کتاب مدحیوی باغلا
علینی ایلسون تعریف اوخی قرآنی سرتاسر
- چهارشنبه
- 9
- مرداد
- 1398
- ساعت
- 11:56
- نوشته شده توسط
- ابوالفضل عابدی پور
- شاعر:
-
زعفر آزادمهر شیخ درآبادی
ارسال دیدگاه