سوال : زبانحال حضرت زینب کبری (س)
.
نه یردی بو یر ای شهِ دوران آنام اوغلی
حالون دولانوب اولدی پریشان آنام اوغلی
.
.
سن وارد اولاندان بو یره ای شه عالم
اولموش بو گل عارضده هویدا اثر غم
حسرتله باخوب هی چکوسن آه دمادم
بو حالیوه آیا ندور عنوان آنام اوغلی
.
.
ای سرور دین عالم اسرار الهی
وی زینبین امّیدی اولان پشت و پناهی
آلموش دیه سن دور و برون غصّه سپاهی
حالوندن اولور بیله نمایان آنام اوغلی
.
.
بو یرده نه واردور سنون آرامیوی آلدى
رنگون ساری بیر گل کیمی بو نوع سارالدی
اشگیله حسین دولدی گوزون صبرون آزالدی
اولدون بئله افسرده و گریان آنام اوغلی
.
.
قارداش ائدیسن سن ائله بیر طرز نظاره
گویا که سنه یوخدی داخی بیر رَهِ چاره
اوزگه غمه واردور بو نگاهونده اشاره
مندن غمووی ائیلمه پنهان آنام اوغلی
.
.
ایندیکه دوروب فوج بلا سنله مقابل
ممكن اولا گر ائیلمه بو دشتده منزل
بیر اوزگه محلّه دئ چکلسون بو محامِل
سر منزل غمدور بو بیابان آنام اوغلی
.
.
بو یرده نه وار اولدی سرشگون یوزه جاری
آیینۀ رحمانه قونوب غصّه غباری
آهون شرری اود وروب اودلور بو فگاری
قیل سرّینی من بی کسه اعلان آنام اوغلی
.
.
گاهی باخوسان حسرتیله اکبره قارداش
گه اصغره گوزدن توکوسن عارضه قانیاش
دردون نیه بس گیزلدیسن ائیلموسن فاش
زینب اوره گون دردینه قربان آنام اوغلی
.
.
قارداش نه دئدون قارداشیم عباسه پوزولدی
تغییر تاپوب حالی گوزی اشگیله دولدی
نه گلدی سیزه گل کیمی رنگیز نیه سولدی
یوز وئردی نه اندوه فراوان آنام اوغلی
.
.
واضح دئ گوروم سرّینی ای شاه مدینه
نه گلدی سنه باعث اولوب آه و اَنینه
باخ گور نئجه آغلور سنه باخدوقجا سکینه
حالون ائلیوب باغرین اونون قان آنام اوغلی
.
.
شاها سن اوزون «عاصیه» بیر طبع روان وئر
ذکر غمووه قوّت دل نطق و بیان وئر
سرمایۀ کافی اونا ای شاه جهان وئر
ائتسین سنه تا خدمت شایان آنام اوغلی
. جواب : زبانحال امام حسین علیه السلام
.
ای مظهر صدیقۀ کبری باجی زینب
بو یرده آچار باشنی زهرا باجی زینب
.
.
عشق اهلینه بو یر باجی جان کوی وفادور
قربانگه حق کعبۀ حق رشگ منادور
ظاهرده آدی کرب و بلا جای بلادور
امّا اوزی اول کعبیه معنا باجی زینب
.
.
مقصد باجی بو یردی خداوند جلیله
اوّلده منا خلق ائدوب اولاد خلیله
تفسیر منم ذبح عظیمه بو دلیله
شأنیمده دی معنای فَدَینا باجی زینب
.
.
قارداش بالاسی قارداش اوغول ائتماقا قربان
شایسته منی بولدی اوزی حضرت جانان
نه واردی خیالیمده خیالات سر و جان
نه فکر و خیال بو صبایا باجی زینب
.
.
بیجا یره من ائیلمورم بو یری منزل
بو یرده وئرور نخلۀ عمریم باجی حاصل
بو طیّ منازل بو هامی قطع مراحل
بو ترک علایق دگی بیجا باجی زینب
.
.
بثربده اولان گونده کی شورای سقیفه
بیشرم یزیدی ائدوب اسلامه خلیفه
حکم ائیلوری دینیم ائدم ایفای وظیفه
دوغرانسا وجودیمده سراپا باجی زینب
.
.
چوخ تیشه وروب دست ستم ریشۀ دینه
چوخ صدمه یتوبدور باجی جان دین مبینه
بو فکریله من ائیلمیشم ترک مدینه
دینین ائدم احکامینی احیا باجی زینب
.
.
بو یرده گرک قارداشیمون بیدقی یاتسون
تا حشره کیمی بیدقِ اسلامی اوجاتسون
بیر مشک سو اوستونده سوسوز قانینه باتسون
یازسون او قانی صورته معنا باجی زینب
.
.
بیر نوع ائدر قارداشیم عبّاس مساوات
ائیلر او مساواتیله اؤز عشقنی اثبات
بیر کیمسه دن اولماز او مساوات و مواسات
بو رتبیه عبّاسیدی دارا باجی زینب
.
.
بوردا گئچرم اکبر گل پیرهنیمدن
دلدن چکرم ال ائله وجه الحسنیمدن
اول وقته باجی آیریلی روحیم بدنیمدن
ظلمیله قلجلار باشین اعدا باجی زینب
.
.
بیر وقتیده باجی گئیدرم من باشی اوسته
شقّ القمر آثارینی گورّم قاشی اوسته
گوزدن توکرم خون جگر گوز یاشی اوسته
ائیللَّه تلاطم ایکی دریا باجی زینب
.
.
دریالری گوز یاشیمله جوشه گتورّم
اشکیمله سپوب سو یوزینه هوشه گتورّم
آلام یارالی نعشینی آغوشه گتورّم
مخیمده قیامت اولی برپا باجی زینب
.
.
بیر پاییه باجی یتر اندوه و ملالیم
باطن غمیمی ظاهر ائدر صورت حالیم
لیلاده اوگون گورسَنی بیر اوزگه عوالیم
واردور یری مجنون اولا لیلا باجی زینب
.
.
بو دشتده قیلّام باجی من قاسمی داماد
گورمز ائله بیر طوی داخی بو عالم ایجاد
تبدیل ائدر یاسه طویون لشگر بیداد
اودلار منی بو محنت عظما باجی زینب
.
.
طغرای بلایاده یازوب منشی قسمت
داماد وصالینه عروسی قالا حسرت
طوی حجله سی ظلمیله اولا بزم مصیبت
اوّل گون او طغرا اولوب امضا باجی زینب
.
.
قیلام سر و جانیله وفا عهد السته
ائتمز غمیمین چوخلوقی هرگز منی خسته
غم یوز وئرر آخر منه هر لحظه غم اوسته
وار منده بو آلامه شکیبا باجی زینب
.
.
من صبر و تحمّلده او ایّوب وفایم
هر قدر بلا یوز وئره تسلیم و رضایم
هرگز دئمرم (مَسَّنّی الضُّر) خدایم
من تک هانی محبوب بلایا باجی زینب
.
.
ظلمین یتورر بیر یره بو قوم ضلالت
اوچ گونلریله تشنه قالار آل رسالت
قالماز گل گلزار پیمبرده طراوت
سسلر بالالار یکسره اَلماء باجی زینب
.
.
سوز عطش آل اللهَه ائیلر ائله تأثیر
اطفال قالار آج آنالاردان چکولر شیر
بیر نوعی تاپار اصغریمون حالتی تغییر
حالینده اولار مرگ هویدا باجی زینب
.
.
جان اوسته دی گورّم سوسوزوندان بالام اصغر
میدانه آپارّام اونی من زار و مکدر
احوالینه آغلار بالامون قوم ستمگر
لشگرده قوپار شورش و غوغا باجی زینب
.
.
سوز دلیله ایسترم آخر بالاما سو
وئرمز بیر ایچیم سو اونا بو قوم جفا جو
اوخلار الیم اوستونده سوسوز فرقۀ بدخو
قانه بویانار چون گل حمرا باجی زینب
.
.
باجی بو جوانلار که دوروب دور و بریمده
پیش آمدی معلومیدی یکسر نظریمده
هر تک تکینین داغینه یر واری جگریمده
کافیدی غمیمدن بو كنایا باجی زینب
.
.
سنسن اوره گیمده اولان اسراریمه محرم
سنله سالنور قلبی جراحاتیمه مرهم
گورسن باشیمی نیزده ابرو ائلمه خم
یا مسکن اولوب دیر نصارا باجی زینب
.
.
«عاصی» اوزینی باجی سالوبدور بو کمنده
قویمام اونی دنیاده سالا اوزگه سی بنده
بیر بنده که وار روز ازلدن گوزی منده
یار اولام اونا هر ایکی دنیا باجی زینب
.
- سه شنبه
- 15
- مرداد
- 1398
- ساعت
- 9:50
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه