کعبه نی ترک ایلدی باشیندا آهنگ سفر
سرّ اعظم وار سفرده شورش و شورِ دگر
.
حجّی تبدیل ایلیوب عُمره صداقتلن حسین
خصم قرآندان بولوردی جانینه وار دور خطر
.
ایلیوب سعی و صفا هم مروه چون قیلدی نماز
ایلسون ترویج دینی باشلیوب سعی دگر
.
نکته دوربو عقل لرعاجز قالوبدی دَرکینه
اولدی همراهی حرملر بیرده اصغر زیرپر
.
یول گیدور تا کربلایه نهضت خونین ایده
حقّی اثبات ایتماقیلن عالمینی با خبر
.
ایستوری آللهون امری موبه مو اجرا اولا
لیک قرآن دورگرک دنیاده اولسون جلوه گر
.
قان ویره برنامۀ آزاد گی گلسون اَلَه
نُه فلکده اسدیره تا پرچم فتح وظفر
.
چهرۀ ننگ جنایت پیشه گانی رو ایده
کاخ استبداد لر ویران اولا زیر و زبر
.
بو مرامه چاتماقا دارو نداریندن گچه
بیرسوری قربان ویره یاقوت ومرجان و گهر
.
اکبری که چهره سیندن نور آلاردی مهرو ماه
قدی رعنا مثل طوبا سیرتا خیرالبشر
.
اذن جنگ آلسون گرک جانانه قربان اولماقا
آخرین لحظه دویونجا قدینه سالسون نظر
.
پارچالانسون اکبرین باشی اولا شق القمر
چون قمرگلگون اولا غم جانینه سالسون شرر
.
باخسون اکبر نعشینه گورسون یارا ساندان گچوب
سینه سی درده گلوب غم آتشیندن شعله ور
.
بیر عبا آچسون یره یغسون علینون نعشینی
زیرلب ذکر دعاسی گوزلرینده اشگ تر
.
هاشمی لرتا گلوب امداده عباسی دیسون
اکبری سیزحمل ایدون تا قالما سون یالقوز پدر
.
زیر بازوسون دوتوب اوغلی اولن قارداشیمی
من گتورم خیمییه هرچند آهسته گلر
.
بو مرام اوسته گرک عباس تک قارداش ویره
قارداشی که عزّت و تقوا سپهرینده قمر
.
اونداکی نهرعلقم اوسته دوشدی قانلی پیکری
سسلسه ادرک اخا ایوای دیوب اشگین توکر
.
گورسه عباسی جان اوسته قارداشون فکرینده دی
دیزلری اوسته آلار باشین شه نیکو سیر
.
سسلنر قارداش دوشن قولاریوا جانیم فدا
گوزده کی اوچ شعبه اوخ اگدی اگولدی بوکمر
.
زندگی درسی ویروبدی انقلابی ( عدلیا)
مکتبی سازنده دور بولسه گر اولاد بشر
.
- سه شنبه
- 15
- مرداد
- 1398
- ساعت
- 11:17
- نوشته شده توسط
- ابوالفضل عابدی پور
- شاعر:
-
حاج اصغر فرشچی
ارسال دیدگاه