ای ری ده قوزیان علم ای سیدالکریم
دلبسته‌دی سنه عجم ای سیدالکریم
قوی گوزلر اوستونه قدم ای سیدالکریم
گلدیم مزاریوی ئوپم ای سیدالکریم
من سائلم سَن اِئت کرم ای سیدالکریم
معصومیدندی بو خبر ای حامی ولا
عبدالعظیمه کیم گله ری ده قوناق اولا
گویا اولوبدی زائر سلطان کربلا
آری بو آستاندا مس دل اولار طلا
عرض ائت جناندی بو حرم ای سیدالکریم
شکر اللها که ساقی جان می ویروب بیزه
آهنگ نینوا اوخیان نی ویروب بیزه
رب الکرم نه‌ایسته میشوخ هی ویروب بیزه
ایراندا کربلا عوضی ری ویروب بیزه
وِئر عاشق حسینه دم ای سیدالکریم
ای دینینی ارائه ویرن ئوز امامینه
ای مرحبا امامی دیین خوش مرامینه
گیتدون او گون که حضرت هادی سلامینه
حضرت ولیّنا دیدی سن تک غلامینه
عالم غلامون اولدی هم ای سیدالکریم
عرض ایله دون سنه آقا واردی ارادتیم
سندن قاباقدا دوقوز امامیمدی حجتیم
حضرت دیدی ادامه لی دی بوبشارتیم
مندن صورا حسندی صورا مهدی عزتیم
یاروندی اون ایکی حکم ای سیدالکریم
سن جنت النعیمدن اسمیش نسیم‌سن
نسل جدیده آیت عهد قدیم‌سن
چوخدور کرامتون حسنی سن کریم‌سن
اعظم جلال حضرت عبدالعظیم‌سن
نجل الامام محترم ای سیدالکریم
مولا دعا ایله شهدا دن توان آلاخ
بیرگون بقیعیده حسنه بیر حرم سالاخ
قلب مدینه ده علم نصرتی چالان
قویماز امام عصر یانوب منتظر قالاخ
سنده اله گوتور قلم ای سیدالکریم
یاز تذکره بقیعه گیداخ یابن مجتبی
آل سعود گوزلرینه اوخ وراخ آقا
بیر صحنیده سنون آدیوا ایلیاخ بنا
لبیک یاحسن سسی افلاکه قوزانا
سن امر ایله دیاخ نَعَم ای سیدالکریم
شوالین اون بشینده سن اولدون شهید حق
قانون ظلمی ایتدی قضا عطف ماسبق
یعنی احد ده غملر آلوب حمزه دن رمق
تاریخه سینه داغلی «کلامی» ورار ورق
اوننان عطاوی ایتمه کم ای سیدالکریم
- سه شنبه
- 20
- آبان
- 1399
- ساعت
- 10:53
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه