ای آخان قان پنجه سیندن
رزمگاهون شیری قارداش
دور گلوب گون باشون اوسته
آل اله شمشیری قارداش
.
یاتما ای شیر شجاعت
ایله اسلامه حمایت
.
.
آه او گوزلر که ابالفضل
قورخودان یاتمازدی راحت
ایندی آسوده یاتالار
سنسیز ای کان شجاعت
بو پیمبر قیزلاریندان بیرده
کیم ایلر حمایت
زینبون اوج ایلر عرشه
نالۀ شبگیری قارداش
.
.
تا سسون گلدی خیامه
ناامید اولدوم اوزومدن
انکسار معنویت
آشکار اولدی یوزومدن
گتدی الدن اختیاریم
خون دل آخدی گوزومدن
پوزدی حال اهل بیتی
حالیمون تغییری قارداش
.
.
ای اولان سو اوسته عطشان
قانینه غلطان ابالفضل
نوک خاریله وجودی
گل کیمی خندان ابالفضل
بو اوغولسوز جانیم اولسون
جانیوه قربان ابالفضل
گلماقا آردونجا اولماز
قارداشون تأخیری قارداش
.
.
آچ گوزون قارداش بو حالون
گور منی نه حاله سالدی
طاقت و صبریم تالاندی
شیونیم عرشه اوجالدی
ایندی پرگاریم پوزولدی
اللریم قوینومدا قالدی
وار یری یاندیرسا کؤنی
آهیمون تأثیری قارداش
.
.
جسمیوه بسکه ووروبلار
تیغ و نیزه وار یاران چوخ
وای منه ای وای اباالفضل
پیکرونده صاف یرون یوخ
حالیمی پوزدی منیم چوخ
سجده گاهوندن دَیَن اوخ
کاش قلبیمدن دَیِیدی
دشمنین بو تیری قارداش
.
.
اللرون سالدی بدندن
ظلم الیله قوم کینه
مشکون اوخلاندی بو چولده
دولدی قانون سو یرینه
خیمه لرده آچدی باشین
زلفینی یولدی سکینه
کؤنی یاندوردی بو قومون
ظلم عالمگیری قارداش
.
.
سنسیز ای سردار لشگر
قوزانار یاتمیش علملر
بیرده نازیله یاتانماز
خوف و وحشتدن حرملر
زینبون باشیندن قویماز
اهل شام و کوفه معجر
بو سوزوم واضحدی یوخدور
اوزگه بیر تفسیری قارداش
.
.
رزمگاهه سن گلنده
قول بویون اولدون منیله
قول بویون اوللام دیَردیم
بیرده قارداش من سنیله
اللرون یوخدور دیَم دور
بوینوما سال شیونیله
فکریمون گوستردی عکسین
دشمنین تدبیری قارداش
.
.
غصّه دن قان اولدی باغریم
آچ گوزون یاتما اویان دور
قویما بو چولده اوغولسوز_
قارداشون یالقوز اماندور
باشون اوسته آز فغان و
ناله می عرشه دایاندور
ای دوشن قولسوز یر اوسته
رزمگاهون شیری قارداش
.
.
ایا ولان مخسوف ماه
هاشمی یوخسا باتوبسان
من ایاق اوسته دوروب سن_
خاک و خون ایچره یاتوبسان
اولمیا قارداش خیالِ
زینبی باشدان آتوبسان
اولموشام من بو غم افزا
حالیمون درگیری قارداش
.
.
بُلسه لر دوشموش ایاقدان
ظلمیله بو سرو قامت
لشگر اعدا تاپالّار_
اوستومه قارداش جسارت
جای حسرتدور منه ای
شیر میدان شجاعت
اولموسان روبه صفت_
صیّادلر نخجیری قارداش
.
.
قالمسان بیر حاله نطقون
یوخ جوابه یا سؤاله
آچ گوزون نور جمالون
حقّه باخ گور لامحاله
قول گئدوب باشون داغلسون
لیک گلمزدی خیاله
اولماسیدی گر قضا_
منشی سینون تقدیری قارداش
.
.
سن آتام حیدر نشانی
هم منه صاحب لواسن
شهرتاً باب الحوائج
هم اؤزون کان وفاسن
ایسته خالقدن #صحافون
دردینه ائتسون دوا سن
چون محوّلدور اونا چوخ
نوحه لر تحریری قارداش
.
- شنبه
- 19
- مرداد
- 1398
- ساعت
- 14:16
- نوشته شده توسط
- ابوالفضل عابدی پور
- شاعر:
-
حاج محمد حسین جنتی مقام
ارسال دیدگاه