صحرای عشقه قویدی قدم پادشاه عشق
خلوتسرای یاره تاپوب شاهراه عشق
.
شه مرکبی قدم قدمیندن گوتورمدی
مبهوت اولوب او حاله سراسر سپاه عشق
.
قوندی غبار غم رخ شمس امامته
دوشدی خفایه تیره لنوب مهر و ماه عشق
.
امر ایلدی کجاوه لری یندرون تمام
بو دشت غم فزاده وورون بارگاه عشق
.
بو حالی گوردی زینب علیا مکرّمه
چکدی درون دلدن او مظلومه آه عشق
.
عرض ایلدی بو یرده نزول ایلمه حسین
غرق ایلر اهل عشقی بو یرده میاه عشق
.
قان قان دیور بو دشت و بیابان پر خطر
قورخوم بودور بو یرده اولا محو جاه عشق
.
لرزاندی برگ بید تک اطفال مه لقا
وحشتده دور حرملرون ای دادخواه عشق
.
بو یرده سن شهید اولوسان منده دستگیر
حتمی بیر امردور بونا یوخ اشتباه عشق
.
پوزقون گورنده زینبنون حالینی امام
توکدی عذاره گوز یاشینی پادشاه عشق
.
فرمایش ائتدی ائتمه باجی زینب اضطراب
صحرای کربلادی بو یر جلوه گاه عشق
.
جدّیم خبر ویروب بو یرون ماجراسینی
بیر بیر بیان ایدوبدی رسول الاه عشق
.
پرگاریمی پوزالّا بو صحراده ظلملن
بیرحم عدوی سنگدل و دین تباه عشق
.
لب تشنه قانینه بویانار نوجوانلاریم
فانی ایدر وجودلرین بیر نگاه عشق
.
دوغرالّا اکبرین دل لیلادن اوج ائدر
طاق سپهر اخضره آه سیاه عشق
.
عبّاسیمون ائدَلَّه ایکی قولّارین قلم
عدلین اولور قولوندان آخان قان گواه عشق
.
پیکان دمینده اللریم اوستونده جان ویرر
اصغر او طفل ماه وش و بی گناه عشق
.
ناحق کَسَلَّه باشیمی اثبات حقّ ایدر
بو خاکدن نُمُوّ ایلین گل گیاه عشق
.
مندن صورا حرم تالانار خیمه لر یانار
بو بی پناه عیالیمه سن سن پناه عشق
.
فخر ایلر اهل عالمه ای شاه کربلا
« صحّافه » یتسه مرحمت گاه گاه عشق
- دوشنبه
- 21
- مرداد
- 1398
- ساعت
- 11:52
- نوشته شده توسط
- ابوالفضل عابدی پور
- شاعر:
-
مرحوم صحاف تبریزی
ارسال دیدگاه