عاشقلرین ای دار و نداری آی ابالفضل!
عشق عالمینین قافله داری آی ابالفضل!
غم عطری گلیر ماه محرّم گلیر آقا!
قؤردوق آدیوا تشت گذاری آی ابالفضل!
.
.
ماتمده اؤرَک، اهلِ عزا داغلیاجاقدی
یاسونده سنون باشه قرا باغلیاجاقدی
قانلی گؤزیوه گؤزلریمیز آغلیاجاقدی
بیله سُؤواریق لیل و نهاری آی ابالفضل!
.
.
بو پیر و جوان صدقیله دیلدن سنی سسلر
بیماری اولان صدقیله دیلدن سنی سسلر
مشکلده قالان صدقیله دیلدن سنی سسلر
باخ قانلی گؤزونله بیزه ساری آی ابالفضل!
.
.
درگاهیوه بیر عدّه دی آواره گلوبلر
تا ایلیه سن دردلرینه چاره، گلوبلر
ماهِ غمه خاطر گئینوب قاره گلوبلر
مأیوس ائلمه سنده بولاری آی ابالفضل!
.
.
چوخداندی بیلورسن سنون عشقونده علیلم
دوت مرحمتیلَن الیمی ابن سَبیلم
بال و پری سینمیش قوشام آهیله دخیلم
سالما نظروندن منِ زاری آی ابالفضل!
.
.
چؤل هر نه ده اولسا دولانوب گلشنه چاتماز
عشقینده نه فرهاد و نه مجنون منه چاتماز
حُسن عالمی یوسف ندی٬ آیدا سنه چاتماز
گؤیچک یارادوبدی سنی، تاری، آی ابالفضل!
.
.
چوخداندی کی گؤزلوردوم اولا تشت گذاری
تا کی گلم امّیدیله بو مجلسه ساری
مأیوس ائلمزسن گلن عاشقلری آری
نومید ائلمه سن منی باری آی ابالفضل!
.
.
بیر عمری آنون باشه قارا باغلادی ئولدی
آهیله یانان سینه سینی داغلادی ئولدی
گونلر قاباقیندا اُوتوروب آغلادی ئولدی
اولموشدی آدون دیلده شعاری آی ابالفضل!
.
.
جان بیشه ی غیرتده فدا سن کیمی شیره
وئرّم قسم اؤز آدیوه ای ماهِ عشیره
لطفیه شفاعت ائله محشرده «بشیر»ه
چوخ ایستیَن ای هشت و چهاری آی ابالفضل!
.
- دوشنبه
- 21
- مرداد
- 1398
- ساعت
- 12:5
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه