شراب عشق حسین مست ایدوب دوباره منی
شماتت ایلمیون قلب داغداره منی
.
حسینون عاشقیم یوخ نیازیم ئوزگه لره
گلون چکون بوگوزل عشقون اوسته داره منی
.
گرک ئولونجه گوزوم یاشینی توکم یوزومه
فقط بوعشقه آنام گتدی روزگاره منی
.
حسینه نوحه دیوب قاتدی گوز یاشین صودونه
او دادلی صود یتوروب اوج اعتباره منی
.
یخلجاقون دیرم یاحسین،دوزلّم من
ایدوبدی بیمه آنام میر تاجداره منی
.
سالوبدی کرب و بلا کائناتی رونقدن
فراق یار سالوب حال احتضاره منی
.
حسینون عاشقینه نینیر جهنم اوتی
اینانموسوز دولیون نار پرشراره منی
.
حسین حسین چاغیروب آتشینی سوندورّم
چکر آقام بیلورم امن،بیر حصاره منی
.
حسینه ایندی نه من ،کعبه ده قراگینوب
بوقاره کوینگیلن تاپشورون مزاره منی
.
قوتاردی غسل و کفن قاره سون چکون یوزومه
حسین آدیلا قویون قبر تنگ و تاره منی
.
مزاریم اوسته یازون کربلا اسیریدی بو
کناریده دایانون ایلیون نظاره منی
.
یقین ایدون سالاجاق نوکرینی یاده حسین
دوباره مست ایده جک ، نرگس خماره منی
.
موکّلان عذابه دیر دورون دالیا
سفارش ایلیه جاق حی کردگاره منی
.
- چهارشنبه
- 23
- مرداد
- 1398
- ساعت
- 11:37
- نوشته شده توسط
- ابوالفضل عابدی پور
- شاعر:
-
مرتضی اسکندری
ارسال دیدگاه