سلام او سروره کی سرور شهیداندی
سلام او سیده کی سیّد جواناندی
.
سلام او یاره‌لی‌یه قانی باتمیوب باتماز
جهاندا پرچم آمالی یاتمیوب یاتماز
.
سلام او یاره کی بی یاره یار اولار دائم
آلینمییان قاننی خصم‌دن آلار قائم
.
مشامه عطر عزا گلدی عطر غم گلدی
نه غم کی جسم عزاداره تازه دم گلدی
.
قولاق وئرون دل و جانیله بیر منه یاران
گلوب تلاطمه دریای غم گنه یاران
.
گلون گلون بو نیستانیده نوا ائلییاق
نوائیله بو یئری عین نینوا ائلییاق
.
نوا ائداق کی نی‌یون غم نواسی باشلاندی
قرا گئیَیک کی حسینون عزاسی باشلاندی
.
اولار همیشه ولا اهلی طالب ماتم
بیلر کی حضرت زهرادی صاحب ماتم
.
اجازه ویرمَسه او، نور عینه آند اولسون
حسینه آغلیابیلمَک حسینه آند اولسون
.
نه فرقی، اوّل و آخرده‌سن، دئ یازهرا
اجازه آلماقا هر یئرده‌سن، دئ یازهرا
.
اجازه وئر بیزه یافاطمه! توکَک گوزیاش
جماعتیله گَلاق ماتمه توکَک گوزیاش
.
محرّمین اَوَل آخشامی اهل عرش برین
چکَلّه عرشه حسینون او قانلی پیرهنین
.
باخالاّ اوخ یئرینه غمله سینه داغلالاّر
گوره‌لّه تازه‌دی قانی آخور قان آغلالاّر
.
حسین، او کوینگی گئیدی وداع آخرده
گورنده اهل حرم دیل‌لری گلوب درده
.
باخوب باخوب اونا زینب سرود غم اوخویوب
دئدی آنام سنه قربان بونی آنام توخویوب
.
منه بویوردی: گیینده حسین بو پیرهنی
آماندی یادیوه سال کربلا چولونده منی
.
او دشتیده آلاجاقدور قانیلا دستمازین
منیم نیابتیمه ئوپ حسینیمون بوغازین
.
دایان ئوپوم بوعازوندان، فدا بو گوزیاشیوا
اوتور یئره اوره‌ئیم یاندی بیر دونوم باشیوا
.
بیلورسن آغلاموشام گونده دورد، یاشیمدن
آماندی سایه‌وی کسمه بلالی باشیمدن
.
طرَب لباسینی سنسیز داخی گئیه بولمم
اوره‌کده چوخدی سوزوم هامّوسین دیه بولمم
.
فقط بونی دیورم گئتگیلن سوسوز قارداش
یامان گونومدی بو گوندن قاباق ئولیدیم کاش
.
`بشیر” شعر یازوب ایلییَر روان اوخویار
وداع روضه‌سینی صاحب‌الزمان اوخویار
.
- پنج شنبه
- 24
- مرداد
- 1398
- ساعت
- 12:38
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه