گنه دنیانی غم دوتدی محرم گلدی غم گلدی
دیوله کربلایه کعبه دن میر حرم گلدی
گوتوردی اهل بیت عصمتی سلطان عالم جاه
چخوب دی کعبه دَن کرب و بلانی قصد ایدوب اول شاه
یتیشدی کاروانی کربلایه ختم اولوب چون راه
باشندا لشگری اول شهریار غم حشم گلدی
یازولّا دوم ماه محرم ازدحام یله
حجازیلر یتوبلر نینوایه مین نوائ یله
سعیدان زمان اولدی مقابل اشقیائ یله
او وحشتناک دشته یوز قویوب قوم ستم گلدی
او ساعتده ابوالفضلى حضوره ایلدی احضار
بویوردی قافله دورسون بو یرده تا آچلسون بار
بو یر کرب و بلا دور ایلیون انصاریمه اخطار
یاخون لاشدی ئولوم بیز قومه غم لر دَم بَدَم گلدی
شهین امری له نصب اولدی چادرلار بیر چوخور یرده
گوروب بو وضعی تا زینب گلوب دی خاطری درده
غبار غم اوتوردی چهره اولاد حیدرده
حضور شاه دینه زینب زهرا شیم گلدی
یتیشدی محضر شاهه ملول و زاره افسرده
دیدی قارداش بو صحراده گلوب دی خاطریم درده
بیور وورسون ابوالفضلیم اوجا یرده سرا پرده
بو ایش عکسین گوروب صبریم آزالدی چوخلی غم گلدی
آتام حیدر هامی دعواده ای شاه فلک درگاه
اوجا یرلرده دائم نصب ایدردی خیمه و خرگاه
ولی سن عکسینی وئردون نشان بو عرصه ده ناگاه
بو مطلب دن فغانه بانوان محترم گلدی
اگر بو عرصه گاه غمده قارداش بیر بلا وار دور
بنات حیدره بی حد بلا و ابتلا وار دور
بویور کوچ ایلیاخ بوردان یقین بیر ماجرا وار دور
ائشیتدی بو سوزی نطقه شه عالم او دم گلدی
بویوردی توکمه چوخ رُخسار زرده گوز یاشون زینب
بو صحراده دوشر بی حد بلیاته باشون زینب
مگر ممکن اولور بوردان قیت سون قارداشون زینب
حسین بو کربلانی مدفن ایتسون لاجرم گلدی
بو یرده یکسر انصاریم منیم قانه باتار زینب
بو یرده قارداشون مقصودی نه آخر چاتار زینب
بو یرده یاتماسام من کیم گلوب آیا یاتار زینب
هاچان امر خدایه لفظیمه اِلّا و لَم گلدی
بو خیمه ایچره لیلا اوغلونا خلعت بیچر زینب
او یرده قاسم شهزاده باشین دن گیچر زینب
علی اصغریم بوردا سو تک قانین ایچر زینب
گوروسن قرمزی جامه گیوب اول غنچه فَم گلد
اولاندا عاشر شهرالحرام ای دختر زهرا
بو تل اوستن باخارسان رزمگاهه دلده وا وِیلا
ابوالفضلین گوررسن قولارین تندن سالوب اعدا
عقاب اوستن گورّسن توپراقا صاحب علم گلدی
بو تلی که گورورسن خیمه گاهین روبرو سینده
ایله مشهور اولار زینب آدونلا گفتگو سینده
اولالار بو یرین شاه لار گدالر آرزو سینده
پیمبرلر بو دشته قبل از این که من گلم گلدی
بو تله زینبیه آد قویار عالم اولار مشهور
سنون خدمت لرون الله یانندا چون اولار منظور
مبادا اینجیه قلبون مصیبت دن اولا رنجور
بیزه صبر و تحمل حقیدن اولدی کرم گلدی
قورولدى خیمه گاهیم بیر چوخور یرده بو دور علت
یخاندا ذوالجناح اوستن منی اشرار بَد فطرت
حسینی گورمه سین خوردا اوشاقلار بیر ایله ساعت
که قاتل باشیم اوسته الده بیر تیغ ستم گلدی
عراقین دشتی نی پر شور ایدم شور حجازیم دن
گیدنده قتلگاهه چوخ یانارسان سوز و سازیم دن
بو تل اوسته اوپرسن سن منیم عطشان بوغازیم دن
همان گونلر که دل ده زینبا یاد ایلرم گلدی
او یر که جمله یرلردن چوخوردی قتلگاهیم دور
او یردن اوج ایدن عرش برینه سوز آهیم دور
گوررسن دستمازیم قاندی توپراق سجده گاهیم دور
بیله طاعت منه روز ازل اولدی رقم گلدی
بو قدری ظلم بی جانی حسین آسان سانار زینب
بو دور دردیم ولاکن خیمه گاهیم اودلانار زینب
ایکی طفل صغیریم خیمه لر ایچره یانار زینب
دیوب بو سوزلری داده شه گردون خَدم گلدی
بیله فکر ایلورم اول شه داخی گفتاری دن قالدى
آخوب اشگی عذاره زینبین آرامینی آلدی
آچوب قولارینی زینب حسینون بوی نونا سالدى
دولوب گوز کاسه سی داشدی یوزه مانند یَم گلدی
(حسنی) آرزو ایلر اولا بیر وقفه زوارون
ارادت بسلیوب از بس اولوب دلدن گرفتارون
هاچان مایوس اولوب دی درگه وندن بیر عزا دارون
اگر چه نوحه خوان اولدی و یا اهل قلم گلدی
- دوشنبه
- 10
- خرداد
- 1400
- ساعت
- 16:44
- نوشته شده توسط
- یوسف اکبری
- شاعر:
-
حسین حسنی افشرد
ارسال دیدگاه