باهار فصلینده گلزاره قدم قویدوم دیدیم گوللر
منیم بیر گل بهاریمدور منه سیزدن بهار اولماز
او گل بیر گلدی اوندان عاشقین جانی شکوفادور
اونا شیدا اولان بلبل داها عشقه دچار اولماز
دوشر پابوسینه سرویله سمبل سویلیر بلبل
سنون تک بیر گله باغدا نجه بلبل خمار اولماز
سنه مخمور اولان دیده کور اولسا هر ایکی گوزدن
باخار معنا گوزیلن دیده ی معناسی تار اولماز
او گل احمد دیَن گلدور غدیر خمدا حجاجه
بویوردی سیزلره حقدن علی تک یادگار اولماز
سیزه تاپشربمشام شاهد اولون عترتله قرآنی
ولی الله اعظمدن کلام الله کنار اولماز
علینی کیم ولی بیلسه رسوله اقتدا ایلر
ولایت سیز عبادتدن رضا پرور دگار اولماز
غدیر خمدا حجاجه رسولین امری حجتدور
غدیری آنیان اولسا اونا حجت کرار اولماز
سقیفه فتنه سین تأئید ابدن بیلسون بو معنانی
علی مولا اولان یرده خلافت واگذار اولماز
غدیر خم گونی بیعت الوندی مرتضائیلن
دانیب بو بیعتی هر کیم سوزونده اعتبار الماز
گرک عصمت اولا دین مسندینده اگلشن شاهدا
گناه آلوده سیندن دینه لایق شهریار اولماز
الان هر مسنده لایقدا خوشدور اقتدار اولسون
قاچان هر جنگیدن گورخاق آدامدا اقتدار اولماز
ائو کی حیدر اوین یاندردی زهرانی شهید اتدی
اگر دنیانی فتح اتسه دلیل افتخار الماز
یاناندا ائول قاپی سقط جنین السا جنایتدور
جنایت اوستونه کیم پرده چکسه رستگار الماز
آچلسا سوز ائورک درده گلر صاحب زمان آغلار
گدیب تحقیق ادن اشخاصه مطلب استتار الماز
علینین حقیدور السون هامی مؤمینلره سلطان
بو حقی غصب ایدنلرله حقیقت سازگار اولماز
علینین زندگیسینده خطا کیم گوردی دنیاده ؟
علی مثلی پیمبر دینینه بیر جانثار الماز
علی مظلومِ دوراندور علی زرقام میداندور
علی مثلی جهادین عرصه سینده تکسوار الماز
علیدن خاطره ایجاد الوبدی عالم امکان
بو خلقت کارگاهینده بله بیر شاهکار الماز
علی معصوم مطلقدور ظلالتدن مبرادور
اونا کیم دوز غلام اولسا دچار ننگ و عار اولماز
دچار ننگ اولان انسان ایر باش کافره گبره
هر اوباشه دیر قارداش ولی مولایه یار اولماز
الان صاحب وقار انسان ولی الله بئل باغلار شرافتلی ارازل سفره سینده ریزه خوار اولماز
نیه بیلمم پیمبر ترک ایدن گوندن بو دنیانی
علی اولادینه دنیا بویی خوش روزگار اولماز
اول مظلومه زهرایه ویروبلار کوچه ده سیلی
اوسیلی دن نجه شیعه همیشه داغدار اولماز
قویون یاد ایلیوم رحمتلیگ انوردن کی یازمیشدی
هر انساندا مروت الماسا وجدان و عار الماز
علینون دلبری دیلدن دوشوب دوشدی یوزی اوسته
دئدی الله یوزوم یاندی بله سوز و شرار الماز
مریضه بنده ام پهلو شکسته قولاریم نیلی
غریب الدوم مدینه مدن بله غملی دیار الماز
سورا اود ویردولار یاندی قاپی چرپلدی زهرایه
بو غملی ماجرادن یانماسا کیم دینمدار اولماز
قویاندا قبره زهرانی بویوردی حیدر کرار
خانم زهرا قویوبسان تک منی منده قرار اولماز
- دوشنبه
- 28
- مرداد
- 1398
- ساعت
- 12:33
- نوشته شده توسط
- ابوالفضل عابدی پور
- شاعر:
-
حسنعلی بالایی
ارسال دیدگاه