مکه دن حاجی خوش خرّم وخندان گلدی
آرزوسینه چاتوب باغلادی پیمان گلدی
.
بو سفرده هامی حجّاج ائلیوب شکر و ثنا
چهره لر شاد و خرامان گوزی خندان گلدی
.
هر طوافینده بو حجّون ائلیوب بیزلری یاد
اولماسون دهریده غمگین و پریشان گلدی
.
عَرَفه،مروه،صفا،مشعر و رَمی و جمره
چاتدیروبدور باشا اعمالی ثناخوان گلدی
.
ذبح قربان ائلیوب کوی ذبیح اللّهدا
اوردا که حضرت اسماعیله قربان گلدی
.
گتدی اسماعیلی ذبح ایلیه تا اوردا خلیل
خنجری کسمه دی حقدن اونا فرمان گلدی
.
خنجری وئردی داشا داش پارالاندی فورا
بو نه ایشدور دئدی اعمالیمه نقصان گلدی؟
.
بو لطافتده بوغازی کسه بیلمور خنجر
داشی کسدی بو ایشه اولمشام حیران گلدی
.
گلدی خنجر دله سسلندی خلیل اللّهه
کسمرم چون منه فرمایش یزدان گلدی
.
سن خلیل امر ائدوسن کس او جلیل امر ائده یوخ
بو داشین کسمگین امری بس هایاندان گلدی؟
.
بوردا جبریل بهشتدن گتوروب بیر قربان
بونی ذبح ایله که فرمایش رحمان گلدی
.
نئجه اسماعیلی هاجر بزه میشدی ذبحه
بَزه دی اکبریده لیلی نالان گلدی
.
یولاّدی یوسفه،اسماعیله،بنزر بالاسین
بیلدی چون اذن وئروبدور شه خوبان گلدی
.
بیرده سس گلدی خیامه علی اکبر گلوری
آناسی لیلیه وئرسونله خبر جان گلدی
.
خیمه دن چخدی آناسی اورگی چرپندی
دئدیلر قانلی عباده بالون الان گلدی
.
گوردی تا اکبرینون قانه بَلشمیش بدنین
دئدی آلله گوزل اوغلوم منه مهمان گلدی
.
ای خدا عمّه لریندن ده خجالت چکورم
قانلی لبلردن اوپم حظّ فراوان گلدی
.
اگلشوب پائین پاده چیخادوب چکمه لرین
دردینه قانلی ایاقدان بلی درمان گلدی
.
گوتدی قانلی ایاقی قویدی یانان سینه سینه
دئدی گور نه حالا بو سینه سوزان گلدی
.
او ایکی دوش آراسیندا قویوب اوپدی ایاقین
گوردی بو منظره نی نالیه نسوان گلدی
.
ایله بیر حالده ام گلموری گوزیاش گوزیمه
ایندی من فکر ائلدیم عمرینه پایان گلدی
.
آنانون اوغلی ئیلان واردی سر و سامانی
بو اوغولسوز نه نه دی بی سر و سامان گلدی
.
- چهارشنبه
- 30
- مرداد
- 1398
- ساعت
- 11:46
- نوشته شده توسط
- ابوالفضل عابدی پور
- شاعر:
-
سر رشته اردبیلی
ارسال دیدگاه