عمه جان دشمن سالوب محنت قطاریندن منی
نجم تک سن آیری سالما غم مداریندن منی
ای اسارت مکتبینده قزلارا آموزگار
هانسی بیر قز من کیمی دنیاده اولدی خوار و زار
شاخه می سندیردی گل تک تند باد روزگار
آیری سالدی زندگینون نوبهاریندن منی
آغلاسون آغلار گوزوم تک عمّه دنیانون گوزی
قلبنی دوتسون یانان قلبیم کیمی محنت کوزی
اؤزگه لرده بُؤلمسه سنکه بُؤلورسن بو سوزی
آرتوق ایستردی بابام دار و نداریندن منی
آشیانسیز بیر قوشام کیمدور یته امدادیمه
مانع اولدی ساربانلار نغمه و فریادیمه
اُفّ اولیدی آشیانیم یاندیران صیّادیمه
بوشلادی بیراهه ده چنگ شکاریندن منی
ظلمته دوتدی او گونکه عترت طاها گونی
باتدی اسلامون چوخوریرده جهان آرا گونی
ئولمدوم قالدوم سلامت حیف عاشورا گونی
طالعیم قورتارمادی دنیا فشاریندن منی
دقّتیله هر قدر ایتدوم نظاره یولّارا
ردّوزی گوردم نقدری بُلمدوم گتدوز هارا
رحم ائدون آخر منه اولدی ایاقلاریم یارا
اینجدوب بیراهه یولار نیش خاریندن منی
دردمندم تیکمشم گوز بیر سنون درمانووه
جاندان آز قالدوم دوشم اولسون قسم اؤز جانووه
نه الیم چاتمور بو صحراده سنون دامانووه
نه خلاص ائتمور اجل اؤز انتظاریندن منی
سهلدور عمّه ایاقیمدن آخور شدّتله قان
پردۀ خاک سیاهیله یوزوم اولموش نهان
توز دوتان آئینیه تشبیع ائدوب دور زمان
گور نه گرد آلوب ائدوب صحرا غباریندن منی
مونسم خار مغیلانیله خوار اگلشمیشم
دوشومشم دلدن یول اوسته انتظار اگلشمیشم
بختیمه یوخ لطفووه امید وار اگلشمیشم
گل حساب ائت لطفوون امیدواریندن منی
سنّمه نسبت بی بی چوخ چوخ بلالیمیش باشیم
صورتیم آئینه سینده لکّه سالمش گوزیاشیم
من مگر صحبت ائدنده جان دیمزدی قارداشیم
با کنار ایلردی بیر لحظه کناریندن منی
وای منه هر آن منه قربان دینلر هاردادی ؟
بلبل خوش لفظ و خوش الحان دینلر هاردادی
کَلمَمَه قیمت وئرنلر جان دینلر هاردادی
یوخدی بیر کس قورتارا غم زیرِ باریندن منی
غصّه سرگردانیَم عالمده هجران یولداشی
ساقه سی سنمش گولَم خار مغیلان یولداشی
روزگار اکبر غمین ایتدی منه جان یولداشی
سالدی عالمده جلالت اعتباریندن منی
خط سیرین سیر ایدوب مغربده باتدی آفتاب
دولدوروب بو قورخلی دشتی سکوت انقلاب
تترورم سیماب تک قلبیمده واردور اضطراب
چخمیوب آی قورتارا ظلمت حصاریندن منی
دامن صحرا قرانلوق گورسنور من قورخورام
یل اسور خار مغیلان ترپنور من قورخورام
تار زلفیم تل به تل قالخور اَنور من قورخورام
ترسناک ایلور طبیعت اقتداریندن منی
آغلاماق جرم اولسا ای عمه یتیمه قزلارا
ایلورم پیمان ئولونجه ائتمرم آه و نوا
قلب بی روحیم تک اولام من همیشه بی صدا
سنده قویمازسان بی بی گوز اختیاریندن منی
گرچه زحمتدور اؤزون گل ایلورم من التجا
یا بی بیم کلثومی گوندر ایلسون غمدن رها
زجر گلسه مانع اول گلسه اگر او بی حیا
اینجدور یولّاردا زجر و انزجاریندن منی
صورتین گورسم اونون غیظیله اولام زهره چاک
هم او نالمدن گریزان هم من اوندان بیمناک
آچسا بئلدن قمچیسین یوخ طاقتیم ایلر هلاک
کم قیلار فوج اسیرانون شماریندن منی
#انورم گر چه نصیبیم اولمیوب جاه و جهان
واردی حمدیم حق تعالی لطف ائدوب طبع روان
بزم عرفاندا ائدوبدور همدم صاحبدل ...
- دوشنبه
- 25
- شهریور
- 1398
- ساعت
- 9:27
- نوشته شده توسط
- علیرضا گودرزی
- شاعر:
-
مرحوم انور اردبیلی
ارسال دیدگاه