خرابه منزل اولوب اهل بیت طاهایه
یتشدی ناله سسی اوج عرش اعلایه
هنوز هر بیری بیر یاندا دوتمامیش آرام
بیر اؤزگه غم وئروب اَل اهل بیت زهرایه
بیری بیرینه خبر ایلوب اهالی شام
که دسته دسته گلوب لر اودم تماشایه
طمعلنوب بیریسی ایستدی امامی غلام
هزار لعن بو بی آبروی دنیایه
بیری دیردی ساتال‍ّار تمامینی آلّام
یزیدی راضی اگر ایلیم بو سودایه
او وقته زینب کبرایه ال ویروب رقت
کمالی چون واریدی چوخ علی اعلایه
بویوردی کور اولاسوز،باخمیون،کناره دورون
نه طعنه دور؟ نه تماشا؟حریم والایه
زنان و مرد،کنیز و غلامسوز بیزه سوز
قسم جناب بتول و رسول بطحایه
همین خرابده آدمدی بیزلره دربان
گوروبدی چون بیزی خاتون انسی حورایه
بیوک حرملره خدمتگزار مریم دور
بو خوردا قیزلارا حوا و سارا دور دایه
همان جوان کی سنق پاییه ائدوب تکیه
اونون آدی یازیلوب عرشه تا تاپوب پایه
اوزی مریضیدی اما بونیلا روح الله
اودور حیات وئرور بیر نفسده عیسایه
ضعیف جانیله چون اللرین اوپوبدی عصا
اودور عصاسی وئرور جان عصای موسایه
چکوبله داره طنابیله دار دنیاده
وئروبدی دار بلادن نجات عیسایه
یتیشمیشوق تازه بیز بیر قویون اولاق راحت
سالوبلا بیزلری مدتدی کوه و صحرایه
غریب ئولکه،خرابه مکان،قرخا یاخون
اسیر عورت اوشاخ کیم دوشوب بو غوغایه
آچوقدی باشلاریمیز باخمیون سیزی تاری
گئدون داخی داغیلون دورمیون تماشایه
اگر بیزی تانوساز هتک حرمت ایلمسوز
بیزوک که نسبتیمیز وار بتول عذرایه
ائدوبدی خلقه تولا بیزی خدا واجب
نجه روادی خدایا قالاق تولایه
نوایه گلمگه وار گلشن عزاده «دخیل»
نه احتیاج داخی عندلیب شیدایه
- پنج شنبه
- 28
- شهریور
- 1398
- ساعت
- 10:5
- نوشته شده توسط
- علیرضا گودرزی
ارسال دیدگاه