بِئله اِئتمه ناله سکینه جان، بالام آغلاما، قیزیم آغلاما
سفره گئدوب گله جَک بابان، بالام آغلاما، قیزیم آغلاما
گؤریرم خرابه دی منزل ون، غم و رنج و دَرده بلالی سان
نه چراغی واردی نه فرشی وار، گونی قاره، باشی قارالی سان
قوری یِئرده یاتماقا اِینجیمه سن اَبُوتُراب عَیالی سان
بو قدر سیزیل داما مهربان بالام آغلاما، قیزیم آغلاما
سن علیّ اکبر عزیزی سن یئتر عزّت عَلوی سنه
یخیلوب ائوین، گئدوب عزّتین، یِئری وار اولام فَدوی سنه
بو خرابه شام ده گؤز تیکوب هامی عِترت نبوی سنه
باجیلار باخور هله بیر زمان، بالام آغلاما، قیزیم آغلاما
یُوزه سِیل اَشک وی باغلاما من اوُلوم فداسی بو گؤزیاشون
یاتا بولموسن منی داغلاما، دیزیم اوُسته دور گتی قوی باشون
بو قدر على دئیوب آغلاما گله جَک صباح على قارداشون
منی اِئتمه تیرِ غمه نشان، بالام آغلاما، قیزیم آغلاما
جگرین فراق اودونا یانوب، یِئری وار سِرشک تَرون داشا
دل زارین اود دوتوب اودلانوب، باخارام گؤزونده کی قان یاشا
تؤكولوبدی گؤزیاشون ایسلانوب، داخی من نه کُول سُووریم باشا
منه سِیل گاه اوُلوب آشیان، بالام آغلاما، قیزیم آغلاما
بُولوسن سکینه منیم سنه، نه قدردی مِیل و مُحبتیم
سنه غم یِئتنده اولور منیم بیره مین عَلاوه مُصیبتیم
بی بون اوُلسون آغلاما قالمیوب داخی غصه چکمِ گه طاقتیم
غم اَلین ده باغریم اوُلوبدی قان، بالام آغلاما، قیزیم آغلاما
بُو خَرابه اِیچره سن اوُل ماسان هانی همدمِ غمی زینبون
نه عَلاج اِئدیم همی اؤز گونین اِئدی سن قرا همی زینبون
سنی لَن تسلّی تاپار کُؤنُول ای اَنیس هم دَمی زینبون
نه قالوب دی سنده نه منده جان بالام آغلاما، قیزیم آغلاما
گؤرورم کی بیر دَگی مُحنتون نه دِئیم نه قابل پند سن
کسیلوب قراری له طاقتون، یانار اوُدلار اوُزرَ سِپند سن
غم الین ده یوخ دو فراقتون سرِ زُلفِ اَکبره بند سن
بو بلای عشق دی یان، دایان، بالام آغلاما، قیزیم آغلاما
سن او مُرغ بی پَر و بال سن كیم اوُز آشیانون اِئدوب قَفَس
سن او شَمعِ مَجلس حال سن کی یانار بو حالوه هم نَفَس
سن او غرقِ بحرِ مَلال سن، غمی غَرق اولور سنه دادرَس
نه عَلاج اِئدوم من ناتوان، بالام آغلاما، قیزیم آغلاما
بو قدر گناه یلن ای (رضا) دِی گؤروم اَلونده ندور سند
یول اوُزاق، اَلون بُوش، اؤزوین قرا، گئجه وقتی سن یولا نابَلد
سال أؤزون کَمندِ سکینه یه، سَنه بلکه زینب اوُلا مَدَد
گِئجه گون دوز اِئت بو سوزی روان بالام آغلاما، قیزیم آغلاما
- شنبه
- 20
- شهریور
- 1400
- ساعت
- 16:10
- نوشته شده توسط
- یوسف اکبری
ارسال دیدگاه