اهل بیت مصطفانی چوخ مصیبتدن صورا
گتدیلر دروازۀ شامه نه مدتدن صورا
.
.
منزله یتجق عوض اینکه او جمع بی پناه
استراحتلیق ائده یا قدری رفع رنج راه
چخدی حکمی اول یزید بی حیانون آه آه
شهره وارد ایلیون بیر نچه ساعتدن صورا
.
.
چکدیلر اول شومون امرینه بو جاری شهرده
هر محلات و عبور و رهگذرده شهرده
باش آچوق بیر جمع یاغی وار کنار شهرده
پیشواز ائتسون هامی شهر اهلی عشرتدن صورا
.
.
سید سجاد گوردی ظلمی بو اندازه ده
غرق دریای محن اولدی بو ظلم تازه ده
قالدی اوچ ساعت تمام آل علی دروازه ده
داخل شهر اولدیلار چوخ چوخ خجالتدن صورا
.
.
نار طعنه یاندیرار آرتوق شرار ناردن
ائتدیلر جویا أشد ظلمی چون بیماریدن
سؤیلدی الشام ثم الشام بو تکراردن
بس بویورموش بو سؤزی طعن و شمادتدن صورا
.
.
غرفه و بامه دولوب اهل تماشا صف به صف
مرد و زن اعلا و ادنا شهرین اهلی هر طرف
عشرته مشغول چالورلار بعضیلر اللرده دف
آچدیلار دیل طعنیه چوخ عیش و عشرتدن صورا
.
.
گوردیلر جانانه بیر عاشق وئروب سرمایه سین
محکم ایلوب نیزه ده عشقین حقیقت پایه سین
گه باخار اهل و عیاله گه اوخور کهف آیه سین
جاری ایلر اشک آلین هر تلاوتدن صورا
.
.
گفتگو ایلردی زینب نیزه ده بیر باشیلن
بیربیرینه کشف درد ایلردیلر گوزیاشیلن
بیر عجوزه غرفه دن وردی او باشی داشیلن
تا ئولونجن آغلادی زینب او ضربتدن صورا
.
.
عرض ائدوب قارداش حسین ای سرور ملک حجاز
شاهی استقبال ائدرلر با جلال و اعتزاز
داشیلن اما سنی بو قوم ایلر پیشواز
چوخ تعدی و جفای بی نهایتدن صورا
.
.
من دئمم کند و ضعیف و یا قلمدن تیزسن
قافیه نشناس یا استاد آتش ریز سن
#مضطر اما سویلرم بی چیز سن بی چیز سن
عقل بی ثروتده اولماز طول صحبتدن صورا
.
.
- یکشنبه
- 31
- شهریور
- 1398
- ساعت
- 13:57
- نوشته شده توسط
- ابوالفضل عابدی پور
- شاعر:
-
مرحوم مضطر قفقازی
ارسال دیدگاه