زبانحال راهب
.
دیریمده اولوبسان منه مهمان آقا کیمسن؟
گورسندی وارون عزت شایان آقا کیمسن؟
.
.
موسی سن او سیناده اولان طورووه قربان
احمد سن اگر صورت پور نورووه قربان
عاشق سن اولوم باشدا سنون شورووه قربان
وئر قلبیده کی دردیمه درمان آقا کیمسن ؟
.
.
نهضت ایلیوب سن بئله معلومیدی خیره
گون مثلی چیخوبسان گئجه صندوقیده سیره
عیسی کیمی نورون دوتوب هر سمتیده دیره
عیسی دگوسن پس سنه قربان آقا کیمسن ؟
.
.
دیداروه گوردوم گئجه حوّاده گلوبدور
موسی ده گلوب مریم وساراده گلوبدور
پهلوده الی بیر خانم افتاده گلوبدور
باخدون یوزونه حال پریشان آقا کیمسن ؟
.
.
قالدی کشیکه یاوری دیریمده یزیدین
صحبتده اشیتدیم اولارون گفت وشنیدین
باشلارون الوب مندن هواداری رسیدین
یوخ سن کیمی دنیاده بیر انسان آقا کیمسن ؟
.
.
گفتاره گلوبلر اله فرصت سالا جاقلار
گزلینده بو صحراده بیر عدّه قالا جاقلار
شب خون ورولوب باشلاری بیزدن آلا جاقلار
نه باعث اولوب ویردون او گون جان آقا کیمسن ؟
.
.
لطف ائتدی باخوب عاشقینه حضرت معشوق
دنیاده منیم خاطریمی ایسته دی مخلوق
دیرونده یارالی باشیمی ساخلادی صندوق
مهمانون اولوب عترت ویلانیم حسینم
.
.
اعلان ایله اون آلتی کسوک باشلاری کیمدی
نسوانون آخور صورته گوز یاشلاری کیمدی
بو قافله ده وار باجی قارداشلاری کیمدی
گل صحبته ائتمه منی گریان آقا کیمسن ؟
.
.
صندوقیده قانلی باشووی چیگنیمه آلدیم
سس گلدی منه مفتخر اول بهتیده قالدیم
بیلدیم کی آقا بوینوما عزّت شالی سالدیم
گفتاره گل ای صاحب احسان آقا کیمسن ؟
.
.
گلدیم من اوزوم روزنه دن باشووه باخدیم
خلقتده چکن نقشهٔ نقّاشووه باخدیم
قانه بویانان گوزلرووه قاشووه باخدیم
صدمه نیه گورمیش لب و دندان آقا کیمسن ؟
.
.
واردور یوزوون قانلی کولی سالمیش عذابه
ویرسون گر اجازه بوکرم عطر و گلابه
خیر امریده منده چاتارام اجر و ثوابه
محشرده مکانیم اولا رضوان آقا کیمسن ؟
.
.
آدم ده سنون خاطریوی ایسته دی خیلی
دیدارووه گلسون گورونوب رغبت ومیلی
گور کیمسن اولوبدور سنه آدمده طفیلی
معناده ملک لر دی نگهبان آقا کیمسن ؟
.
.
رویاده آقا گل بو «معزی»سنی گورسون
رویونده سنون نور حق ذوالمنی گورسون
قبرینده دئسون گلمیش حسینیم منی گورسون
اظهاره گلوب ائتمسون عنوان آقا کیمسن ؟
. جواب و زبانحال امام حسین علیه السلام
.
راهب چیخوب حق اوسته منیم جانیم حسینم
اوز دینیمه خاطر توکولوب قانیم حسینم
.
.
جدّیمدی تانی حضرت پیغمبر خاتم
مصباح هدی نور خدا فلک نجاتم
جنّتده ورولمیش آدیما پرچم ماتم
طاها اوزودور پیده سی گریانم حسینم
.
.
کیفیت مرگیم سنه گر اولماسا معلوم
اظهار ایدورم کی اَنَا مَقْتُول اَنَا مَظْلُوم
راهب اَنَا عَطْشان اَنَا مَهْمُومْ اَنَا مَغمُوم
گوداله دوشوب پیکر عریانیم حسینم
.
.
آلمشدی عصا بیر اله موسائیدی راهب
گلمیشدی منه دم ویره عیسائیدی راهب
پهلوده قالان بیر الی زهرائیدی راهب
اللرده ئولوب مفخر نسوانیم حسینم
.
.
امضاء کی وئروبسن شهدا باشیدی باشلار
سر نیزده محکم ورولوب کوفه ده داشلار
اول گئجه لیک آی کیمیدی تیره لی قاشلار
جانین ویروب اسلامه شهیدانیم حسینم
.
.
آزاده منم قید عدودن اوزاق اولدوم
پس قانلی بیابانیده پوزقون تفاق اولدوم
دیرونده سنون بیر گئجه گلدیم قوناق اولدوم
اولدی صلحا فرقه سی مهمانیم حسینم
.
.
مهمانوی گوردون واریدی کول دوداقندا
یر ویرمدی خولی منه ایوده اطاقندا
قالدوم گجه نون چاقی تنورون بوجاقندا
کول اوسته اولوب شام غریبانیم حسینم
.
.
حاضر ائده سن عطر و گلابی قاباقیمدا
ضربه وروب اعدا نئچه یول غملی چاقیمدا
آهسته یووارسان یارا واردور دوداقیمدا
چوبه هدف اولدی لب ودندانیم حسینم
.
.
صندوقیده گتدون منی شخصیتون آرتدی
سس گلدی محبت ایلدون عزتون آرتدی
عیسی نون حضورینده سنون حرمتون آرتدی
وار قلبیده کی دردوه درمانیم حسینم
.
.
صحرای بلاده یارالی-اولدی نمازیم
باشلاندی خداونده او گون راز و نیازیم
قربان کیمی راهب کسیلوب تشنه بوغازیم
پایانه چاتوب شرطیلی پیمانیم حسینم
.
.
اشعارینه دنیاده «معزی» نمک ایستر
گوهر بیلوب هر بیتینی گورسون محک ایستر
مندن اوزونه روز ازلدن کمک ایستر
آخر ویریلر خلعت الوانیم حسینم
.
- چهارشنبه
- 10
- مهر
- 1398
- ساعت
- 12:51
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه