منه جان وئرنده عمه
قولومون طنابی آغلار
یرون اوسته قاره توپراق
گویون آفتابی آغلار
.
.
باش آچیق خرابه یرده گئجه گوندوزی قالاندا
نیه شمر اوتانمیوردی قره معجریم آلاندا
عوض نقاب اوزیمه بی بی زلفیمی سالاندا
گوره زلفمی پریشان یوزومون نقابی آغلار
.
.
هم اسیر و هم یتیمم ندی بیلمورم گناهیم
منی بو قدر ویراللار بی بی یوخدی دادخواهیم
توخنا اگر کی ابر غمه گوگده تیر آهیم
منه آهیمون اوخندان فلکون سحابی آغلار
.
.
منه کشف ائله ای عمه هانی بس عزیز زهرا
نیه درد بی دوایه گلوب ائتمیور مداوا
ائدرم بو توزلی زلفه گئجه صبحه جک متکا
یاتارام ترابون اوسته منه رختخوابی آغلار
.
.
بابامون یارالاریندان ئورگیم یاراسی چوخدی
او قدر دگوبدی طعنه سوزون هر بیری بیر اوخدی
یارالار شماره گلمز یارامون حسابی یوخدی
بی بی جان منیم کیمیم وار منه کیم حسابی آغلار
.
.
نقدر بو شامون اهلی بیزی گور اوتاندیروبلار
همی محنت فراقه همی درده یاندیروبلار
قولی باغلی نو عروسی باش آچیق دولاندیروبلار
یوزه زلفنی توکوبدور ائلیوب حسابی آغلار
.
.
دؤزه بیلمورم بو درد و غم و محنت و فراقه
منی رو بقبله ایله یتیشوبدی جان دوداقه
آلاجاق خرابه خاکی منی حشره جک قوجاقه
منیم حالیمی گورنده بو یرون ترابی آغلار
.
.
گورورم امام عصری غمون ایلیوبدی دلگیر
بیلورم اولوبدی من تک اودا نقد جانیدن سیر
منی اینجیدوبدی قمچی اونی اینجیدوبدی زنجیر
یوزومه باخوب گوزوندن توکر اشک نابی آغلار
.
.
کیمه دردیمی دیوم من بیر اوزون حکایتیم وار
چخا جان خرابه یرده ئوزومون رضایتیم وار
باخا بیلمورم ربابون یوزینه خجالتیم وار
مینم حالیمه باخاندا گورورم ربابی آغلار
.
.
داخی تنگه گلدیم عمه بو نجه جهاندا قالماق
بدنیمه یوخدی طاقت اسورم مثال یاپراق
قره زلفمی دوتوبدی قوری یرده قاره توپراق
اودی زلفمون همیشه منه پیچ و تابی آغلار
.
.
دیورم هانی بابام بس دیوسن منه تلسمه
غم و هجره صبر و تاب ائت یتیشنده وصله اسمه
ائده جک سنی عیادت ئوزی آشنادی رسمه
باشون اوسته من همیشه ، او سنه غیابی آغلار
.
.
توکه جک گوزیندن اشکین چکه جک یانوقلی آهین
سالاجاق خیاله دائم غمینی او بی پناهین
بالاجا مزارون ایستر ئوپوب آغلیا «نخستین»
اگر عمری اولسا یازسا سنه مین کتابی آغلار
.
.
- چهارشنبه
- 10
- مهر
- 1398
- ساعت
- 13:0
- نوشته شده توسط
- ابوالفضل عابدی پور
- شاعر:
-
مرحوم نخستین اردبیلی
ارسال دیدگاه