علی شکنج زلفیوی جدایه پرچم ایلمه
نظامی عالمی پوزوب جهانی برهم ایلمه
.
گوزوم ایوینده سالدیلار یره قد نهالیوی
مبدّل ایتدی قوم دون فراقیوه وصالیوی
کناره چک او زلفیوی گوره باجون جمالیوی
او خطّ و خالی گیزلدوب بو چشمی پُر نم ایلمه
.
جمالیدی دوتوبدی قان او مه یوزون دونوب گله
او زلف و کاکل اوخشوری علی گل اوسته سنبله
باخوب او سنبله گله یتوبدی ناله بلبله
او گلشنه سرشکیوی اماندی شبنم ایلمه
.
چو بلبل شکسته پر گلوب نوایه آغلارام
دالینجا باشیوین علی گیدوب چو سایه آغلارام
گلوب فغانه بیر زمان باخوب جدایه آغلارام
کناره دوتماقون منه دوباره بیر غم ایلمه
.
علی او ماه صورتون اولوب منیله روبرو
گلور مشامه دمبدم او عطر زلف مشکبو
خیال عالمینده دل ایدر سنیله گفتگو
بو عالمی منه علی بیر آیری عالم ایلمه
.
عراقه بیز یتن زمان ملاله همدم اولموشوق
بلالره دچار اولوب غمیله توام اولموشوق
تمام یاسه باتمیشوق چون اهل ماتم اولموشوق
قاشون هلال غم ایدوب بیزه محزم ایلمه
.
باشون یاراسی کاریدور گینه هنوز قان آخور
بو غم کشیده باجیوین نگاهی یاندیرور یاخور
جداده که جمالیوه او بینوا آنان باخور
بو یولّارین غبارینی یاراوا مرهم ایلمه
.
دالونجا گور نجه گلور توکور سرشکینی آنان
غمونده بس که آغلیوب اولوبدی قامتی کمان
جداده روبرو اولوب اونی چوخ ایتمه باغریقان
خمیده قامتین علی دوباره سن خم ایلمه
.
اماندی بیر اشاره قیل نگاهیلن بو خون دله
عنایتیله بیر گتور بو غملی گوگلومی اله
الیم یتیشموری سنه جدا اولوبدی فاصله
باشونلا نوک نیزه نی بو قدری همدم ایلمه
.
جداده چوخ دولانموسان قونوبدی زلفیوه غبار
غبار غم بو گوگلومه توکوب او زلف تابدار
غبار زلفیوی گتور یووا بو چشم اشکبار
توزا بو نوعی باتماقی بو زاره ماتم ایلمه
.
ضیاء ماه طلعتون جداده هر گورن دورور
نظاره سی گیدنلری گلنلری دایاندیرور
یتنده هر دیاره بیز جمالیوه باخان دورور
بیر ازدحام کثرتی بیزه فراهم ایلمه
.
ئولونجه هر کیم آغلیه بو غمده نازلی اکبره
بغیشله سن بو جمعیله او مظهر پیمبره
بو راثی فقیریله او گون گلنده محشره
ترحّم ایله ای خدا یرین جهنّم ایلمه
.
.
- چهارشنبه
- 10
- مهر
- 1398
- ساعت
- 14:5
- نوشته شده توسط
- ابوالفضل عابدی پور
- شاعر:
-
مرحوم راثی تبریزی
ارسال دیدگاه