کاروان غم که چاتدی شامه شام اولدی عیان
باخدی قارداش باشینا زینب اودم ایتدی بیان
.
شامه وارد اولورام دل دونوری قانه حسین
باجووی بو داش آتانلار گتورور جانه حسین
.
عشق زنجیرینه چکدی بیزی بو چرخ جفا
ایلدی خانه به دوش اولدی اسیر آل عبا
من هارا زین العبادیله بو شام اهلی هارا
شامه دوندی گونوزوم شام اولا ویرانه حسین
.
.
نه قدر چوللری بو خیل اسیران دولانوب
یولی بیراهه گلوب رنگ غمیله بویانوب
تاب ایدوب شمرین الینده بو روقین دایانوب
اُولمیوب وار نفسی اول دُر دُردانه حسین
.
.
زینب عاشقدی سنه باشوون آردونجا گلر
قیدعشقونده اسیر عشقینی جانانه بولر
شامیده باشین آغاردار نقدر غصه چکر
اولمیوب بیر بیله ظلم بیر جه مسلمانه حسین
.
.
گل دیله ایله تلاوت آیۀ قرآنی سن
شامده طغیان اولوبدی ایت خموش طغیانی سن
قوخماسان سن داش آتاندان دین حق قربانی سن
داش آتان عُجوزه بَنزر شکل حیوانه حسین
.
.
باخورام نیزده اکبر گهی اصغر باشینا
قاتوری رأس ابوالفضل قانیمی گوز یاشینا
او فرات ایچره مساوات ایلیوب قارداشینا
ایچمه دی حقین اداء ایتدی او عطشانه حسین
.
.
ناقه ده حفظ اولا باقر آناسی چوخ چالوشور
الی بند اولموری بیر یرده اورکدن آلوشور
گه حجابون دوتوری گه بالاسیندان یاپوشور
گورجاقین توکدی علی گوز یاشی دامانه حسین
.
.
گلمییدیم دیدی کاش عمه جهانه آنادان
بو مصیبتده دوزوم ویر منه ای جان یارادان
من خجل اولدوم الهی آنادان هم بالادان
شمع تک یاندی علی من اونا پروانه حسین
.
.
حقی وار سید سجادین حسین من تانورام
نیلیوم صحنة غم گوز که گورور اودلانورام
لیک علیدن ایشیدوب بو سوزی دیلدن یانورام
یتموری بو غم زینب نیه پایانه حسین
.
.
دونسون عالمده سنون گردشون ای چرخ فلک
داخل شام اولوروخ یوخدی ایدن کیمسه کمک
چشم نامحرم اولوب قرخایاخین قاره لچک
خارجی آد دیولور فرقة قرآنه حسین
.
.
هره فاخر گیینوب جامه سی وار رنگ به رنگ
آندولا حقه بوظلمی ایله مز اهل فرنگ
داش آتانلار ایلیوب باخ گوزومه عالمی تنگ
ندن حرمت ایله مز شاملی انسانه حسین
.
.
چون گل اوسته یاشیور بلبل مستانه حسین
یغوشار بزم غمه عارف و فرزانه حسین
شمعسن «عدلی» سنه عمرودی پروانه حسین
حُب عشقیندن ایچوبدور دولی پیمانه حسین
.
- چهارشنبه
- 10
- مهر
- 1398
- ساعت
- 14:5
- نوشته شده توسط
- ابوالفضل عابدی پور
- شاعر:
-
حاج اصغر فرشچی
ارسال دیدگاه