گل اؤرک باشینده قالدی اللریم معصومه گل
زهریله سولدی سارالدی لبلریم معصومه گل
.
.
هارداسان ای عارضی گول، قامتی سرو روان
ای اولان قارداش فراقینده دلی چون لاله قان
گل خراسانه ویرور بو قارداشون حسرتله جان
دادیمه یت ای عزیزه خواهریم معصومه گل
.
.
سن وفا رسمین باجی بوللم کی باشدان آتماسان
حیف اولا رسم وفاده کامه هرگز چاتماسان
اختیارون اولسا گر سن شهر قمدا یاتماسان
قویماسان یالقوز منی ای یاوریم معصومه گل
.
.
گل باجی جان اوستیم یولدا قالوب آغلار گوزوم
سن بولورسن یوخ داخی هجرانیوه منده دوزوم
زهر انگوریله مسمومم باجی یرده یوزوم
جاریدور رخساریمه اشگ تریم مصومه گل
.
.
گر چه من تک قلبوی زهر ستمله دلمدون
لیک درد و غصه دن بولّم باجی دینجلمدون
نامه یازدوم یولّادوم علت ندور بس گلمدون
ای وفا برجنده رخشان اختریم معصومه گل
.
.
ای اولان چرخ وفاده بیر درخشان آفتاب
دخت موسی جان زهرا خواهر علیا جناب
یا اوزون گل باشیم اوسته یا منه یاز بیر جواب
قویما قالسون یولدا بو چشم تریم معصومه گل
.
.
گل باشیم اوسته باجی گور دیلده آه سردیمی
قویما بو وقتیمده یالقوز آل اؤرکدن دردیمی
جان ویرن دمده گوتور یردن بو روی زردیمی
تا آزالسون بلکه دلدن غملریم معصومه گل
.
.
سیل اشگیم گور نجه دیدمده طغیان ایلمز
خانۀ صبری یخوب گوز یاشی ویران ایلمز
آشنا یوخ دردیمه بیگانه درمان ایلمز
قان اولوب غمدن بو قلب مضطریم معصومه گل
.
.
.
رسمدور اوز دردینه درداهلی یولداش آختارار
بیر نفر همدرد دردین ائتماقا فاش آختارار
حسرتیله باجینی جان اوسته قارداش آختارار
گلمسن آرتار اؤرکده اخگریم معصومه گل
.
.
بیر گُلم باد ستمله رنگ رخساریم سولوب
دوشموشم آیری چمندن دردیله قلبیم دولوب
من کیمی هانسی گلون قلبی جهاندا قان اولوب
وار بو حالیمدن بیر حال دیگریم معصومه گل
.
.
باخ سولان رخساریمه سنده منیم تک سول باجی
ابر تک باران اشگه حسرتیله دول باجی
ائت نظر احوالیمه شوریله گریان اول باجی
قیل نوا ای خواهر غم پروریم معصومه گل
.
.
«هوشیم» گر چه غم ایام ایدوبدور دل ملو ل
نخلۀ عمروم گتورمش بو جهاندا غم حصول
شاد اولار گویلوم ولی اولسا بو بیتیم گر قبول
گل اؤرک باشیندا قالدی اللریم معصومه گل
.
- چهارشنبه
- 10
- مهر
- 1398
- ساعت
- 15:6
- نوشته شده توسط
- ابوالفضل عابدی پور
ارسال دیدگاه