الدن او خیزرانیوی قوی یره بی حیا یزید
ویرما حسین دوداقلارین ایلمه چوخ جفا یزید
.
.
بس که شروریدون یزید گور نه شرارت ایلدون
تخت ریاست اوسته سن دینه جسارت ایلدون
عصرین امامین الدوروب اهلینی غارت ایلدون
حشره تک ایلدون اوزون اوز یوزیوی قرا یزید
.
.
کرب و بلاده قارداشیم دینینه امتحان وروب
دینه کمک دورانلارا قانلی مناده سان وروب
باغلادیلار سویون یولون هامی سی تشنه جان وروب
اولدی سوسوز فدالره کرب و بلا منا یزید
.
.
شمر خموش ایدن زمان نور دل پیمبری
عرصهٔ قتلگاهیده گتدی وجوده محشری
یغدی کنار مقتله دایره وار لشکری
دوغرادیلار حسینمین پیکرین اشقیا یزید
.
.
فاطمه نین بناتنی وحشته سالدی کوفیان
فورخودان الدی چوخ اوشاق خیمه می یاندیران زمان
بس که ویریلدیلار الن الدی اسیر اولوب قالان
لعنت او سعدین اوغلونا باغلادی قول قولا یزید
.
.
ماه محرمین اونی سوندی چراغ عزتیم
یولدی سموم ظلمله گلشن با طراوتیم
بش دانا قارداشیم الوب قالدی اورکده حسرتیم
قویمادیلار النلره دوتماقا بیر عزا یزید
.
.
سن که بیله غروریله دورموسان الده خیزران
عترت ختم مرسله ظلموی ایلوسن عیان
ویرما او قاتلی لبلری شل اولا اللرون دایان
گورمه بو قدری ظلموی قارداشیما روا یزید
.
.
برهم ایدوبسن ای ایوی بر هم اولان جلالیمی
صبریمی هم آزالدیسان آرتروسان ملالیمی
هاردا قالوب ستاره لر ساخلامسان هلالیمی
کور اولاسان بو دور هامی عالمه رهنما یزید
.
.
هر کیم اولانماز آشنا فلسفهٔ شهادته
ملک وجودیدن گیچه منطقهٔ سعادته
جان وروب عمر جاودان کسب ایده باخ لیاقته
قارداشمین لیاقتین لطف ایلیوب خدا یزید
.
.
تخت روان ایدوب یولی شامه گلنده نیزه نی
آیهٔ کهفی باشلادی حیرته سالدی دشمنی
ایندی اراده ایلسه زنده به گور ایدر سنی
امر دی جاهلانه چون اولماز اونا رضا یزید
.
.
پیرو دین بر حق خاتم الانبیا دی بو
زادهٔ پاک حضرت سیدة النسادی بو
مفخر اولیادی بو فخرلی پیشوادی بو
جدیم اوزی دیوب بو دور عالمه مقتدا یزید
.
.
تپراقین اوسته بیر بودور حجت بر حق خدا
صاحب قان خدا اوزی ایستیه جاقدی خونبها
محکمهٔ الهی ده فاطمه گلسه بر ملا
نیلیجاق سان اوندا سن ایلسه لر جزا یزید
.
.
شرع سفارش ایلیوب ایله قوناقه احترام
هر نه مرامیده اولور اولسون اونی دوتون گرام
سن ولی ضد سن بو برنامیه زادهٔ حرام
اولدوروسن قوناقیوی قهریله برملا یزید
.
.
زین العبا که طاقتی سلب اولونوب وجودیدن
پینه لی سجده گاهه باخ دویمادی بیر سجودیدن
چشم بصیری اشک اولور قورخوسی وار ودودیدن
لیک سنون قیافه وه ایلمز اعتنا یزید
.
.
عاطفه یوخدی ذره جه سنده یزید کینه جو
ساخلامسان امامی سن قولاری باغلی روبرو
خسته دوشوب ز بس گزوب دشت به دشت سو به سو
یوخسل مذینه میز هارا شام هارا بو هارا یزید
.
.
بزم شرابی قورموسان خنده و شاد اوتورموسان
آل پیمبرین آدین خارجی سویلوسن هر آن
پرده دالیندا قیزلارون اوزلرین ایلیوب نهان
غصه دن السه حقی وار زینب بینوا یزید
.
.
میر حرم منم بو گون عترت ختم مرسله
دینین او قانلی پرچمین وقرلن آلموشام اله
باخما اسیریوم سنون کاخین اماندادور هله
شهر دمشقه گلمیشم کاخیوی یخماقا یزید
.
.
یازمش #امینی دفتر غمده غم آشنالرین
شلمه گلن قوناقلارون غصه لی ماجرالرین
شرح بیان ورور هامی صبح لرین مسالرین
زینبین آستانینه بلکه اوزون سالا یزید
- چهارشنبه
- 17
- مهر
- 1398
- ساعت
- 15:7
- نوشته شده توسط
- ابوالفضل عابدی پور
- شاعر:
-
حاج رسول امینی خوئی
ارسال دیدگاه