زینب پاک و طاهره لطف و کرامت اهلیدور
حاجتووی روا ائدر قوُماز عنایت اهلیدور
حقّه حسین کیمی اولوب حامی حمایت اهلیدور
سائلینی سویوندوروب لطفی سخاوت اهلیدور
ذاتی صداقت اهلیدور روحی سعادت اهلیدور
.
.
زینبه عالی مرتبه خالق ماسوا ویروب
نام مبارکی گلوب مجلسه چوخ صفا ویروب
اولدی ئورکده دردیمیز دردیمیزه دوا ویروب
دامنینی هاچان دوتوب ناخوشا تز شفا ویروب
آل عباده مرد و زن آری طبابت اهلیدور
.
.
مهدیِ فاطمه دیوب حقّه توکّل ایلیون
مشکلوز اولسا گر بویوک صبر و تأمل ایلیون
رنج و ملال و دردوزی قدری تقبّل ایلیون
صدقیله زینب عمّه مه دیلده توسل ایلیون
یوز قویون آستانینه عمَّم اجابت اهلیدور
.
.
چاتدی حسین شهادته قالدی قیامی ناتمام
حالت مُهلکه دوشوب ساجد حیّ ذوالکرام
عمّهٔ صاحب الزّمان یر یوزونه اولوب امام
زینب حسین قیامینی ساخلادی زنده والسّلام
فاطمه مرحبا دئدی گور نه صیانت اهلیدور
.
.
قصر یزیدیده قالوب سیّدالاوصیا کیمی
رعشه سالوبدی جانلارا هیبتی مرتضا کیمی
آلدی رشیده خولری زیر پره هما کیمی
قیزلاری شامی آلماقا بیلدی قَوی قُوا کیمی
محضر مرتضاده کیم اولسا، فراست اهلیدور
.
.
قانلی باشا طرف اَنوب قاتل الینده خیزران
پارچالیوب دوداقلاری طشته توکولدی تازه قان
حوری لر آلدی زلف اله باشینی آچدی قدسیان
عاطفه لر جوشوب داشوب نفرتین آندیروب سران
قصریده کی فهیم لر بیلدی جسارت اهلیدور
.
.
طشت طلاده گوزلرین رأس حسین دولاندیروب
زینبه گوئیا بئله سرّ نهانین آندیروب
شامین امیر فاسقی قلب بتولی یاندیروب
لبلریمه آغاج ووروب قانه منی بویاندیروب
تک قالوب ایندی ایش سنه دشمن عداوت اهلیدور
.
.
من دئدی یا حسین سنه خواهر انقلابیم
فاطمه گُلدی عصمته من اوگولون گلابیم
ذاتاً ابی ترابیم قاف وفا عقابیم
کیمدی یزید دینمیم ناطقهٔ حسابیم
شاه شراب خواریدور ملتی غارت اهلیدور
.
.
دوتدی بقیعه صورتین زینب اوگون یانا یانا
شهر دمشقه گَل دئدی آی یارالی ئولن آنا
باری یامان گونومده سن،چک منی غصه دن یانا
باخ دوداقیندا اوغلوون تازه آخان قیزیل قانا
باخمادیلار بالون سنون دائم عبادت اهلیدور
.
.
ای گُل باغ مصطفی فاطمه گَل وقاره باخ
بزم یزید شومیده عاشقه باخ نگاره باخ
زینت قهرمانیده عزت و افتخاره باخ
ناطقهٔ زمانه دور نطقینه باخ شعاره باخ
دِینینی ایلیور ادا دین و دیانت اهلیدور
.
.
زینب ائدوب سپاسینی حضرت ربّ العزته
دوتدی یزیده صورتین گلدی مقام صحبته
مثل علی بویوردی باخ منده اولان نصیحته
زینبم آشنا منم فلسفهٔ شهادته
حیف اولا کی مخاطبیم بوردا خلافت اهلیدور
.
.
ای طلقانین اوغلی من سایهٔ رحمتم تانی
ختم رُسل بابامدی بیل مفخر امّتم تانی
علت خلقتم تانی مایهٔ رأفتم تانی
مهر شفقتم تانی روح فضیلتم تانی
دخت علیّ مرتضی سوزده صلابت اهلیدور
.
.
رأس مطهر حسین لنگر کائناتیدور
جدّ کُبارینون آدی زینت الصلاتیدور
خارجی سن دئدون، ولی دینه ذَوِالحیاتیدور
یاری همان دوز عاشقون خالق شش جهاتیدور
عشقینه جان نثار ائدوب گور نه شجاعت اهلیدور
.
.
مظهر ذات کبریا کیمدی؟ حسین دگول مگر؟
نور دو عین مرتضا کیمدی؟ حسین دگول مگر ؟
دینینه تشنه لب فدا کیمدی؟ حسین دگول مگر ؟
سوزلری مثل کیمیا کیمدی؟ حسین دگول مگر ؟
مرد بزرگواریدور جدّی رسالت اهلیدور
.
.
یاره وورولدی باخمادی یارینی ائتدی یاد حسین
کرب وبلاده باشلادی ماه عزا جهاد حسین
آیهٔ کهفی ذکر ائدوب قلبیمی ائتدی شاد حسین
کوفه ده باش قانیم یازوب محمله زنده باد حسین
زندگیده رشیده دور کیمسه شهادت اهلیدور
.
.
قارداشیمون الین گَلوب فخریله قدسیان ئوپوب
سینه ده گُل جمالینی سرور مومنان ئوپوب
غنچه کیمی دوداقلارین خاتم مهربان ئوپوب
ایندی همان دوداقلاری طشتیده خیزران ئوپوب
ای شرفین ساتان، او باش آری شرافت اهلیدور
.
.
ساخلا قلم،«معزیا» دلده چو خالدی محنتون
زندگیده حقیقتاً نام حسیندی عزّتون
بسدی سنه قبول اولا محضر شه ده خدمتون
باخسا قیامتین گونی گر، گوله جک بو صورتون
باخماسا، حالووه گولن روز قیامت اهلیدور
.
- چهارشنبه
- 17
- مهر
- 1398
- ساعت
- 15:8
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه