• جمعه 10 فروردین 03


مجلس یزید -(حسین آدی گجه گوندوز دلیمده ازبر دور)

913

حسین آدی گجه گوندوز دلیمده از بر دور
اولوم فدا بو آدا عرش و فرشه لنگر دور

حسینه آغلارام عشقیله چون یقینیم دور
سرشک دیده قیامت ده دُر و گُوهر دور

یزید مجلسینون ماجراسی یاده دوشر
نه مجلس اوردا عیان اهلبیته محشر دور

تکبریله چخوب تخته اوُل لَعین و شَریر
دیدی پیمبر عیالی بو بزمه زیور دور

اولوب او مجلسه داخل فغانیله اسرا
گوروبله نوریله ظلمت او گون برابر دور

دیدی بو بزمه گیدون قانلو باشلاری گتورون
گوروم بو مجلسه ارزنده هانسی بیر سر دور

یزید مجلسنه گلدی نازنین باشلار
معاینه بیری آی دور بیریسی اختر دور

گوروب یزید خطا دیده قاسمون باشنی
دیدی بو کیمدی جمالی چو ماه انور دور

جواب وئردیله قاسم دی مُجتبا بالاسی
قولاقدا حیدری سی واردی پورِ صفدر دور

بو نوجوان حسنیدی یتیشمدی کامه
یارالی پیکرینه قوملار اوستی بستر دور

گورن زماندا شبیه پیمبرین باشین
دیدی بو کیمدی عجب مظهر پیمبر دور

جواب وئردیله بو شِبه مصطفی دی امیر
حسینون اوغلودی آدی علیِّ اکبر دور

الین ویروب الینه سویلدی عجب بو اوغول
شبیه ختم رُسل آفتاب خاور دور

بیله گل اوزلی جواندان نجه حسین گچدی
بو ظلمه تاب ایلماق بیر اونا میسّر دور

گورن زمانیده عباس نامدار باشین
سوال ایلدی بو هانسی بیر هنرور دور

عجب بو باشدا عیان سهم وار صلابت وار
گتوردی رُعبه منی قانیله مُحمّر دور

جواب وئردیله بو تشنه کام سقادی
حسین سپاهی نه تنها امیر لشگر دور

هامو دیه لّر ابوالفضل نامدار بونا
حسین تشنه لبه بو جوان برادر دور

وفاده مثلی تاپل ماز داخی بو دنیاده
صلابتیله شجاعتده مثل حیدر دور

حسین باشین گوروب اوُل بی حیای خانه خراب
دیدی بونی تانیدوم من که هانسی سرور دور

بو دور دیلّه بونا میر یثرب و بَطها
حبیبۀ حق یکتا بو شاهه مادر دور

شراب ایچوب او زنا زاده خیزران گوتوروب
خیاله سالمادی زینب حسینه خواهر دور

او قانلو باشه ازل آچدی لال اولان دلنی
دیدی حسین بو گون عالمده کیم مظفر دور

دیدیم گل اِیت منه بیعت قبول ایلیدون
حرملرین نجه گور خوار اولوب مُحقر دور

بو زینبوندی دوروب مجلسمده گوزیاشلو
قالوبدی بو ایاق اوسته علیل و مضطر دور

دیوب بو سوزلری ویردی آغاج دوداق لارینا
مجسم اِیت نجه گور بیر اسفلو منظر دور

آغاج دگنده او باشا باش آچدی آل الله
دیردی بیر بیره قزلار نه ظلم مُنکر دور

گوروب او حالی دوروب غیظله خانم زینب
دیدی اوتان گوروسن عترتی مُکدّر دور

حیا ایله او باشین باشسیز عترتی باخوری
بو آه و زار ایلینلر او شاهه دختر دور

بو باشدا واردی او قدری یارا سانا گلمز
بو باش حوالۀ زخم سنان و خنجر دور

گلوب بو مجلسه معناده مصطفی باخوری
آچان بو بزم ده باشین بَتول اَطهر دور

قوناقوی ووروسان ئوز ایونده ای ظالم
تمام ظلم لروندن بو ظلم بدتر دور

او لبلره که وورورسان جسارتیله آغاج
همیشه بوسه گه حضرت پیمبر دور

باتوبدی قانه بو باش کربلاده ظلمیله
بو دور حسین حبیب خدای داور دور

لسان حقدی بو قرآن او خور فصاحتله
مقرّبِ حرم بارگاه اکبر دور

تلاوتین ده دیور یعنی من مسلمانم
منی شهید ایلین نانجیب کافر دور

جزا گوننده جوابون ندور پیمبره بس
عذاب داور او گون ده سنه مقرّر دور

ایشتدی پرده دالندان بو سوزلری هنده
دیدی که وای منه بو هانسی بی برادر دور

بو سس على قزی شهزاده زینبون سی دور
هانی کومکلری بس بی معین و یاور دور

خدا نکرده بو باش گر حسین باشی اولسا
ایشق گونوز گوزیمه شامیله برابر دور

(علومی) باک ایلمه حشرده امید نجات
سنون الونده کی بو خامه دور بو دفتر دور

  • شنبه
  • 20
  • شهریور
  • 1400
  • ساعت
  • 16:26
  • نوشته شده توسط
  • یوسف اکبری

برای بارگذاری فایل در سایت اکانت مداحی بسازید



ارسال دیدگاه



ورود با حساب گوگل

ورود کاربران