چون راس شه دوران شام ایچره عیان اولدی
سرنیزه ده قرآنون آیاتی بیان اولدی
.
.
شام اهلی تماشایه چیخمیش دف و تاریله
قرآن اوخویور بیر باش الحان حجاریله
قالموش ولی حیرتده شام اهلی بو رازیله
ظهریدی موذن ده مشغول اذان اولدی
.
.
قرآن اوخیان وقته اول پیر خراباتی
تسخیر ایلیوب قرآن الحانی سماواتی
سرنیزه دکی باشلار درک ایلدی آیاتی
بو حالدا او باش افسوس داشلاره نشان اولدی
.
.
طغیان شرارتدن یئر تیره و تاریدی
کعبه گیینوب قاره گون ابره سواریدی
سرنیزه ده عاشقلر مست رخ یاریدی
منظومه ی شمساده بیردن نوسان اولدی
.
.
بوس ائتمگه اول باشی پروازه گلور داشلار
هر داشی هوا اوسته پیشواز ایلیور باشلار
باشدان یولونار ساچلار گوزلردن آخار قان یاشلار
شک ایلمه ای شیعه محشر او زمان اولدی
.
.
دوشدی نظر زینب ناگه سر مذبوحه
گوردی کی ورار داشلار بوسه سر مجروهه
نه حاله قالوب زینب سوز گلمدی مشروحه
محملده باشین یاردی دوز قدی کمان اولدی
.
.
قان جاری اولوب آخدی گیسوی پریشانه
گیسوی پریشاندان دامدی سر مژگانه
گوز یومدی قولاخ وئردی آوازه قرآنه
دولدی گوزونه قان یاش رخساره روان اولدی
.
.
آچدی گوزونی باخدی سرنیزه ده عشاقه
قرآن سسی ده هر آن اوج ایلدی نه طاقه
یئر اوندا وقاریله فخر ایلدی آفاقه
سس گلدی ملکلردن یئر ایندی جنان اولدی
.
.
وصلت می ینون اولموش باشلار هامی مشتاقی
مستور الیوب عشقون پیمانه سی عشاقی
میخانه ده جام الده حیرتده قالوب ساقی
بو سوزدی دئدیم گئچدیم سوز بیله بیان اولدی
.
.
دیدار ائدوب عاشقلر دلداریله بی پرده
جلوه ایلدی یارون رخساری برابرده
میعاده گلوب خندان دلداده ده دلبرده
بو وادی وحدتده چوخ چوخ هیجان اولدی
.
.
لبلردن اولور جاری کهف آیه لری محسوس
پیوسته او لبلردن داشلار گلوب ایلر بوس
قان لخته وران لبلر سویلر گئنه ده حق دوس
آیاتیله بو اوراد تکرار زبان اولدی
.
.
حق جلوه لنوب گئتدی شاماتیده اثباته
اوج ائتدی ان الحقون امواجی سماواته
عمال جفا دوشدی شترنجیده شه ماته
سلطان خلافت ده ملعون زمان اولدی
.
.
ای مدعی شرم ایله لعن ایلمه `بیضایه”
الطاف ید بیضا باشینه سالوب سایه
اولموش اونا اشعاری محشر گونی سرمایه
فکر ائتمه کی بیضاده بد نام جهان اولدی
- پنج شنبه
- 18
- مهر
- 1398
- ساعت
- 13:4
- نوشته شده توسط
- ابوالفضل عابدی پور
ارسال دیدگاه