نجه قارداشسیز اولا خوار اولی دنیاده باجی
ائله قارداشه ده واجبدی چوخ اثناده باجی
نجه بلبل گُله باخدیقجا گلر آوازه
قارداشوندا سؤزینه حظّ ائلیور ساده باجی
دانیشان وقتیده قارداش اونون هر کلمه سینه
جان دیر لحن گهر بارینه دلداده باجی
هر کس ایستکلی لرین وصف ائده تئز شوره گلر
قارداشین گُل بیترر گلشن ایجاده باجی
فطرتاً سویگلی بی مثل بیلر سویگلی سین
یوسف عصر گورر قارداشی سیماده باجی
هر زمان سالسا نظر مهریله گُل صورتینه
اوخشادار قارداشینی حور و پریزاده باجی
چکسه قارداشلار اگر دست نوازش باشینا
فکر ائدر سیره چیخوب سایه ی طوباده باجی
اشجع ناس بیلر هر باجی ئوز قارداشینی
چاغورار دادینه بو علّته دعواده باجی
حفظ ائدر قارداشین آدی باجینون عزّتینی
دولانار جرئتیله معبر و مأواده باجی
قارداش ایلر باجیا سینه یامان گونده سپر
یر وئرر قارداشینا دیده ی بیناده باجی
خوش گونونده خوش اولار غم گونی دیلدن پوزولار
سایه سینده دولانار قارداشین آزاده باجی
فلکون قهری آیرسا باجینی قارداشدان
آرزو ایلر اقلاً گوره رؤیاده باجی
چرخ دوّاردن اوز وئرسه بلا قارداشینا
چالیشار تئز چاتا اوّل نفر امداده باجی
وئرسه لر مژده ی دیدار برادر باجیا
نقد جان بذل ائده حاضردی بو سوداده باجی
قدم آتدوقجا دیر گئت باجی قربان بویوا
اوخشادار سرو قدین شاخه ی شمشاده باجی
راضی اولماز قونا گیسوی گل افشانینه توز
شکر ائدر باخدیقجا حُسن خداداده باجی
باجی دوزمز باتا قارداشین ایاقینه تیکان
دوشه هر محنته قارداشی گلر داده باجی
مشکلاتینده فقط نیّتی قارداشی اولار
وئرمز امّید الینی همسر و اولاده باجی
باجی قارداش ائوین امّید ائوی سویلر اوزینه
سیخیلار قارداشا بو رسمدی افتاده باجی
بیر کیچیک تحفه وئره قارداشی فخر ایلر اونا
دیر آللّه اوزون آغ ایلیه عقباده باجی
بنزیور قارداش او انگشتره پر قیمت اولا
اوزوگون زینتی قاشدی بو معمّاده باجی
نئچه حسّاس زماندی وئرر اوز قارداشه
خوش اولار قارداشا اوردا اولا آماده باجی
بیری قارداشون او حسّاس گونیندن طویدی
کام آلار هر باخشیندا قد داماده باجی
پیکریم قبره گئده دوش برادرده دیر
آبرودی منه حتّی دل غبراده باجی
یوخدی قارداش باجینون حُبینه مقیاس صریح
گوی سبقت آپاریب لیک بو معناده باجی
علم توصیفده قارداش باجیا چوخ سوز وار
نکته باریکدی چوخ یازما مطالب اوزانا
چوخ گلیب عالمه قارداش باجی ای شیعه ولی
نه گلر زینبه همتا نه حسینون مَثَلی
بو محبّت بو صداقتده نه قارداش نه باجی
گتیره باره محال امردی خلقت آغاجی
کیم ارادت تاپا قلباً بو باجی قارداشه
منتظر اولسون اونی قبرده خوش پاداشه
قرب حقده او قدر وار بولارین منزلتی
نه تقاضا ائده لر حاکم اولار مصلحتی
گر حسین شیعه لرین ایلسه بیر دفعه دعا
دیه آمین اونا زینب الی باشدان اوجالا
دوزخه اشک عزاداری سَپور، رب جلی
اونا قویماز یانا بیر عاشق اولاد علی
وار یقینیم هامی زوّار و عزادارلرین
ائده جک عفو خدا حشرده خونبارلرین
سندیم وار دئمدیم من بو سوزی بیهوده
قولاق آس مرحمت ذات حق معبوده
اَو تَباکا وجبه الجنّه امام صادق
بویوروب جدّی حسینه کیم اولا دوز عاشق
سنده ویر چنگ توسّل بو باجی قارداشه
آغلا عاشقلرنن هفته ده وئر باش باشه
یاده سال زینبی شامه گتیرن قافله دن
حرمتین حفظ ائله مزد آل بو سخی عاقله دن
اُسرا قرخا یوخون عورت اوشاقیدی مَلَر
هاردا گورموشدیله وحشیّت دونانی مگر
هاموسی اهل عفافیدی حیا آینه سی
فاطمه قیزلاریدی سیّد بطحا نوه سی
بیر ایپه باغلیدیلار واهمه دن اشک بصر
بابا وای دیلده هامی شدّتلن گوزدن اَلَر
کربلادن قولی باغلی یتشوبلر شامه
واردی هر تک تکینون دیلده بویوک غمنامه
بیر کیشی اولمادی اوردا سوروشا اعدادن
بو اوشاقلار نیه ایذایه دوشوب دعوادن
کسیلن باشلاری کیم گوردی جدا باشینده
دردین ابراز ائلین وار ولی گوز یاشینده
نه حمایت ائلین اولدی او یالقوزلاردان
نه هوادار اولان اولدی او خانم قیزلاردان
نوک سر نیزه ده مجنون اوتوروب لب بسته
لیلی محملده اورک قاندی اوزی دلخسته
شامون عورتلری گیموشدیلر الوان جامه
فاطمه قزلاری قوشلار کیمی دوشموش دامه
یتیرور هر دم اشاریله باخون عمّه لری
بالالاریم بو قرانلوق گئجه نون وار سحری
صَدَقه گتدی بیر عورت وئره اهل حرمه
بیز قوناقوک دئدیلر سفره ی ذات کرمه
گئت سفارش ایله بو شادلیق ائدن نسوانه
گله جکسوز الی بوش محکمه ی دیوانه
ناز پروردی بو طفلان هاموسی سبط رسول
دوولوبلر او قدر خسته دیلر جمله ملول
رهبروز تشنه شهید ایلدی زهرا بالاسین
عدنده آچدی حسین وای دئدی زهرا یاخاسین
کربلادن بورا قول باغلی گلیب انصاریم
پوزولوب گلشن دین قانه باتیب احراریم
کوفه نی ترک ایلینده اورگیم شاد اولدی
دئدیم آللّه بالالار غصّه دن آزاد اولدی
چکمشوک بیز نقدر کوفه ده دیل آزاری
شامون اورداندا چتین اولدی ولی بازاری
بو نه بازاردی بازاریدن اولدوم بیزار
چیخا حاشا اورگیمدن بو گونون آزاری
اهل بازارده هئچ چشم بصیرت یوخوموش
بیرینون اولمادی تشخیصی گوره اخیاری
شام بازارینه داخل ائلین وقته عدو
ظلمیلن ناقه لر اوسته حرم اطهاری
خلق چیخموشدی تماشایه ولی غرق سرور
اللرینده دف و تنبور قبیح اطواری
ملکوت اهلی باخیب حالیمیزه آغلاردی
شیعه لر گزلین ائدردی یوزه اشکین جاری
سَهل بن سعد دیور شامه یتشدیم او زمان
ناگهان شهرده گوردوم هیجان آثاری
چوخلاری جامه ی رنگین گینوب روح افزا
وار حنا اللرینون چهره لری گلناری
من بئله فکر ائلدیم عیدیدی من بی خبرم
تئز سوروشدیم سبب شادی محنت باری
بیر نفر سویلدی شام اهلی دگولسن لابد
چوخ غریبانه سوروشدون گورونن اخباری
سولدیم یوخ من اوزوم عاشق آل اللّهم
اولموشام ختم نبینون نئچه یول زوّاری
دئدی یا شیخ گرک قان یاغا طوفان گورونه
یر آچیب آغزین اوتا بو فرق زُنّاری
فاطمه قزلاری قول باغلی گلور شاماته
دوغرانیب اکبر و عبّاس حسین سرداری
دوه لر اوسته خانملاردی حسینون حرمی
اُسرا آدینه زینب اولارین سالاری
شهدا باشلاری سر نیزه باشیندا یارالی
هدیه عنوانی یزیده گتیرور اشراری
شهری عشرتکدیه دوندریب آل اموی
اورگی قاندی امامون بالاجا قزلاری
دئدیم هارداندی مسیر اُسرا بدو ورود
دئدی دروازه ی ساعتدن اولوب اجباری
بی تأمل اوزومی فوری یتیردیم او یره
گوردوم آللّه آقامون نیزه ده قان رخساری
وای دئدیم سبط نبی گور نجه احواله قالیب
جان دئدیم اشکیمی جاری ائلدیم تکراری
تئز یتیردیم اوزومی عترت آل اللّهه
بیر خانیمدان سوروشوب آدینی اولدیم یاری
من حسینون قزیام سویلدی سن کیمنن سن
من دئدیم جدّوزه امّت بابوون ابراری
امرون اولسا بویور ای دختر شاه شهدا
خدمتوزده وارام ای دلبرمون دلداری
دئدی سعی ایله حسینون باشینی حمل ائدنه
خواهش ایله آپارا بیزدن اوزاق تر باری
قزلارون بعضی سی وار باشلاری بی معجردی
یوزلرین گورمیه بو معرکه نون نظّاری
باخماسونلار بیزه نامحرم اراذل کیشی لر
گوزلرین کور ائلیه دشت و بیابان خاری
عمّه مون روحی معذّبدی پریشان حالی
یاز "صفا" نطقوی گویا اولا شعرون عالی
- دوشنبه
- 4
- مرداد
- 1400
- ساعت
- 21:26
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه