ای رقیّه گوزلیم آغلیوب آغلاتما منی
اوزولوب الدن الیم آغلیوب آغلاتما منی
.
.
ای غم و غصّه چولونده گزن آواره غزال
آیریلیق داشینی آز قلب پر اندوهیوه چال
کربلا یوللارینا آز او گوزل گوزلری سال
آه چکمه گوزلیم آغلیوب آغلاتما منی
.
.
ساری گل تک سارالان رنگیوه قربانم اوزوم
دیمورم آغلاما، آز آغلا،که یوخ منده دوزوم
آتاسزلیق غمی مشگلدی بالا یوخدی سوزوم
گوزلیم قاره تلیم آغلیوب آغلاتما منی
.
.
قویما دیواره یوزون توکمه ئوزه اشک محن
یانیروق بیر اودا باهم بلورم دردیوی من
قورخورام سنده بو غربتده الیمدن گیده سن
اود دوتوب آب و گلیم آغلیوب آغلاتما منی
.
.
مه جبین غنچه لبیم گل گُله گللر گل آچا
خسته منقارینی قانه بویانان بلبل آچا
یعنی جنّتده علی اصغریم الان دل آچا
بودی آرزیم، اَملیم آغلیوب آغلاتما منی
.
.
دردیوی عَمّه وه دئ دردیوی جانه آلارام
آلارام سینیه مظلوم بالا لای لای چالارام
سنه بیر صدمه یتیشسه بالا یالقوز قالارام
خوشدی سنلن آی ، ایلیم آغلیوب آغلاتما منی
.
.
قارداشیم عزم ایلین وقتده عالی سفره
سنی تأکیدیله تاپشوردی من خونجگره
او سفردن گلنه جانوی سالما خطره
دی سوزون منده بلیم آغلیوب آغلاتما منی
.
.
آتش آهویله قلبیمی یاندیرما بالا
خرمن صبریوی صبر ایله تالاندیرما بالا
او گوزل گوزلری اشگیله بویاندیرما بالا
گل او گوزیاشی سیلیم آغلیوب آغلاتما منی
.
.
شام قزلاری گلن وقتیده دیداره بالا
وقریوی پوزما بله باشیوی سالما اشاقا
تز چاغیر عمّه لرون دوز اولاری صاق و صولا
سسله تز منده گلیم ، آغلیوب آغلاتما منی
.
.
آنامون گوزلرینه گوزلری بنزر گوزلیم
آنامون صورتینه چهره سی بنزر گوزلیم
اولوسان حیف اولا ویرانه ده پرپر گوزلیم
مرغک خوش غزلیم آغلیوب آغلاتما منی
.
- پنج شنبه
- 18
- مهر
- 1398
- ساعت
- 13:22
- نوشته شده توسط
- ابوالفضل عابدی پور
ارسال دیدگاه