دور ایاقه من قبریوه فدا
بیر اویان حسین بو نیامدن
دستگیر دشمن اولان باجون
قورتولوب گلوب شهر شامدن
وار شکایتیم اهل شامدن
.
.
ای یارالی ازّل بویور گوروم
یاخشیدور یاران من فدا سنه
یا که باش آچوب تازه قان گلور
سویگلوم حسین وئر خبر منه
منده سس چکوب ناله ایلیوب
آغلیوم گلوم داد و شیونه
ایله وای حسین وای حسین دیوم
تا گئچه سسیم نه غمامدن
.
.
لطف و مرحمت ایلسن حسین
حالیمی سوروشسان اگر مینم
وار قضاسی چوخ چوخ بو باشیمون
بو اؤرکده هم واردی چوخ غمیم
دور ایاقه اول ای عزیز من
مختصر زمان یار و همدمیم
گر چه قدرتون یوخدی شمر دون
عاجز ایلیوبدور قیامدن
.
.
مختصر دیوم شهر کوفه ده
چوخ جفا ایدوب اشقیا بیزه
گورموشم نلر نه دیوم حسین
نیلیوبدی اهل جفا بیزه
ائتمیوبدی شرم و حیا قویوب
خارجی آدی برملا بیزه
قورخمیوبدیلار روز حشرده
حقّیلن آلان انتقامدن
.
.
دوشموشم او مرجانه اوغلونون
مجلسینده من نه بلالره
ناسزایه دیل آچدی چون او دم
دیل یاراسی ووردی بو مضطره
تاب ائدنمدیم حق سوزومله من
ووردوم اود حسین جان او کافره
بزم عیشینی برهم ایلدیم
آلدیم اختیار خاص و عامدن
.
.
گورموشم یارالی باشون گئدر
دیره میهمان منده گلمیشم
میزبانیوی بولموشم حسین
خیلی مهربان منده گلمیشم
راهبه ائدن وقته درد دل
ائتماقا فغان منده گلمیشم
راهبون حسین وای سسی چخوب
عرشه صبحه دین اول مقامدن
.
.
گر ائدم بیان شام محنتون
نه دیوم نلر گورموشم اوزوم
اول قدر بلا یوز وئروب منه
شامده دونوب شامه گوندوزوم
یاده ساللام عمروم نقدر وار
آغلارام چتین بیر گوله یوزوم
اهل بیتیوون نظمینی سالوب
بی حیا جماعت نظامدن
.
.
مجلس یزیده گئدنده من
ینگیمی یوزه ائتمیشم نقاب
گه گولوب گهی اوینیوب قمار
گه او بی حیا میل ائدوب شراب
لبلریوه گه ووردی خیزران
قالمادی بو زینبده صبر و تاب
ناسزا آتام حیدره دیوب
قورخمیوبدی هئچ لاینامدن
.
.
مدتی بولورسن اوزون حسین
قالمشوخ پریشان خرابه ده
سویگلون رقیه صباح و شام
چوخ ائدردی افغان خرابه ده
اول قدر دیوب هارداسان بابا
عاقبت وئروب جان خرابه ده
نسگلیم قالوب دویمادی بالام
تا ئولونجه آب و طعامدن
.
.
من نجه دوام ایلیوب حسین
گوز یاشی توکوب سس اوجاتمارام
اول بالام رقیه مصائبین
من ئولونجه یاددان چخارتمارام
وای خرابه ده جان وئرن بالا
سویلرم باشمیدان هئچ آتمارام
جانیوه قسم سالدی نسگلی
بو باجیوی صبر و دوامدن
.
.
آلتی گوشه لی قبری «شوریا»
قسمت اولمیوبدور بو اربعین
سن حسینیدن اولما نا اُمید
عین مصلحت بوندادور یقین
گر بو ایل سنه قسمت اولماسا
کس امیدیوی اولگلان امین
بولگلن حسین لطفنی کسوب
دوشگلن اوزون بو مرامدن
- سه شنبه
- 23
- مهر
- 1398
- ساعت
- 14:9
- نوشته شده توسط
- ابوالفضل عابدی پور
ارسال دیدگاه