قمچی اثرین ساخلادی قوللاردا رقیه
ویرانه ده قالدی گوزی یوللاردا رقیه
.
.
شاماتیده یورقون بدنه قاره گیَردی
دیدارینه کیم گلدی دیدی عالی سیَردی
قلبی دوتولاردی سوزین اللهه دیَردی
بیر گون داریخوب قوش کیمی چخدی قفسیندن
آز قالدی یانا یر یوزی اودلی نفسیندن
.
.
اگلشدی خرابه قاپوسیندا یولا باخدی
شاید باباسی شامه گله شاد اولا باخدی
گون باتدی خبر اولمادی صاق وصولا باخدی
ویرانه ده دردین دیه غمخوارینه گَلدی
رؤیاده باباسی گجه دیدارینه گَلدی
.
.
یانمشدی فراقینده دایاندی قاباقیندا
گوردی یارالی صاحب خانه قوناقیندا
قان قطره سینه گوزلری دوشدی دوداقیندا
دیداریمه گلدون دیدی ای غملی قوناقیم
ویرانم ایشقلاندی صفا تاپدی اطاقیم
.
.
هجرونده گجه گوندوزی یاندیم بابا گلدون
چوللرده قولی باغلی دولاندیم بابا گلدون
ویرانه یریم اولدی تالاندیم بابا گلدون
شاه سان سنی ویرانه یره گتدی علاقه
شرمنده لیگمدن باشیمی سالدیم اشاقه
.
.
بیلدیم نیه قاره در و دیواره ویروبلار
آخر نه بیلیم ظلم الی گلزاره ویروبلار
جرمون نئیدی لبلرووه یاره ویروبلار
رحمت واریدی امته عطشان دوداقوندا
مزدون بو اولوبدور قوریوب قان دوداقوندا
.
.
زینب بی بی می ویردیلا بلبلرون اوسته
باخ گور نه چکوبدور سارالان گللرون اوسته
تپراق یاتوب عمّم داریان تللرون اوسته
یرده سریلر ساچلاری بالشلری یوخدی
با اینهمه هند اوغلونا خواهشلری یوخدی
.
.
سندن نه تقاضا ایلدیم فکریمه قالدون
آلدون منه گتدون اَله منظوریمی آلدون
ئوپدون یوزومی قوللاروی بوینوما سالدون
رأفتله منی زندگیده سن بارا گتدون
گوشواره دیدوم آل دوداقوندا یارا گتدون
.
.
زینب بی بیم آرتوق یانور ئوز اوخشاماسیندا
چوخدور گورورم غصه لی سوز اوخشاماسیندا
بیر سوز دیدی آهسته گونوز اوخشاماسیندا
سِچدیم سوزی سوزدن بو قَدر اشکی روانم
گوندوز ایشیدندن من الوندن نگرانم
.
.
قیزلاره دیدیم طیب و طاهر لریمیز وار
بیز شاه قیزیوق جامهٔ فاخر لریمیز وار
قالموش گوزیموز یولدا مسافرلریمیز وار
سن ایسته بابا ایندی سوزومده اثر اولسون
راضی دگولم من گجه گچسون سحر اولسون
.
.
دشمن منه چوللرده بابا سلسله ویردی
زجرون او قوی پنجه لری اود دله ویردی
باتدی نفسیم سینه ده سیلی ایله ویردی
زجرون الینون قمچی سی وار قوّه سی واردی
نیلک قیزوندا دلی وار ناله سی واردی
.
.
ویردی یوزومه سیلی یخلدوم یره دوردوم
طاقت یوخومیدی دایانام قدری اوتوردوم
امداده ابوالفضل عمومی یرده چاغوردوم
زهرا دیدی گویا گَلَه بیلمز یولی یوخدی
قول ایستر الین دوتسون اونون کی قولی یوخدی
.
.
- سه شنبه
- 23
- مهر
- 1398
- ساعت
- 15:18
- نوشته شده توسط
- ابوالفضل عابدی پور
- شاعر:
-
استاد یوسف معزی اردبیلی
ارسال دیدگاه