اِی شامه گلن من غم فرقت چَکوب ئولدوم
اوچ یاشدا دوشوب چُوللَره غُربَت چَکوب ئُولدوم
من بیر قیزیدیم گَلدیم او گوندن که جهانه
مانند شکوفه یوزومه گولدی زمانه
ماتم یِلی گُلزاریمی دوندردی خزانه
رنگیم سارالوب گُل کیمی آفَت چَکوب ئُولدوم
من بیر قیزیدیم تِللَریمی عمّه داراردی
آخشاملار اُولان وقتیده صبریم قوتاراردی
هر طَعنه لی سوز قلبیمی اوخ مثلی یاراردی
بیر قلبده مین یاره شَماتَت چَکوب ئُولدوم
من بیر قیزیدیم چوللری آواره گَزردیم
دردیله دولیدی اورَگیم، چاره گَزردیم
یوللاردا تیکانلیقدا اَیاق یاره گَزردیم
دشمنلر اَلیندن چوخ اذیّت چکوب ئُولدوم
من بیر قیزیدیم دشمن اَیاقدان منی سالدی
غارتده قُشون رَختیمی گوشواره َمی آلدی
صدّیقه کبری' نوه سی بیر حالا قالدی
باغلاندی قُولوم رنج اسارت چکوب ئُولدوم
ای دل دولوسی قبریمه نَجوا گَتورنلر
خادم لَریمه، اَلده هَدایا گَتورنلر
گوشواره و گهوارۀ زیبا گَتورنلر
آز عمریده من چوخ غم و مُحنَت چکوب ئُولدوم
از بَس یُولا باخدیم گُوزومون قان یاشی گَلدی
تا یار سفردن منه جان یولداشی گَلدی
گُوردوم گِئجه َنین عالمی قانلی باشی گَلدی
اِئتدی منی شرمنده، خجالت چکوب ئُولدوم
من بیر قیزیدیم نور دل جَدّۀ سادات
زهرا آناما بَنزَه ماقیم، اُولدی خوش اثبات
آق تاپمادی غَسّاله گیم رَختِ مُلاقات
نیلی بدنه بیر قَرَه خَلعَت چکوب ئُولدوم
یَثربده یاتاردیم گِئجه لر وصل زمانی
صُبح لر اُویاداردی یوخودان اکبر اَذانی
سُویلردی گُوزومدن سَنی آتمام باجی جانی
جان اوسته اُونی گُورماقا حسرت چکوب ئُولدوم
من بیر قیزیدیم دشمنین آثارینی پُوزدوم
هند اوغلونون آثارینی پرگارینی پُوزدوم
تَختدَن اُونی سالدیم یِره دَربارینی پُوزدوم
کاخ ستمی یخماقا زحمت چکوب ئُولدوم
گَر دوشسه (کلامی) گُذَرون کرب و بلایه
قارداشیم علی اکبره قیل عرض گِلایه
گُوزلوردوم عزیزیم سالاسان باشیمه سایه
سَن گَلمَدون آمال زیارت چکوب ئُولدوم
- یکشنبه
- 7
- شهریور
- 1400
- ساعت
- 14:2
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه