ای قبر پاکی زینت ارض و سما حسین
اولسون بو قبر پاکیوه زینب فدا حسین
.
.
ای دین یولوندا بذل ایلیین هرنه وارینی
قربان ایدن بومکتبه انصارو یارینی
لب تشنه حق یولوندا ویرن شیرخوارینی
دلدن ویرن تمام قضایه رضا حسین
.
.
کربوبلاده چیخدون عجب امتحانیدن
گیچدون بو امتحانیده باشیله جانیدن
تک باش وجان نه بلکه هامی خانمانیدن
ائوز عهدیوه بو عرصه ده ایتدون وفا حسین
.
.
باشدان تمام عالم امکانی آتموسان
عشقون یولوندا مقصدو مقصوده چاتموسان
اوز قانویله بیرق دینی اوجاتموسان
هرگز جهاندا یاتمیاجاق بو لوا حسین
.
.
باش اگمدون زمانه ده قوم ظلامه سن
کسدی اودورکی باشیوی ظلمیله اهرمن
حقی جداده عالمه سن ایلدون علن
ایتدون جهاندا باطلی حقدن جدا حسین
.
.
سن کی نجه باش اگمدون عالمده دشمنه
زینب باجوندا دلدن ایدوب اقتدا سنه
دشمن جفاسی ایتمه دی ذرّه اثر منه
فرض ایلدیم مصیبتی عشق وصفا حسین
.
.
سعی ایلدیم کی قارداشیمون قانی باتماسون
سن سرفراز ایدن علم عالمده یاتماسون
آل امیه دهریده مقصوده چاتماسون
ایتدیم بویولدا د‌ینیمی کامل ادا حسین
.
.
دور قبریدن ایاقه ایا شاه انس وجان
تا سرگذشتیمی سنه بیربیر ایدیم بیان
باخ گور نجه سرشگیم اولوب دیده لرده قان
اولموب باجون بومدتی غمدن رها حسین
.
.
کربوبلادن آیریلالی ای عزیزجان
هرگون سنون سوسوزلوقیوا ایتمیشم فغان
ایمدی گتورموشم سنه سو آچ گوزون اویان
ای تشنه دین یولوندا اولان جان فدا حسین
.
.
دور بیر مزاریدن ایله احوالیمه نظر
گور زینبون بو مدتی قارداش چکوب نلر
بیرده بویور گوروم منه جسمونده یاره لر
بیر آز بو قبر ایچینده تاپوبدور شفا حسین
.
.
بیر اربعیندی کی غم هجرونده یانمیشام
بحر بلاده دست ستمله تالانمیشام
غملر زبس یوروب داخی جانه دایانمیشام
صبح و مسا اولوبدی ایشیم آه و وا حسین
.
.
دوزدورکی شام و کوفه غمی چوخ یوروب منی
گل مثلی باد محنتیله سولدوروب منی
منده ولیک ایلمیشم خوار دشمنی
چاتسون مرامه قویماموشام اشقیا حسین
.
.
شامین غمی بیزه هامی غمدن اشدّ اولوب
غمدن دل بنات علی قانیله دولوب
ویرانه ده رقیه بالان گل کیمی سولوب
افسوس دردینه تاپا بیلموب دوا حسین
.
.
شامین خرابه سینده بالان تاپشوراندا جان
درد و غمینده ایلدی بو جمعی باغریقان
بیر گنج تک خرابه ده ایتدیم اونی نهان
قبره قویاندا ایلدیم آه و نوا حسین
.
.
جان تاپشوراندا نازلی بالان باخدیم آغلادیم
نیسگلرین سالوب یادیما سینه داغلادیم
الله بیلور گوزون نجه حسرتله باغلادیم
روحیم بدندن آزقالوب اولسون جدا حسین
.
.
ای قبرپاکی مامن عشاق بینوا
هر ناعلاج درده ویرر تربتون شفا
رزّاقی نوکرونده ایدور دائم التجا
لطف ایت اونوندا دردینه ایله دوا حسین
- سه شنبه
- 30
- مهر
- 1398
- ساعت
- 17:54
- نوشته شده توسط
- ابوالفضل عابدی پور
- شاعر:
-
ستار رزاقی
ارسال دیدگاه