حسین نازلو قزون قالدی
دئمم دور شامه گئت قارداش
دوروب باش قوزا قبروندن
منه خوش گلدون ائت قارداش
.
.
همان بو یرده ای قارداش او گون سندن سورا ناگاه
توکولدی خیمیه لشگر تالاندی خیمه و خرگاه
طناب ظلمه باغلاندی همان بو یرده آل الله
دچار اولدی باجون درد و غم و ایامه یولّاندوم
کول اولدی باشیمه اوندا دیار شامه یولّاندوم
.
.
ساقمدا سعد بی حرمت سولومدا شمر لامذهب
باجون قربان سنه قارداش اگر چه کشفدور مطلب
نلر چکدی اوزاق یولدان بو یوللار یورقونی زینب
اولونجا محشر کبری لباس غم گیوم قارداش
دیورسن شام عذابندن و یا که من دیوم قارداش
.
.
قاباقجا گون کیمی باشون گئدیر چون ماه تاباندور
دالونجا بیر بولوک کلفت گوزی ابر بهاراندور
اوزاق یول ناقه لر عریان یولی خار مغیلاندور
او گون جای تأسفدور ندن من ئولمدوم قارداش
دوشنده ناقه اوستوندن رقیّه بولمدوم قارداش
.
.
اینان که سن ئولن وقته او حاله قالمامشدوم من
مهین بانو ایدیم نیلوم یتیمدار اولماموشدوم من
او وقته تک رقیّمدن حسین آیریلمامشدوم من
دئسن هانسی باجی ایلر بیله بیر صحنه ده طاقت
یادیمدان چخماز عالمده منیم دروازۀ ساعت
.
.
همین بو دربدر زینب ازیلدی خوارو زار اولدی
ایشیق گون چشم گریانه همان شام ایچره تار اولدی
نه گوردوم من کسوک باشون او گونده سنگسار اولدی
اگیلدی نیزه ده باشون اولوب توپراقه خم قارداش
نه یاخشی گورمدی باشون او حالتده ننم قارداش
.
.
نلر گوردوم او گون قارداش یزیدون دستگاهنده
ایاق اوسته قولی باغلی او ویران بارگاهنده
بیزه یاور گلوب اول گون یزیدون عورتی هنده
نجه گور چاره سیز قالدوم گوزوم بو صحنه نی گوردی
پیمبر بوسه گاهینه او ظالم خیزران ووردی
.
.
وورولدی ضربه پی در پی حسین بو قلب نالانه
همین بو زینبه شام ایچره منزل اولدی ویرانه
رقیّه شمعیم اولموشدی باجون اول شمعه پروانه
اسوب باد ستم بیردن یانان شمعیم خموش اولدی
کفندار آدلانان زینب دوباره قاره پوش اولدی
.
.
خرابه بلبلی ئولدی یامان بیر درده من قالدوم
نه قبرین بیر قازان اولدی نه تاپدوم من کفن قالدوم
هره بیر یرده دفن اولدی گئنه من بی وطن قالدوم
بنات النّعش تک قارداش عیالون اولدی سرگردان
بو سن بو عترتون سالم ، بودا آیریلدیقون میدان
.
.
منی شام اهلی خوار ائتدی او شهری قانیله دولسون
سنون تک یاخشی قارداشدان نجه بو زینب آیریلسون؟
منیم سنسیز یوزوم گولمز آنام زهرایه آند اولسون
دوروب خوش گلدین ائت دیندیر اوزاق یولدان گلوب زینب
مجاور ساخلا یانونده سنه پابند اولوب زینب
.
.
بو گون پابوسیوه گلمیش سنون اهل حرم قارداش
چکوبلر شام شوم ایچره بولار ظلم و ستم قارداش
منی دیندیر رضا اولما خجالت چوخ چکم قارداش
عزیزلوق توسنین اوندا بو چولده پِیلدوم گئتدوم
سنی دفن ائتمه میش قارداش گئدوب شاماتی سیر ائتدوم
.
.
جهاندا «نادری» زینب کیمی بیر باغریقان اولماز
ئورک گر یانماسا قطعاً گوزون یاشی روان اولماز
خانم زینب تک عالمده حسینه نوحه خوان اولماز
دیار کربلادن شامه تک قان آغلادی زینب
حسیندن قانلو پیراهن نشانه ساخلادی زینب
.
.
- سه شنبه
- 30
- مهر
- 1398
- ساعت
- 17:55
- نوشته شده توسط
- ابوالفضل عابدی پور
- شاعر:
-
مرحوم نادری میانجی
ارسال دیدگاه